අධිකරණයට අපහාස කළේ යැයි චෝදනා කරමින් රක්ෂිත බන්ධනාගාර ගත කර සිටින ආගමන හා විගමන පාලක හර්ෂ ඉලූක්පිටිය මහතා ඇප මත මුදාහරින ලෙස කරනු ලැබූ ඉල්ලීම ශ්‍රේෂ්ඨාධිකරණය විසින් ප්‍රතික්ෂේප කර තිබේ.

ප්‍රීති පද්මන් සූරසේන, ගාමිනී අමරසේකර යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු අචල වෙංගප්පුලි මහතා තීන්දුව ප්‍රකාශයට පත් කළේය.

තීන්දුව ප්‍රකාශයට පත් කරමින් විනිසුරුවරයා සඳහන් කර සිටියේ මෙම කරුණට අදාළ නඩුකරය මැයි මස 08 වනදා විභාගයට ගැනීමට දැනටමත් අධිකරණය විසින් දින නියම කර තිබෙන බවය.

එම වාතාවරණය මත වගඋත්තරකරු රක්ෂිත බන්ධනාගාර ගත කරමින් මීට පෙර නිකුත් කළ නියෝගය වෙනස් කිරීමේ අවශ්‍යතාවයක් මතු නොවන බවත් විනිසුරුවරයා සිය තීන්දුවෙන් පෙන්වා දුන්නේය.

ඉකුත් රජය සමයේ විද්‍යුත් වීසා නිකුත් කිරීමේ කටයුතු පෞද්ගලික සමාගම් දෙකකට පැවරීමට අමාත්‍ය මණ්ඩලය විසින් ගනු ලැබූ තීරණය ක්‍රියාත්මක කිරීම වළක්වාලමින් අතුරු තහනම් නියෝගයක් නිකුත් කිරීමෙන් අනතුරුව විසා නිකුත් කිරීමේ පැරැණි ක්‍රමවේදය යළි ක්‍රියාවට නංවන ලෙස නිකුත් කරනු ලැබූ අතුරු තහනම් නියෝගයක් ක්‍රියාත්මක කිරීම පැහැර හැරීම තුළින් අධිකරණයට අපහාස කළේ යැයි චෝදනා කරමින් ආගමන හා විගමන පාලක හර්ෂ ඉලුක්පිටිය මහතා ඉකුත් සැප්තැම්බර් මස 25 වනදා රක්ෂිත බන්ධනාගාර ගත කරනු ලැබීය.

ජපානයේ “ඩිජිටල් භෞමික රූපවාහිනී විකාශන ව්‍යාපෘතිය” (DTTB) වෙනුවෙන් සවිස්තරාත්මක සැලසුම සඳහා උපදේශක කොන්ත්‍රාත්තුවක් සෞඛ්‍ය හා ජනමාධ්‍ය අමාත්‍යාංශයේ ලේකම් වෛද්‍ය අනිල් ජාසිංහ මහතා සහ ජපන් සමාගමක් වන යාචියෝ ඉංජිනේරු ආයතනය අතර ඊයේ (03) අත්සන් කරන ලදී. 

මෙම අවස්ථාවට සෞඛ්‍ය හා ජනමාධ්‍ය අමාත්‍ය – වෛද්‍ය නලින්ද ජයතිස්ස මහතා, මුදල් හා සැලසුම් නියෝජ්‍ය අමාත්‍ය – වෛද්‍ය හර්ෂණ සූරියප්පෙරුම මහතාල  ඩිජිටල් ආර්ථික නියෝජ්‍ය අමාත්‍ය – ඉංජිනේරු එරංග වීරරත්න මහතා සහ ශ්‍රී ලංකාවේ ජපාන තානාපති – අකිඕ ඉසොමතා යන මහත්වරුන් සහභාගී විය.

ඩිජිටල් භෞමික රූපවාහිනී විකාශන ව්‍යාපෘතිය යනු සීමිත සහ දුර්ලභ සංඛ්‍යාත ඵලදායී ලෙස භාවිතා කිරීම තුළින් තිරසාර ආර්ථික වර්ධනයක් සඳහා පදනම වන ඩිජිටල් ආර්ථිකයකට පරිවර්තනයට සහාය වන ව්‍යාපෘතියකි. ස්වාභාවික විපත් පිළිබඳ තොරතුරු සහ අනතුරු ඇඟවීම් ඇතුළු විවිධ අන්තර්ගතයන් සැපයීම සහ විකාශන කර්මාන්තයේ සෞඛ්‍ය සම්පන්න තරඟකාරී පරිසරයක් සුරක්ෂිත කිරීම තුළින් ජනතාවගේ ජීවිත වැඩිදියුණු කිරීමට ද මෙම ව්‍යාපෘතිය දායක වේ.

ජපානය සහ ශ්‍රී ලංකාව අතර ද්විපාර්ශ්වික ගිවිසුම අවසන් වූ දා සිට උපදේශක ගිවිසුම අත්සන් කිරීමට අදට වසර 10 ක් ගත වූ බව සඳහන් කරමින්, ව්‍යාපෘතිය තවදුරටත් ප්‍රමාදයකින් තොරව ක්‍රියාත්මක කළ යුතු බව තානාපති ඉසොමතා මහතා මෙහිදී අවධාරණය කළේය. ඩිජිටල්කරණය වූ ආර්ථිකයක් සාක්ෂාත් කර ගැනීම සඳහා ශ්‍රී ලංකාවේ ජනතාවගේ ප්‍රයෝජනය සඳහා ස්ථාවර ආකාරයකින් ව්‍යාපෘතිය ක්‍රියාත්මක කිරීම සඳහා අදාළ සියලු පාර්ශවයන් සමීපව කටයුතු කරනු ඇතැයි ද ඔහු අපේක්ෂා කළේය.

තායිලන්තයේ බැංකොක් නුවර පැවැත්වෙන බහු- තාක්ෂණික සහ ආර්ථික සහයෝගීතාව සඳහා වන බෙංගාල බොක්ක ප්‍රවේශයේ (BIMSTEC) 6 වැනි සමුළුව සඳහා සහභාගීවන නායකයින් වෙනුවෙන් වූ භෝජන සංග්‍රහයට අග්‍රාමාත්‍ය ආචාර්ය හරිනි අමරසූරිය ඊයේ (03) රාත්‍රියේ සහභාගී විය.

BIMSTEC 6 වැනි සමුළුව අප්‍රේල් 4 වැනිද‍ා (අද) තායිලන්තයේ බැංකොක් නුවරදී පැවැත්වෙන අතර ඊට සහභාගී වීම සඳහා අග්‍රාමාත්‍ය ආචාර්ය හරිනි අමරසූරිය ඊයේ පස්වරු. 5.55ට තායිලන්තයේ බැංකොක් හි පිහිටි ස්වර්ණ භූමි ගුවන් තොටුපළෙන් තායිලන්තයට පැමිණියාය.

වසර තුනකට පසු පැවැත්වෙන මෙවර බිම්ස්ටෙක් සමුළුවේ තේමාව වන්නෙ “සෞභාග්‍යවත්, ඔරොත්තු දීම සහ විවෘතභාවය” යන්නයි.

සාමාජික රටවල් හත වන – බංග්ලාදේශය, භූතානය, ඉන්දියාව, මියන්මාරය, නේපාලය, ශ්‍රී ලංකාව සහ තායිලන්තය අතර හවුල් ආරක්ෂක සහ සංවර්ධන අභියෝගවලට මුහුණ දීම සඳහා සහයෝගීතාව ශක්තිමත් කිරීම බිම්ස්ටෙක් සමුළුවේ අරමුණයි.

සමුළුවට සමගාමීව තායි-ශ්‍රී ලංකා වාණිජ මණ්ඩලය එක්ව සංවිධානය කළ ශ්‍රී ලංකාවට ආයෝජන අවස්ථා ආකර්ෂණය කර ගැනීම අරමුණු කරගත් “ශ්‍රී ලංකාවේ ආයෝජනය කරන්න” ප්‍රවර්ධන වැඩසටහන්වලට අග්‍රාමාත්‍ය ආචාර්ය හරිනි අමරසූරිය සහභාගී විය.

අනතුරුව අග්‍රාමාත්‍යවරිය බැංකොක් නුවර පිහිටි ඓතිහාසික වට් ෆෝ, විහාරස්ථානයට පැමිණි අතර විහාරාධිපති අතිපූජ්‍ය ප්‍රා ධම්ම වජිර පඤ්ඤාචාර්ය හිමිපාණන් බැහැදැක ආශිර්වාද ලබා ගත්තා ය.