එක්සත් ජාතික පක්ෂයේ කැලණිය ආසන සංවිධායක අමල් රොඩ්රිගෝ මහතා, හිටපු ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක, ජනාධිපති කාර්‍ය මණ්ඩල ප්‍රධානී හා එජප ජාතික සංවිධායක සාගල රත්නායක මහතාට පහරදීමට තැත් කිරීම සම්බන්ධයෙන් විනය පරීක්ෂණයක් කිරීමට එම පක්ෂය සැරසෙන බව වාර්තා වේ.
හිටපු ජනාධිපති රනිල් වික්‍රමසිංහ මහතාගේ ප්‍රධානත්වයෙන් මැතිවරණ සම්බන්ධයෙන් සිරිකොත පක්ෂ මූලස්ථානයේ පැවැති විශේෂ සාකච්ඡාවක අවසන් වීමෙන් පසුව අමල් මෙසේ සාගලට පහරදීමට ගිය බව මේවන විට ප්‍රසිද්ධ රහසකි.
එම අවස්ථාවේ සාගල බේරාගෙන තිබුණේ ජනාධිපති ආරක්ෂක අංශ නිලධාරින් විසින් ඔහුව රැස්වීම් කාමරයේ රඳවාගෙන දොර වසාගෙනය.
ආරක්ෂකයෝ දොර වසා ගැනීමෙන් පසුව ‘‘සාගල දේශපාලනය කරන්නේ දන්නේ නැහැ. පක්ෂයත් කෑවා’’ කියමින් කැලණිය සංවිධායකවරයා අසභ්‍ය වචන කියමින් ඔහුට බැණ වැදුණ බවත් පැවසේ.
හිටපු මන්ත්‍රිවරුන්ගේ ආරක්ෂකයන් ඉවත් කළත් මෙතෙක් සාගල රත්නායකට දී ඇති ආරක්ෂකයන් ඉවත් නොකර තිබීම ගැනද මෙහිදී සංවිධායකයින්ගේ කතා බහට ලක්ව තිබේ.
මූලාශ්‍රය – සති අග අරුණ
