Connect with us

පුවත්

“විදෙස් ආයෝජන ගෙන්වාගන්න තරම් සුදුසු පහසුකම් ලංකාවේ තියෙනවා”

Published

on

විදේශ ආයෝජන ගෙන්වා ගැනීමට තරම් සුදුසු යටිතල පහසුකම්, මානව සම්පත් ඇතුළු පහසුකම් ශ්‍රී ලංකාව සතු බවත් දැන් අවශ්‍ය වන්නේ ආයෝජන දිරිමත් කිරීම සදහා අවශ්‍ය නෛතික වෙනස්කම් ඇතිකරීම බවත්, චීනයේ විදෙස් රටවල් අතර මිත්‍රත්ව සංගමයේ සභාපති (CPAFFC) ලින් සොංග්ටියැන් මහතා පවසා ඇත.

ඔහු මේ බව පවසා සිටියේ පසුගිය 15දා පාර්ලිමේන්තුවේදී කථානායක මහින්ද යාපා අබේවර්ධන මහතා හමුවූ අවස්ථාවේදීය. ශ්‍රී ලංකාවේ සිටින චීන තානාපති චී ජන්හොන්ග් මහතාද, පාර්ලිමේන්තුවේ මහලේකම් ධම්මික දසනායක මහතාද මෙම අවස්ථාවට එක්විය.

ආයෝජකයන් දිරිගන්වන සුළු නෛතික පසුබිමක් කඩිනමින් ස්ථාපිත කළහොත් හම්බන්තොට ඇතුළු නිදහස් වෙළද කලාප පමණක් නොව කොළඹ වරාය නගරයටද පහසුවෙන් ආයෝජකයන් ගෙන්වා ගැනීමට හැකි බව ඒ මහතා පෙන්වා දුන්නේය. එසේම චීනය ආයෝජන සදහා හැකි ඉහලම සහයෝගය ලංකාවට ලබා දෙන බවද ඔහු මෙහිදී පවසා ඇත.

චීනය මෙරට දිගු කාලීන මිතුරෙකු ලෙස ලබා දෙන සහයෝගය අගය කළ කථානායකවරයා දෙරටේ ද්වීපාර්ශ්වික සබදතා ඉදිරියේදීත් තර කර ගැනීමට අපේක්ෂා කරන බව පැවසීය.

අනතුරුව ශ්‍රී ලංකා – චීන පාර්ලිමේන්තු මිත්‍රත්ව සංසදයේ විශේෂ රැස්වීමකට ද සහභාගී වූ ලින් මහතා, උපායමාර්ගික වශයෙන් වැදගත් ස්ථානයක පිහිටි ශ්‍රී ලංකාව වරායන්, අධිවේගී මාර්ග යනාදි සියලු පහසුකම්වලින් සමන්විත බවත් කර්මාන්ත, කෘෂිකර්ම ඇතුළු ක්ෂේත්‍රවල වේගවත් වර්ධනයක් ඉදිරියේදී අපේක්ෂා කරන බවත් පැවසීය.

මෙහිදී අදහස් දැක්වූ ශ්‍රී ලංකා චීන පාර්ලිමේන්තු මිත්‍රත්ව සංගමයේ සභාපති පාර්ලිමේන්තු මන්ත්‍රී නාමල් රාජපක්ෂ මහතා පවසා සිටියේ දෙරටේ පාර්ලිමේන්තු මිත්‍රත්ව සංගම් හරහා ද්විපාර්ශ්වික සබදතා තවදුරටත් වැඩිකරගැනීමට අපෙක්ෂා කරන බවයි.

ලින් මහතා පාර්ලිමේන්තු මන්ත්‍රීවරුන් සමග සුහද පිළිසදරක ද නිරත විය. ඉන් අනතුරුව පාර්ලිමේන්තුවේ සංචාරයකද නිරත වූ දූත පිරිස, විශේෂ අමුත්තන්ගේ ගැලරියේ සිට පාර්ලිමේන්තු විවාදය නැරඹීමටද එක්වූහ.

පුවත්

ඉදිරි මාස දෙකේ සුනඛ සංගණනයක්

Published

on

By

ඉදිරි මාස දෙක තුළ මෙරට සිටිනා සුනඛයන් සංගණනය කිරීමක් සිදු කරන බව සෞඛ්‍ය අමාත්‍යංශයේ ජලභීතිකා මර්දන ඒකකය පවසයි. ලෝක සෞඛ්‍ය සංවිධානයේ අනුග්‍රහය මත මෙම සංගණනය සිදුකරන බවත් ඊට අදාළ මූලික ව්‍යාපෘති යෝජනාව සකසා අවසන් කර තිබේ.මෙරට සිටින්නෙ ලක්ෂ තිහක පමණ සුනඛ ගහණයක් බවත් ඉන් වැඩි සුනඛයන් සංඛ්‍යාවක් සිටින්නෙ නිවෙස් තුළ ඇතිකරන සුනඛයන් ලෙස බව ජලභීතිකා මර්දන ඒකකය පවසයි.

මේ වනවිට මෙරට සිටින සුනඛයන් එන්නත්කරණය සහ වන්ද්‍යාකරනය අඛණ්ඩව සිදුකරනු ලබයි.

මෙරට නීතියට අනුව සුනඛයන් මරණයට පත් කිරීම තහනම් වන අතර සුනඛයන් එන්නත් කිරීමෙන් සහ වන්ද්‍යකරණය කිරීමෙන් සුනඛ ගහනය පාලනය කළ නොහැකි බව ජලභීතිකා මර්දන ඒකකයේ විශේෂඥ වෛද්‍යවරයා පෙන්වා දුන්නේය.

දඩාවතේ යන සුනඛයින්ට මහාමාර්ගවල කෑම බීම දීම අඩු කිරීමෙන් යම් තරමක පාලනයක් සිදු කළ හැකි බවද ඔහු වැඩිදුරටත් ප්‍රකාශ කළේය.

Continue Reading

පුවත්

පොදු සමා කාලයේදී නාවිකයින් 1289 ක් බාර වෙයි

Published

on

By

2024 අප්‍රේල් මස 20 වන දින සිට 2024 මැයි මස 20 වන දින දක්වා ප්‍රකාශයට පත් කරන ලද පොදු සමා කාලය තුළ නිවාඩු නොමැතිව සේවයට වාර්තා නොකර සිටි නාවිකයින් එක්දහස් දෙසිය පනස් හතර දෙනෙකු (1254) නාවික හමුදා කඳවුරු වෙතත්, විදේශ ගත නාවිකයින් තිස්පස් දෙනෙකු (35) මාර්ගගත ක්‍රමය ඔස්සේත් වශයෙන් නාවිකයින් 1,289ක් බාර වී ඇත.

පොදු සමා කාලසීමාව තුළදී නිවාඩු නොමැතිව සේවයට වාර්තා නොකර සිටි සහ දැනට විදේශගතව සිටින නාවිකයින් හට [සියළුම ශිල්පීය අංශ වලට අයත් නාවිකයින් (Artificers) සහ වෘත්තිමය වෛද්‍ය/ වෘත්තිමය දන්ත (Professional Medical/ Professional Dental) අංශයේ නාවිකයින් හැර] නැවත රපෝර්තු කිරීමකින් තොරව නීත්‍යානූකූලව සේවයෙන් ඉවත්වීම සඳහා අවස්ථාව හිමි විය.

ඒ අනුව, 2024 අප්‍රේල් මස 20 වන දින සිට 2024 මැයි මස 20 වන දින දක්වා කාලසීමාව තුළ නිවාඩු නොමැතිව සේවයට වාර්තා නොකර සිටි නාවිකයින් එක්දහස් දෙසිය පනස් හතර දෙනෙකු (1254) නාවික හමුදා කඳවුරු වෙතත් විදේශ ගත නාවිකයින් තිස්පස් දෙනෙකු (35) මාර්ගගත ක්‍රමය ඔස්සේත් වශයෙන් නාවිකයින් එක්දහස් දෙසිය අසූ නව දෙනෙකු (1289) බාර වී ඇති අතර, ඔවුන් නීත්‍යානුකූලව ඉවත් කිරීම සඳහා කටයුතු සිදු කෙරෙමින් පවති.

Continue Reading

පුවත්

කළුතර බෝධිය වඳින්න ආ තරුණියක් අතුරුදහන්

Published

on

By

ඥාතීන් පිරිසක් සමග ඉකුත් 22 වැනිදා උදෑසන කළුතර බෝධිය වැඳ පුදා ගැනීමට පැමිණි 25 හැවිරිදි කාන්තාවක් අතුරුදහන් වීමේ සිද්ධියක් පිළිබඳව දකුණු කළුතර පොලිසිය පරීක්ෂණ පවත්වයි.

තම බිරිඳ වන කාරියවසම් පොලතන්ත්‍රිලාගේ තරංගි නිලූෂිකා ද සිල්වා මෙසේ අතුරුදහන්ව ඇති බව කළුතර බොලොස්සගම ,බෝසෙවනගම පදිංචි මැදගම ලියනගේ දොන් ප්‍රභාත් කෝලිත යන අය පොලිසියට පැමිණිලි කොට තිබේ.

ඉකුත් 22 වැනිදා උදේ තම පියාත් ඥාතීන් කීප දෙනෙකුත් සමග බිරිඳ කළුතර බෝධිය වැඳ පුදා ගැනීමට ගිය බවත් ,එහිදී ඇය අවුරුදු 02 ක් වයසැති දියණිය ඥාති පිරිමි ළමයෙකු අතටදී වැසිකිළියට යන බව පවසා ගොස් ඇති බවත්, සෑහෙන කාලයක් ගතවීත් ඇය නොපැමිණි නිසා පිරිස ඇයව සොයා බැලුවත් ඇය බෝධි පරිශ්‍රයේ නොසිටි බව කියමින් පියා තමාට දුරකථන ඇමතුමක් ලබා දුන් බවත් ඔහු පොලිසියට කර තිබූ පැමිණිල්ලේ සඳහන් වේ.

වයස අවුරුදු 25 ක් වන ඇය උස අඩි 05 අඟවා 04 ක් වන තළෙළු අයෙකු බවත් අවසන් වරට හැඳ සිටියේ නිල් පැහැති ඩෙනිම් දිග කලිසමක් හා සුදු බ්ලව්සයක් බවත් ඔහු තම පැමිණිල්ලේ වැඩිදුරටත් සඳහන් කර ඇත.

Continue Reading
Advertisement

Trending

Copyright © 2023 Sri Lanka Mirror. All Rights Reserved