ඉන්දීය අගමැති නරේන්ද්‍ර මෝදි මහතාගේ ශ්‍රී ලංකා සංචාරයට පෙරාතුව වීථි සුනඛයන් ඉවත් කිරීමට ගෙන ඇති පියවර සම්බන්ධයෙන් සත්ව සුභසාධන සංවිධාන සිය බලවත් විරෝධය පළ කර තිබේ.

ඔවුන් පවසන්නේ කොළඹ හා අනුරාධපුර නගර වල වීථි සුනඛයන් ඉවත් කිරීමට පියවර ගෙන ඇති බවයි.

හෙට (04) දිනයේ ලංකාවට පැමිණෙන මෝදි මහතා මෙම සංචාරය අතරතුරදී අනුරාධපුර ජයශ්‍රී මහා බෝධිය වැදපුදා ගැනීමටද නියමිතය.

මෙලෙස වීථි සුනඛයන් ඉවත් කිරීමට විරෝධය දක්වමින් RARE Sri Lanka සංවිධානයේ ක්‍රියාකාරීන් පිරිසක් අද කොළඹ දී විරෝධතාවයක නිරත විය.

කොළඹ පිහිටි ඉන්දීය මහකොමසාරිස් කාර්යාලයටද ඔවුන් මේ සම්බන්ධයෙන් සංදේශයක් භාර දී ඇත.

නිවේදනයක්ද නිකුත් කර ඇති RARE Sri Lanka සංවිධානයේ සභාපතිනිය වන පංචාලි පනාපිටිය මහත්මිය පෙන්වා දෙන්නේ ජනපති අනුර කුමාර දිසානායක මහතා හා අගමැතිනි හරිනි අමරසූරිය මෙනෙවිය විසින් සිය මැතිවරණ ව්‍යාපාර සඳහා ‘සත්ත්වය සුබසාධනය’ යොදාගෙන තිබුණද, සුනඛ ව්‍යන්ධකරණය සඳහා මෙවර අයවැයෙන් සතයක් හෝ වෙන්කර නැති බවයි.

ඉන්දියාවෙත් වීථි සුනඛයන් මිලියන 70ක්

මේ අතර, තවත් නිවේදනයක් නිකුත් කර ඇති Rescue Animals Sri Lanka සංවිධානයේ අනූෂා ඩේවිඩ් මහත්මිය පෙන්වා දෙන්නේ සත්ත්වයන් හට ආදරය කරුණාව දක්වන්නෙකු ලෙස ඉන්දීය අගමැතිවරයා ජනප්‍රිය බවත්, ඉන්දියාවේ වීථි සුනඛ ජනගහනය මිලියන 70ක් පමණ වන බවත්ය.රටක ශ්‍රේෂ්ඨත්වය සහ එහි මිනිසුන්ගේ සදාචාරාත්මක තත්ත්වය විනිශ්චය කරනු ලබන්නේ එහි සතුන්ට සලකන ආකාරය මත යැයි මහත්මා ගාන්ධි පැවසූ බවට සිහිපත් කරන ඇය, ‘ජනතාවාදී නායකයා’ ලෙස පෙනී සිටින ජනාධිපතිවරයා හට සිය මැතිවරණ පොරොන්දු ද අමතක වී ඇති බව පවසයි.

හදිසි තීන්දු ගන්නෙපා

මේ සම්බන්ධයෙන් ඉන්දියාවේ චෙන්නායි හි පිහිටි ප්‍රමුඛ සත්ව සුභසාධන පුණ්‍යායතනයක් වන Blue Cross of India (BCI) ද මේ සම්බන්ධයෙන් අනුර කුමාර දිසානායක ජනාධිපතිවරයා වෙත නිවේදනයක් යොමු කර තිබේ.

එම සංවිධානයේ සභාපති වෛද්‍ය එස්. චින්නි ක්‍රිෂ්ණා මහතා ගේ අත්සනින් නිකුත් කර ඇති එම නිවේදනයේ දැක්වෙන්නේ ඉන්දියාව යනු සත්ව සුභසාධනය වෙනුවෙන් පියවර රැසක් ගෙන ඇති රටක් බවයි.

එබැවින් ඉන්දියාවේ සත්ත්ව උපත් පාලන වැඩසටහනයේ නීති වෙත අවධානය යොමු කරන ලෙසත්, ඉන්දීය අගමැතිවරයා ගේ පැමිණීම නිසාවෙන් සුනඛයන් ඉවත් කිරීමට හදිසි තීරණ නොගන්නා ලෙසත් මහනගර සභා වලට උපදෙස් ලබා දෙන ලෙස ක්‍රිෂ්ණා මහතා, මෙරට ජනාධිපතිවරයාගෙන් ඉල්ලා සිටියි.

එක්සත් ජනපද නව තීරු බදු ක්‍රමය පිළිබඳව ගතයුතු ක්‍රියාමාර්ග සොයා බලා රජයට නිර්දේශ ඉදිරිපත් කිරීම සඳහා පත් කළ කමිටුව සහ ජනාධිපති අනුර කුමාර දිසානායක මහතා අතර හමුවක් අද (03) පස්වරුවේ ජනාධිපති කාර්යාලයේදී සිදු විය.

මෙම තීරු බදු පැනවීමේ පසුබිම සහ පදනමත්, මෙවැනි විශාල අගයකින් තීරු බදු පැනවීම නිසා කුඩා ආර්ථිකයක් හිමි අප වැනි රටවලට මුහුණ දීමට සිදුවන ආර්ථික අභියෝග පිළිබඳවත් මෙහිදී පුළුල්ව විමසා බැලිණි. 

උද්ගතව ඇති නව තත්ත්වය හමුවේ රටක් ලෙස ක්‍රියා කළ යුතු ආකාරය සහ ගත යුතු ඉදිරි ක්‍රියාමාර්ග පිළිබඳවද දීර්ඝ ලෙස සාකච්ඡා කෙරිණි.

කමිටුව නියෝජනය කරමින් ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව, මුදල් අමාත්‍යාංශයේ ලේකම් මහින්ද සිරිවර්ධන, මහබැංකු අධිපති ආචාර්ය නන්දලාල් වීරසිංහ,වෙළෙඳ අමාත්‍යාංශයේ ලේකම් ඒ.විමලනෙත්තිරාජා, අපනයන සංවර්ධන මණ්ඩලයේ සභාපති මංගල විජේසිංහ, විදේශ කටයුතු අමාත්‍යාංශයේ ආර්ථික කටයුතු පිළිබඳ අධ්‍යක්ෂ ජනරාල් දර්ශන පෙරේරා, ශ්‍රී ලංකා වාණිජ මණ්ඩලයේ  ප්‍රධාන ආර්ථික ප්‍රතිපත්ති උපදේශක ශිරාන් ප්‍රනාන්දු,  බ්‍රැන්ඩික්ස් ආයතනයේ සමූහ ප්‍රධාන විධායක නිලධාරී අශ්රොෆ්  ඔමාර්, මාස් හෝල්ඩිංග් සම නිර්මාතෘ ෂෙරාඩ් අමලීන්,  ලංකා ගාමන්ට් කළමනාකරණ අධ්‍යක්ෂ සයිෆ් ජැෆර්ජි, මිචලින් ලංකා පුද්ගලික සමාගමේ නිලන්ති වැලිවේ යන මහත්ම මහත්මීහු මෙම අවස්ථාවට එක්ව සිටියහ. 

මෙම සාකච්ඡාව සඳහා කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය අනිල් ජයන්ත ප්‍රනාන්දු, මුදල් හා ක්‍රමසම්පාදන නියෝජ්‍ය අමාත්‍ය හර්ෂණ සූරියප්පෙරුම යන මහත්වරුන් ද සහභාගි වූහ. 

(පෙර පුවත 2025 අප්‍රේල් 03, පෙ.ව.11:53)

ඇමෙරිකානු නව තීරු බදු ගැන රජයට නිර්දේශ දෙන්න ජනපතිගෙන් කමිටුවක්

එක්සත් ජනපද ජනාධිපති ඩොනල්ඩ් ට්‍රම්ප් විසින් පනවන ලද නව අන්‍යෝන්‍ය තීරු බදු හේතුවෙන්  පැන නැඟිය හැකි ගැටලු පිළිබඳව ගැඹුරින් අධ්‍යයනය කර රජයට නිර්දේශ ඉදිරිපත් කිරීම සඳහා ජනාධිපති අනුර කුමාර දිසානායක මහතා විසින් කමිටුවක් පත් කර ඇත.

ඒ අනුව මුදල් අමාත්‍යාංශයේ ලේකම්, මහබැංකු අධිපති, ශ්‍රී ලංකා ආයෝජන මණ්ඩලයේ සභාපති, ශ්‍රී ලංකා අපනයන සංවර්ධන මණ්ඩලයේ සභාපති, විදේශ අමාත්‍යාංශයේ ආර්ථික කටයුතු පිළිබඳ අධ්‍යක්ෂ ජනරාල් යන නිලධාරීන්ද, ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව , ශ්‍රී ලංකා වාණිජ මණ්ඩලයේ ප්‍රධාන ආර්ථික ප්‍රතිපත්ති උපදේශක ශිරාන් ප්‍රනාන්දු සහ අෂ්රොෆ් ඔමාර්, ෂෙරාඩ් අමලීන්, සයිෆ් ජැෆර්ජී යන මහත්වරුද මෙම කමිටුවට පත් කර ඇතැයි ජනාධිපති මාධ්‍ය අංශය නිවේදනය කරයි.

පාර්ලිමේන්තු මන්ත්‍රී නාමල් රාජපක්ෂ මහතා නීතිඥවරයෙක් ද නැද්ද? යන්න පිළිබඳ විමර්ශන ආරම්භ කරන ලෙස කොටුව ප්‍රධාන මහේස්ත්‍රාත් අධිකරණය විසින් අද (03) අපරාධ පරීක්ෂණ දෙපාර්තමේන්තුවට නියෝග කරන ලදී.

නාමල් රාජපක්ෂ මහතා ඔහුගේ නීති උපාධිය ලබාගෙන ඇත්තේ වංචනිකව ද නැද්ද යන්න පිළිබඳව මෙහිදී විමර්ශනය කෙරෙනු ඇත.

එම විමර්ශනය ආරම්භ වන්නේ අල්ලසට හා දූෂණයට එරෙහි පුරවැසි බලය නමැති සංවිධානය විසින් අපරාධ පරීක්ෂණ දෙපාර්තමේන්තුවට කරන ලද පැමිණිල්ලක් අනුවය.

ඒ අනුව ඒ පිළිබදව විමර්ශනය කර කරුණු වාර්තා කරන ලෙස කොළඹ ප්‍රධාන මහේස්ත්‍රාත් අධිකරණය අද අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකයට නියෝග කර ඇත.