කතෝලික සභාව අභ්‍යන්තරයේ ඇතිව තිබෙන කඹ ඇදීමක් හේතුවෙන් පාස්කු ප්‍රහාරයට වසර 05 ක් පිරීම නිමිත්තෙන් සංවිධාන කරන සැමරුම් කටයුතු සංවිධානය කිරීමට ගැටලු මතුව ඇතැයි කතෝලික සභාවේ අභ්‍යන්තර ආරංචි මාර්ගවලින් වාර්තා වේ.

පිටිපන ලෙල්ලම සම්බන්ධයෙන් ධීවර සමිති සහ කතෝලික සභාව අතර ගැටුම, කතෝලික ලේඛක හවුලේ නිලධාරීන් හා එහි උපදේශක පියතුමා අතර ගැටුම ඇතුළු තත්ත්වයන් මේ බෙදීමට හේතුවී ඇති බව පැවසේ.

මේ අතර, පාස්කු ප්‍රහාරයට වසර 05 ක් පිරීම නිමිත්තෙන් සංවිධානය කරනු ලබන සැමැරුම් සම්බන්ධයෙන් නිරන්තරයෙන්ම සටන් කරමින් සිටින සිවිල් සංවිධාන සහ පුද්ගලයන් සදහා දැනුම්දීමක් නොකර කතෝලික සභාව තුල සිටින පියවරුන් පමණක් තීන්දු තීරණ ගනිමින් එය සංවිධානය කිරීමට යාමෙන් මේ තත්ත්වය තවත් බරපතල වී ඇති බව වාර්තා වේ. 

මීගමුව ලෙල්ලම සම්බන්ධ ප්‍රශ්නය දෙපාර්ශවයම අතර සාකච්ඡාවක් කරමින් කතෝලික සභාව තුළ බෙදීමක් ඇති නොවන පරිදි විසදීමට කතෝලික සංවිධාන සහ සිවිල් සංවිධාන රැසක් මැදිහත්කරුවන් වශයෙන් කටයුතු කරමින් සිටියත් කතෝලික සභාවේ පියතුමන්ලාගේ පාර්ශවයෙන් ඒ සඳහා නමයශීලීබවක් සහායක් නොදැක්වීම නිසා ඒ සදහා මැදිහත්කරුවන් ලෙස කටයුතු කරමින් සිටින කණ්ඩායම් රැසක් කළකිරීමට පත් වී ඇති බවද පැවසේ. 

මේ අතර, කතෝලික ලේඛක හවුල ලේඛකයින් අතින් ගලවාගෙන පසුගිය රජයේ ඕනෑ එපාකම් අනුව කටයුතු කළ කිහිප දෙනෙක් අතට පත්වී ඇති බවට ජෙයෂ්ඨ කතෝලික ලේඛකයින් රැසකගෙන් චෝදනා එල්ලව ඇත.

එසේම කාරක සභාව පත් කිරීමේදී බරපතල අක්‍රමිකතා රැසක් සිදුව ඇති බවත් නිලවරණයේ යෝජනා ස්ථරත්වයෙන් පත් කළ කාරක සභා සාමාජිකයින්ගේ නම් ඉවත් කර සභාපතිට ලේකම්ට අවශ්‍ය කිහිප දෙනෙකුගේ නම් ඇතුලත් කර ඇති බවටද ඔවුහු චෝදනා කරති.

මේ අතර, කතෝලික ලේඛක හවුලේ නිල වට්ස් ඇප් ගෲප් එක තුළ ප්‍රජාතන්ත්‍රවාදය සම්පූර්ණයෙන් අහෝසි කර අනිත් සාමාජිකයින්ගේ ප්‍රශ්න කිරීම්, අදහස් ප්‍රකාශ කිරීම් සියල්ල මකා දමන බවත් ලේඛකයින්ගේ තිබිය යුතු අවම සදාචාරයවත් කතෝලික ලේඛක හවුලේ නිලධාරින් තුළ නැති බවත් මේ සම්බන්ධයෙන් කතෝලික ලේඛක හවුලේ උපදේශක පියතුමා වන කතෝලික ජන සංනිවේදන අධයක්ෂ ගරු ජූඩ් ක්‍රිශාන්ත පියතුමාව දැනුවත් කිරීම සිදු කළත් එතුමා හැසිරෙන්නේ එම අකටයුතුකම් අනුමත කරන ආකාරයට යැයිද ඔවුහු චෝදනා කරති.