මෙරට මීළඟ ජනාධිපතිවරයා ලෙස විපක්ෂ නායක සජිත් ප්‍රේමදාස මහතා පත් වන බව සෑම සමීක්ෂණයකින්ම තහවුරු වී ඇතැයි පාර්ලිමේන්තු මන්ත්‍රී තිස්ස අත්තනායක මහතා පවසයි.
ඔහු මේ බව සඳහන් කළේ, අද (19) නාවලපිටිය පැවති සමඟි ජන බලවේගයේ ජන රැලියක් අමතමිනි.
එහිදී වැඩිදුරටත් අදහස් දැක්වූ ඔහු,
“අද වෙනකොට මේ රටේ හැම සමීකෂණයකින්ම කියවෙන කතාවක් තියෙනවා. ඒ තමයි ඊළඟ ජනාධිපතිවරයා හැටියට පත් වෙන්නේ වෙන කවුරුවත්ම නෙවෙයි සජිත් ප්‍රේමදාසයි කියන එක මේ හැමෝම කියන්න පටන් අරගෙන තියෙනවා. මං දැන් දවස් තුනකට හතරකට උඩදි පිටකෝට්ටේ සිරිකොත ඉස්සරහින් වෙනත් ගමනක් ගියා.අර ගොඩනැගිල්ලේ ගහලා තිබ්බ විශාල අලියා දැන් නෑ. ඒක මකලා දාලා ඒකට උඩින් මලකඩ අල්ලපු ගෑස් සිලින්ඩරයක් හයි කරලා. ඔන්න රනිල් මහත්තයා කරපු වැඩ. එයා එක්සත් ජාතික පක්ෂයේ නායකයා නම් එක්සත් ජාතික පක්ෂයට ආදරෙයි නම් කරනේ එතකොට මොකක්ද? අවුරුදු 20ක් පුරා ජනාධිපතිවරණ වලදි අපිට කරන්න බැරි උන අලියා ලකුණු ඡන්ද පත්‍රිකාව ඇතුළත් කරන්න එයා ජනාධිපතිවරයා හැටියට බය නැතුව තීරාණයක් ගන්න තිබුණා. ඒත් ඒක කළේ නෑ. මොකක්ද එයා කළේ, අවසානයේ දිය වෙලා යන එක්සත් ජාතික පක්ෂයේ මිනී පෙට්ටියට අවසාන ඇණයත් රනිල් දැන් ගහලා තියෙනවා.”
