පුවත්
විදේශ කටයුතු නියෝජ්‍ය අමාත්‍යවරයා 6වැනි චීන-දකුණු ආසියානු සහයෝගිතා සංසදය අමතයි
2025 ජුනි 18 වැනි දින සිට 21 වැනි දා දක්වා චීනයේ යුනාන් පළාතේ කුන්මිංහි පැවති නවවැනි (9) චීන-දකුණු ආසියානු ප්‍රදර්ශන සම්මේලනයට සහ හයවැනි (06) චීන-දකුණු ආසියානු සහයෝගිතා සංසදයට විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර සහභාගී විය. මෙම වසරේ ප්‍රදර්ශනය ශ්‍රී ලංකාවට විශේෂයෙන්ම වැදගත් වන්නේ ශ්‍රී ලංකාව මෙම ප්‍රදර්ශන සම්මේලනයේ තේමා රාජ්‍යය ලෙස තෝරාගෙන තිබූ නිසාය.
හයවැනි (6) චීන-දකුණු ආසියානු සහයෝගිතා සංසදයේ සමාරම්භක උත්සවය අමතමින් නියෝජ්‍ය අමාත්‍ය හේමචන්ද්‍ර මහතා, දකුණු ආසියාව සඳහා තීරණාත්මක සාධකයක් වන කලාපීය සහයෝගිතාව සහ සාමූහික සංවර්ධනයේ වැදගත්කම මෙන්ම කලාපයේ ජනවිකාස ශක්තිය හා උපායමාර්ගික පිහිටීම, වර්ධනය වන ගෝලීය වෙළඳාම සහ සංස්කෘතික හා බුද්ධිමය වටිනාකම්වල වැදගත්කම අවධාරණය කළේය. ශ්‍රී ලංකාවේ යටිතල පහසුකම්, තාක්ෂණය, හරිත බලශක්තිය, කෘෂිකර්මාන්තය, සංචාරක ව්‍යාපාරය සහ නිෂ්පාදනය ඇතුළු ප්‍රධාන ක්ෂේත්‍රවල අවස්ථා ගවේෂණය කරන ලෙස ඔහු චීනයේ සහ දකුණු ආසියාවේ ආයෝජකයින්ට සහ හවුල්කරුවන්ට ආරාධනා කළේය.
2025 ජුනි 20 වැනි දින, නියෝජ්‍ය අමාත්‍යවරයා යුනාන් පළාතේ උප ආණ්ඩුකාරවරයා සමඟ ද්විපාර්ශ්වික සාකච්ඡා පැවැත්වූ අතර, එහිදී සැකසූ ආහාර, ඇඟලුම්, කෘෂිකර්මාන්තය සහ සංචාරක ව්‍යාපාරය වැනි ක්ෂේත්‍රවල අනාගත සහයෝගීතාව පිළිබඳව සාකච්ඡා කළේය. විසිතුරු මල් වගාකිරීමේ සහ සැකසීමේ ක්ෂේත්‍රය තුළ ‘වෘක්ෂලතා සහ සත්ත්ව විශේෂ සඳහා රාජධානිය’ ලෙස ගෝලීය වශයෙන් පිළිගැනෙන යුනාන් පළාතේ එම ක්ෂේත්‍රයේ විශේෂඥතාව සම්බන්ධයෙන් අත්දැකීම් ලබාගැනීමට ඇති අවස්ථා ඇතුළුව, අවශ්‍ය තාක්ෂණික සහය සහ දැනුම හුවමාරු කරගැනීම සඳහා ශ්‍රී ලාංකික ව්‍යවසායකයින් දක්වන උනන්දුවද ඔහු ප්‍රකාශ කළේය.
2025 ජුනි 19 වැනි දින කුන්මින් ඩියැන්චි ජාත්‍යන්තර සම්මේලන සහ ප්‍රදර්ශන මධ්‍යස්ථානයේදී, වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ විසින් ශ්‍රී ලංකා ප්‍රදර්ශන කුටිය නිල වශයෙන් විවෘත කරන ලදී. අමාත්‍ය සමරසිංහ සමාරම්භක උත්සවයේ ප්‍රධාන දේශනය ද පැවැත්වීය.
ප්‍රදර්ශන සම්මේලනයේ ශ්‍රී ලංකාවේ නියෝජනය තුලින් ශ්‍රී ලංකාවේ ආර්ථික ශක්තීන් සහ සංස්කෘතික උරුමයන් පිළිබඳ විචිත්‍රවත් නිරූපණයක් පිළිබිඹු විය. මැණික් හා ස්වර්ණාභරණ, ලංකා තේ, පොල් ආශ්‍රිත නිෂ්පාදන සහ කෙඳි, කුළුබඩු, කාබනික සහ සුවතා නිෂ්පාදන, අත්කම්, බතික්, රසකැවිලි සහ සැකසූ ආහාර ඇතුළු අගයෙන් ඉහළ අපනයන සහ සේවාවන් රාශියක් එහිදී ප්‍රදර්ශනය කෙරිණි. වෙළඳ සබඳතා ශක්තිමත් කිරීම, අපනයන හැකියාවන් වැඩි දියුණු කිරීම සහ චීනයේ සහ දකුණු ආසියාවේ ශ්‍රී ලාංකික ව්‍යාපාර සඳහා වෙළඳපොළ ප්‍රවේශය ඉහළ නැංවීම එම ප්‍රදර්ශන සම්මේලනය සඳහා ශ්‍රී ලංකාව සහභාගී වීමේ අරමුණ විය.
