යාල වනෝද්‍යානයේ අනිසි ⁣ලෙස හැසිරුණ පිරිසක් පාලන කිරීමට කටයුතු නොකළ සංචාරක මඟ පෙන්වන්නන් සහ වන නිලධාරීන්ගේ සේවය අත්හිටුවීමට තීරණය කර ඇති බව වනජීවී හා වන සම්පත් සංරක්ෂණ අමාත්‍යාංශයේ ලේකම් චන්ද්‍රා හේරත් මහත්මිය පවසයි.

සේවය අත්හිටුවීමෙන් පසු එම නිලධාරීන් සම්බන්ධයෙන් විමර්ශනයක් පවත්වන බවත්, සංචාරකයන් අතින් වන සතුන්ට පීඩාකාරී හැසිරීමක් වෙි නම් වන නිලධාරීන්ට ඊට මැදිහත්වීමට හෝ ඉහළ නිලධාරීන්ට දැනුම් දීමට හැකියාව තිබුනත් මෙම සිද්ධියේ දී ඔවුන් එවැනි කිසිදු පියවරක් ගෙන නොමැති බව ලේකම්වරිය වැඩිදුරටත් පැවසුවාය.

මේ සම්බන්ධයෙන් වනජීවී සහ වන සංරක්ෂණ අමාත්‍ය මහින්ද අමරවීර මහතා පැවැසූයේ, වනජීවී හා වෘක්ෂලතා ආඥා පනත යටතේ මෙම සංචාරක පිරිස සිදු කර තිබෙන්නේ බලවත් විෂමාචාරයක් බැවින් ඒ සම්බන්ධයෙන් දැඩිව නීතිය ක්‍රියාත්මක කළ යුතු බවයි.

මීට පෙර අදාළ පිරිස සම්බන්ධයෙන් නඩු පැවරීමට පියවර ගන්නා ලෙස අමාත්‍යවරයා වනජීවී අධ්‍යක්ෂ ජනරාල්වරයාට උපදෙස් දී තිබිණි.

වන සතුන්ට හිරිහැර වන අයුරින් යාල වනෝද්‍යානයේ සතුන් නැරඹීමට ගොස් අනිසි ලෙස වාහන ධාවනය කළ පුද්ගලයින් කවර තරාතිරමක අය වුවත් ඔවුන් අත්අඩංගුවට ගැනීමට කටයුතු කරන ලෙස දන්වා පොලිස්පතිවරයාට ලිපියක් යවන ලෙස ද වන ජීවී අමාත්‍යවරයා අමාත්‍යාංශ ලේකම්වරියට උපදෙස් ලබා දී තිබේ.

සබැඳි පුවත්
යාලේ දී සතුන්ට වධ දුන් කල්ලියකට නඩු