යාල සිද්ධිය වූ ඉකුත් සෙනසුරාදා (22) මගේ පුතා යාලට තියා ගාල්ලටවත් ගොස් නැතැයි වනජීවි හා වන සම්පත් ඇමැති මහින්ද අමරවීර මහතා කියයි.

යාල ජාතික වනෝද්‍යානයයේදී තරුණයන් පිරිසක් සතුන්ට හිරිහැර වන පරිදි ජිප් රථ ධාවනය කිරීමේ සිද්ධිය සම්බන්ධව කෘෂිකර්ම අමාත්‍යාංශයේදී ඊයේ (27) සවස පැවැති මාධ්‍ය හමුවකදී ඇමැතිවරයා මේ බව කීවේය.

“යාල සිද්ධියට මගේ පුතාත් සම්බන්ධයි කියලා සමාජ මාධ්‍යවල ප්‍රචාරය වෙනවා.මේ ගමනට මගේ පුතා යාලට ගිය බව සම්පූර්ණ අසත්‍යයක්. එදින මගේ පුතා ගිහින් තිබුණේ මතුගම ඥාති නිවසකට විතරයි.“යැයිද ඇමැතිවරයා පැවසුවේය.

“ගොඩාක් දෙනෙක් මගෙන් අහනවා පුතා මේ යාල සිද්ධියට සම්බන්ධද කියලා. පුතා මේකට සම්බන්ධද කියලා කොහේ හරි සාක්ෂියක් තියෙනවා නම්, අඩුම වශයෙන් එදින ඔහු ගාල්ලෙන් එහාට හරි ගිහින් තියෙනවානම් සම්පූර්ණ වගකීම අරගෙන දේශපාලනයෙන්ම වුණත් අයින් වෙන්න ලෑස්තියි කියලා මම ඔවුන්ට කිව්වා.

මේ දේශපාලනයට ඉස්සරහදී හොඳ කට්ටිය එයි කියලා හිතන්න නම් බෑ. දැන් ළමයෙකුට පාරේ බැහැලා යන්න බැරි තත්වයක් ඇතිවෙලා තියෙන්නේ. මේ ඉන්න 225 ම ගෙදර ගියත් ඊළඟට එන්නේ හොඳ කණ්ඩායමක් නම් නොවෙයි.“ඇමැතිවරයා පැවසීය.

යාල සිද්ධියට ජීප් රථ 32 ක් සම්බන්ධ බවට තොරතුරු අනාවරණයවී තිබෙන බවත්, මෙම වාහන අධිවේගී මාර්ගයේ ගමන් කර ඇත්තේ අධික වේගයෙන් බවත්, ඉන්ධන ගැටලුව උග්‍රව පැවැති කාලයේදී කුරුණෑගල දෙසට ධාවනය වූ ජීප් රථවලින් වැඩි ප්‍රමාණයක් යාලට පැමිණෙන්නට ඇතැයි සැක කරන බවද ඔහු කීවේය.මෙම පිරිසගේ හෝටල් බිල පමණක් රුපියල් ලක්ෂ හැට ගණනක් බවද ඇමැතිවරයා පැවසීය.

යාල වන සතුන්ට බාධාවන පරිදි වාහන ධාවනය කළ පුද්ගලයින් මොන තරම් බලවත් වූවත් ඔවුන්ට විරුද්ධව නීතිය ක්‍රියාත්මක කරන බවද ඇමැතිවරයා සඳහන් කළේය.

සබැඳි පුවත්

යාල පිස්සූ නැටූ සෑම් හා අමරවීරලාගේ කට්ටිය අවුරුදු 7ක් හිරේ යවයිද?

මුවා හප්පපු කැබිනට් තාත්තාත්, සත්තු බය කළ පුතාත් නිදැල්ලේ!

යාල වනෝද්‍යානයේ නිලධාරීන් කිහිපදෙනෙකුගේ වැඩ තහනම්

යාලේ දී සතුන්ට වධ දුන් කල්ලියකට නඩු