රේගු නිලධාරින් ඊයේ (15) දිනයේ ආරම්භ කරන ලද “අකුරට වැඩ කිරීමේ“ වෘත්තිය ක්‍රියාමාර්ගය හේතුවෙන් රේගුවට රුපියල් බිලියන තුනක පමණ පාඩුවක් සිදුවී ඇතැයි අනාවරණය වේ.

රේගුවේ ඒකාබද්ධ වෘත්තිය සමිති සන්ධානයේ නිලධාරිහු 950 කට වැඩි පිරිසක් මෙම වෘත්තිය ක්‍රියාමාර්ගයේ නිරත වී සිටිති. සහකාර රේගු අධිකාරිවරු, නියෝජ්‍ය රේගු අධිකාරිවරු, රේගු අධිකාරිවරු, නියෝජ්‍ය රේගු අධ්‍යක්ෂවරු, රේගු අධ්‍යක්ෂවරු මෙම වෘත්තිය ක්‍රියාමාර්ගයට සම්බන්ධ වී සිටිති.

රේගුව විසින් වරායේ බහාලුම් 1500 ත් 2000 ත් අතර බහාලුම් ප්‍රමාණයක් නිෂ්කාශනය කරනු ලැබූවත්, වෘත්තිය ක්‍රියාමාර්ගය හේතුවෙන් ඊයේ (15 වැනිදා) දිනයේ නිෂ්කාශනය කරනු ලැබුවේ බහාලුම් 400 ත් 500 ත් අතර ප්‍රමාණයක් පමණි. මෙම බහාලුම් අතර වැඩි ප්‍රමාණයක් අත්‍යවශ්‍ය ආහාර ද්‍රව්‍ය, ඖෂධ ආදිය වේ.

ඉකුත් 2020 වසරේ පෙබරවාරි මස 13 වැනිදා සිට නැවතී තිබෙන උසස්වීම් පටිපාටිය නැවත ක්‍රියාත්මක කිරීම, සියයට 50 ක්ව පවතින රේගු නිලධාරින්ගේ හිඟය පියවීමට කඩිනමින් බඳවා ගැනීමේ ක්‍රමවේදයක් සකස් කිරීම, අනීතිකව බඳවාගෙන සිටින “සංවර්ධන නිලධාරින්“ 13 දෙනා වහාම ඉවත් කර ඔවුන් මීට පෙර සේවය කළ දෙපාර්තමේන්තු වෙත යොමු කිරීම, දැනට අකාර්යක්ෂම ලෙස කටයුතු කරන මානව සම්පත් අංශයේ ප්‍රධානියා එම කටයුතුවලින් ඉවත් කිරීම සහ රේගු නිලධාරින්ගේ අතිකාල සහ ත්‍යාග මුදල් ගෙවීම සඳහා රේගු අධ්‍යක්ෂ ජනරාල් යටතේ පවතින “විශේෂ” ගිණුම මහා භාණ්ඩාගාරයට පවරා ගැනීම යන ඉල්ලීම් මුල්කරගනිමින් රේගු නිලධාරින් විසින් ඊයේ (15 වැනිදා) පෙරවරු 9 සිට අකුරට වැඩ කිරීමේ වෘත්තිය ක්‍රියාමාර්ග ආරම්භ කළේය.

මෙම වෘත්තිය ක්‍රියාමාර්ගය සම්බන්ධයෙන් රේගු නිලධාරින්ගේ සංගමයේ සභාපති අමිල සංජීවගෙන් කරන ලද විමසීමකදී කියා සිටියේ මුදල් අමාත්‍යාංශයේ අතිරේක ලේකම්වරිය හමුවී ඇයට සිය ඉල්ලීම් ඊයේ (15) දිනයේදී ඉදිරිපත් කිරීමට කටයුතු කළ බවය. 

ඒ අනුව, එම ඉල්ලීම් සම්බන්ධව මහා භාණ්ඩාගාරයේදී ඊයේ සවස සාකච්ඡාවක් පැවැත්වීමට නියමිතව පැවැති බවද ඔහු කීවේය. 

සිය ඉල්ලීම්වලට පිළිගත හැකි විසඳුමක් ලැබෙනතුරු අකුරට වැඩ කිරීමේ වෘත්තිය ක්‍රියාමාර්ගය අඛණ්ඩව සිදුකරන බවද සභාපතිවරයා පැවසුවේය.

රටේ ආර්ථිකයට සහ මහජනතාවට සිදුවන පීඩා අවම කිරීම සඳහා මහජනතාවට ඝෘජුව සේවා සපයන ස්ථානවල අකුරට වැඩ කිරීමේ වෘත්තිය සමිති ක්‍රියාමාර්ගය ක්‍රියාත්මක නොකරන බවත්, ඒ අනුව ගුවන් තොටුපොළ, තැපෑල, විදෙස් රටවලින් ගුවන් භාණ්ඩ එවා බෙදාහරින ස්ථානවල වෘත්තිය සමිති ක්‍රියාමාර්ගය ක්‍රියාත්මක නොකරන බවත් ඔහු කියා සිටියේය.

එමෙන්ම, භාණ්ඩ අපනයන අංශය තුළද මෙම වෘත්තිය සමිති ක්‍රියාමාර්ගය ක්‍රියාත්මක නොකරන බවද ඔහු කීවේය.

කෙසේ නමුත්, රේගු නිලධාරීන් විසින් අරඹා තිබූ මෙම වෘත්තීය සමිති ක්‍රියාමාර්ගය හේතුවෙන් බහාලුම් නිෂ්කාශන කටයුතුවලට දැඩි බලපෑමක් එල්ල වී තිබිණි. 

දිනකට රේගු නිලධාරින් බහාලුම් 1500 ත් 2000 ත් අතර සංඛ්‍යාවක් නිෂ්කාශනය කරන්නේය. නමුත්, ඊයේ දිනයේදී නිදහස් කරනු ලැබුවේ එම බහාලුම්වලින් පහෙන් එකක් වැනි ප්‍රමාණයක් පමණි.

අර්තාපල්, ළූනු, ඖෂධ සහිත බහාලුම් බාධාවකින් තොරව නිදහස් කිරීමට කටයුතු කළ බවද රේගු වෘත්තිය සමිති නියෝජිතයෝ කියා සිටිති.

මෙම වෘත්තිය ක්‍රියාමාර්ගය පිළිබඳව රේගු මාධ්‍ය ප්‍රකාශක, ජ්‍යෙෂ්ඨ රේගු අධ්‍යක්ෂ සීවලී අරුක්ගොඩගෙන් විමසීමේදී කියා සිටියේ කටුනායක ගුවන් තොටුපොළ මගී නිශ්කාශන කටයුතු සඳහා මෙම වෘත්තිය ක්‍රියාමාර්ගය බලපෑමක් ඇති කර නොමැති බවය.

මූලාශ්‍රය – අරුණ