විත්තිකාර ජොන්ස්ටන් ප්‍රනාන්දුට අධිකරණය හමුවේ පෙනී සිටිය නොහැකි තරමට දැඩි කොන්දේ අමාරුවකින් පෙළෙන බවට නාරාහේන්පිට ප්‍රදේශයේ පිහිටි ප්‍රධාන පෙළේ පෞද්ගලික රෝහලක ලිපි ශීර්ෂයක් යටතේ අධිකරණයට අසත්‍ය වාර්තාවක් ඉදිරිපත් කළේ යැයි චෝදනා එල්ලවී ඇති ආර්.පී.කේ. චන්දන නමැති වෛද්‍යවරයා සම්බන්ධයෙන් ගනු ලබන විනය පියවර කුමක්දැයි අධිකරණයට දැනුම් දෙන ලෙස කොළඹ මහාධිකරණ විනිසුරු ලංකා ජයරත්න ඊයේ (23) ශ්‍රී ලංකා වෛද්‍ය සභාවට නියෝග කළා ය.
මහාධිකරණය විසින් කරන ලද නියෝගය ප්‍රකාරව හා එකී පෞද්ගලික රෝහලේ අධ්‍යක්ෂවරයා විසින් ඉදිරිපත් කරන ලද පැමිණිල්ලක් අනුව එකී වෛද්‍යවරයා සම්බන්ධයෙන් පරීක්ෂණ ආරම්භ කොට ඇති බව පෙන්වා දෙමින් ශ්‍රී ලංකා වෛද්‍ය සභාව වෙනුවෙන් පෙනී සිටි නීතිඥ උදාරී රණතුංග කළ කරුණු දැක්වීම සලකා බැලූ විනිසුරුවරිය එකී විමර්ශනවලින් අනතුරුව ගනු ලබන විනය පියවර කුමක්දැයි වාර්තා කරන ලෙසට නියෝග කළා ය.
සමුපකාර හා අභ්‍යන්තර වෙළෙඳ කටයුතු විෂය භාර අමාත්‍යවරයා ලෙස කටයුතු කළ සමයේ සතොස සේවකයන් පිරිසක් ඔවුන්ගේ නිල රාජකාරීවලින් ඉවත්කොට වෙනත් කටයුතු සඳහා යොදවා ගැනීම ඇතුළු චෝදනා යටතේ හිටපු අමාත්‍ය ජොන්ස්ටන් ප්‍රනාන්දු, සතොස හිටපු සභාපති එරාජ් ප්‍රනාන්දු හා සතොස හිටපු ක්‍රියාකාරී අධ්‍යක්ෂ කාජා මොහිදින් සාකිර් යන විත්තිකරුවන් තිදෙනාට එරෙහිව අල්ලස් හෝ දූෂණ විමර්ශන කොමිෂන් සභාව විසින් පවරා ඇති නඩුවේ පැමිණිල්ල වැඩිදුර සාක්ෂි විභාගය ලබන ඇති නඩුවේ පැමිණිල්ල වැඩිදුර සාක්ෂි විභාගය ලබන ජූලි 30 වන දා දක්වා කල්තැබීමට ද විනිසුරුවරිය නියෝග කළා ය.
පැමිණිල්ලේ සාක්ෂිකරුවෙකු ලෙස නම්කොට තිබූ විත්තිකාර ජොන්ස්ටන් ප්‍රනාන්දු මහතාගේ මහජන සම්බන්ධතා නිලධාරී ලෙස කටයුතු කළ ඒ.එම්. විජේරත්නගෙන් විත්තියේ නීතිඥවරු ඊයේ හරස් ප්‍රශ්න ඇසූහ.
ලබන ජූලි 30 වන දා පැමිණිල්ල වෙනුවෙන් සාක්ෂි ලබා දීම සඳහා පෙනී සිටින ලෙස දන්වා සතොස ආයතනයේ මුල්‍ය අංශ ප්‍රධානි නිලුෂි සංජීවනීට නොතීසි යැවීමට ද නියෝග කළ විනිසුරු ලංකා ජයරත්න ලබන අගෝස්තු 16 වන දා සිට අගෝස්තු 23 වන දා දක්වා කාලය සඳහා දෙවන විත්තිකරුට විදේශගතවීමට ද අවසර ලබා දුන්නා ය.
ව්‍යාපාරික කටයුත්තක් සඳහා විදේශගතවීමට අවසර ලබාදෙන ලෙසත් අධිකරණය විසින් පනවා ඇති විදේශ ගමන් තහනම තාවකාලිකව ඉවත් කරනා ලෙසත් දෙවන විත්තිකරු වෙනුවෙන් පෙනී සිටි නීතිඥවරයා කළ ඉල්ලීම සලකා බැලූ විනිසුරුවරිය එම නියෝගය කළාය අධිකරණය භාරයේ ඇති තුන්වන විත්තිකරුගේ විදේශ ගමන් බලපත්‍රය තාවකාලිකව ඔහු වෙත භාර දෙන ලෙසට ද විනිසුරුවරීය නියෝග කළා ය.
මූලාශ්‍රය – මව්බිම
