කොළොන්නාව, මීතොටමුල්ල ප්‍රදේශයේ ඉඩමක් ගොඩකිරීමට අනුමැතිය ලබාදීම සඳහා රුපියල් මිලියනය 64ක් ඉල්ලා ව්‍යාපාරිකයකුට තර්ජනය කිරීමේ වරදට හිටපු ඇමැති ප්‍රසන්න රණතුංග මහතාට අත්හිටවූ සිර දඬුවම් සහ දඩ මුදල් ගෙවන ලෙස නියම කළ මහාධිකරණ තීන්දුව බල රහිත කරන ලෙස ඉල්ලා ගොනු කළ අභියාචන පෙත්සම විභාගයට ගැනීම සඳහා අභියාචනාධිකරණය ඊයේ (29) දින නියම කළේය.
ඒ අනුව එම පෙත්සම් විභාගය ලබන ජුනි මස 05,13,16 යන දිනයන් හිදී පංච පුද්ගල අභියාචනාධිකරණ විනිසුරු මඬුල්ලක් හමුවේ සිදු කිරීමට නියම කෙරිණ.
අදාළ පෙත්සම මායාදුන්නේ කොරයා, පී. කුමාරන් රත්නම්, බී .ශෂී මහේන්ද්‍රන්, දමිත් තොටවත්ත, අමල් රණරාජා යන මහත්වරුන්ගෙන් සමන්විත පංච පුද්ගල අභියාචනාධිකරණ විනිසුරු මඬුල්ලක් හමුවේ කැඳවූ අවස්ථාවේදී මේ බව තීරණය කරන ලදි.
එහිදී අගතියට පත් පාර්ශ්වය වෙනුවෙන් පෙනී සිටි ජනාධිපති නීතිඥ රියන්සි අර්සකුලරත්න මහතා මෙම පෙත්සම සම්බන්ධයෙන් ලිඛිත දේශන කිරීමට අවසර ඉල්ලා සිටියේය.
එම ඉල්ලීමට අවසර දුන් විනිසුරු මඬුල්ල අදාළ පෙත්සම විභාගයට ගන්නා දිනයට පෙර එම ලිඛිත දේශන ගොනු කරන ලෙස නියම කළේය.
හිටපු ඇමති ප්‍රසන්න රණතුංග මහතා විසින් මෙම පෙත්සම ඉදිරිපත් කර තිබුණි.
ප්‍රසන්න රණතුංග බස්නාහිර පළාතේ ප්‍රධාන ඇමතිවරයා ලෙස කටයුතු කරද්දී මීතොටමුල්ල ප්‍රදේශයේ ඉඩම් ගොඩකිරීමකට අදාළව ව්‍යපාරිකයකුගෙන් රුපියල් මිලියන 64ක මුදලක් ඉල්ලා තර්ජනය කළ බවට චෝදනා කරමින් ඔහුට එරෙහිව නීතිපතිවරයා මහාධිකරණය හමුවේ නඩු පවරා තිබුණි.
ඒ සම්බන්ධයෙන් දීර්ඝ නඩු විභාගයක් පැවැත්වූ කොළඹ මහාධිකරණය එහි තීන්දුව 2022 ජූනි මස 06 වැනිදා ප්‍රකාශයට පත් කළේය.
අදාළ චෝදනාවට ප්‍රසන්න රණතුංග මහතා වරදකරු බවට එහිදී තීරණය කළ කොළඹ මහාධිකරණය ඔහුට බරපතළ වැඩ සහිත වසර දෙකක සිර දඬුවමක් නියම කොට එය වසර 05කට අත් හිටුවීමට තීන්දු කළේය.
රුපියල් මිලියන 25ක දඩයක් ද නියම කෙරුණු අතර එය නොගෙවන්නේ නම් තවත් මාස හයක සිර දඬුවම් නියම කෙරිණ.
ඊට අමතරව රුපියල් මිලියනයක වන්දි මුදල් අදාළ ව්‍යාපාරිකයාට ගෙවන ලෙස නියම කෙරිණ.
එම දඬුවම්වලින් තමන්ව නිදොස් කොට නිදහස් කරන ලෙස ඉල්ලා ප්‍රසන්න රණතුංග මෙම අභියාචනා පෙත්සම අභියාචනාධිකරණය වෙත ගොනු කර ඇත.
අගතියට පත් පාර්ශ්වය වෙනුවෙන් පෙනී සිටි ජනාධිපති නීතිඥ රියන්සි අර්ස කුලරත්න මහතා මෙම පෙත්සම සලකා බැලීම සඳහා පංච පුද්ගල විනිසුරු මඬුල්ලක් හමුවේ නම් කරන ලෙස මීට පෙර අධිකරණයෙන් ඉල්ලා සිටියේය.
එම ඉල්ලීම සම්බන්ධයෙන් කරුණු සලකා බැලීමෙන් අනතුරුව පෙත්සම පංච පුද්ගල විනිසුරු මඬුල්ලක් හමුවේ විභාගයට ගැනීමට මීට පෙර තීරණය කරන ලදි.
ජනාධිපති නීතිඥ අනිල් ද සිල්වා මහතා සහ නීතිඥ කීර්ති තිලකරත්න මහතා පෙත්සම්කාර ප්‍රසන්න රණතුංග මහතා වෙනුවෙන් පෙනී සිටියහ.
නියෝජ්‍ය සොලිසිටර් ජනරාල් අසාද් නවාවි මහතා නීතිපතිවරයා වෙනුවෙන් පෙනී සිටියේය.
