ප්‍රසිද්ධ පාසලක 9 වන ශ්‍රේණියේ අධ්‍යාපනය ලබන 14 හැවිරිදි පාසල් සිසුවියක කලක සිට වරින් වර රංචු ගැසී දූෂණය කිරීමේ සිද්ධියක් සම්බන්ධයෙන් සැකපිට අත්අඩංගුවට ගෙන අධිකරණය හමුවට ඉදිරිපත් කළ කරණවෑමියකු සහ තවත් සැකකරුවකු මේ මස 28 වැනිදා දක්වා රිමාන්ඩ් කරන ලෙස අනුරාධපුර ප්‍රධාන මහෙස්ත්‍රාත් නියෝග කළේය.

මෙසේ රිමාන්ඩ් භාරයට පත් කළේ අනුරාධපුර යාපන හන්දියේ පදිංචි කරණවෑමියකු සහ අනුරාධපුර මිහින්තලේ පාරේ පදිංචි පුද්ගලයෙකි.

සැකකරුවන් අධිකරණයට ඉදිරිපත් කරමින් අනුරාධපුර මූලස්ථාන පොලිසියේ ළමා හා කාන්තා කාර්යංශයේ උප පොලිස් පරික්ෂක ඒ. සී. දයානන්ද පැවසුවේ 14 හැවිරිදි බාලවයස්කාර පාසල් සිසුවියක පුද්ගලයන් පිරිසක් වරින් වර දූෂණය කරන බවට ලද තොරතුරකට අනුව වින්දිත දැරිය පොලිස් භාරයට ගෙන ඇයගෙන් ලබා ගත් ප්‍රකාශ ඔස්සේ මෙම සැකකරුවන් දෙදෙනා අත්අඩංගුවට ගත් බවයි.

පළමු සැකකරුට අයත් වෙළෙදසලක් තුළදී සැකකරුවන් මෙම අපරාධය සිදු කර ඇති බව පොලිස් විමර්ශනවලදී හෙළිවී ඇත. 

දැරිය දූෂණය කර ඇති තවත් සැකකරුවන් 11 දෙනකු අත්අඩංගුවට ගැනීමට සිටින බවත් ඔවුන් අත්අඩංගුවට ගැනීමට පොලිස් කණ්ඩායමක් මෙහෙයුම් අරඹා ඇති බවත් පොලිසිය අධිකරණයට දැන්වීය. 

දැරිය පොලිසියට ලබා දී ඇති ප්‍රකාශයේ සඳහන් වන්නේ සැකකරුවන් අතර එක්තරා පොලිස් ස්ථානයක ළමා හා කාන්තා කාර්යංශයේ සේවය කරන උප පොලිස් පරික්ෂකවරියකගේ 70 හැවිරිදි පියකු ද සිටින බවයි.