ශ්‍රී ලංකාවේ චීන තානාපති – චී ජන්හොංග් මහතා විසින් රුපියල් මිලියන 2 ක් වටිනා ඖෂධ පරිත්‍යාගයක් ඊයේ (14) රිජ්වේ ආර්යා ළමා රෝහලට (LRH) භාර දෙන ලදී.

චීනය විසින් මෙරටට පරිත්‍යාග කළ මහල් 9 කින් යුත් එම රෝහලේ ප්‍රධාන ගොඩනැගිල්ල නිරීක්ෂණය කළ තානාපතිවරයා, චීනය විසින් පරිත්‍යාග කරන MRI ස්කෑනර් යන්ත්‍රයද පරීක්ෂා කර තිබේ.

මීට අමතරව තවත් රුපියල් මිලියන 3.2 ක ඖෂධ ප්‍රමාණයක් උතුර සහ දකුණු කොළඹ ශික්ෂණ රෝහල් වෙත පරිත්‍යාග කිරීමටද චීන තානාපතිවරයා කටයුතු කර තිබේ.

යුවාන් 100,000 ක මුළු වටිනාකමකින් යුත් මෙම පරිත්‍යාගයන් ශ්‍රී ලංකා – චීන සංගමය සමඟ එක්ව සාමය සහ සංවර්ධනය සඳහා වන චීන මිත්‍රත්ව පදනම විසින් සිදු කරන ලදී. ශ්‍රී ලංකා චීන සංගමයේ සභාපති ජිනිත් ද සිල්වා මහතා සහ රිජ්වේ ආර්යා ළමා රෝහලේ අධ්‍යක්ෂ – වෛද්‍ය ජී. විජේසූරිය මහතා මෙම අවස්ථාවට එක්ව තිබුණි.

මෙම අවස්ථාව අමතමින් චීන තානාපතිවරයා ප්‍රකාශ කළේ, “මීට වසර 65කට පෙර දෙරට අතර රාජ්‍යතාන්ත්‍රික සබඳතා ආරම්භ වූ දින පටන්, චීනය හා ශ්‍රී ලංකාව මෙන්ම එහි ජනතාවද සෑම විටම එකිනෙකා සමග අවබෝධයෙන් සහ සහයෝගයෙන් කටයුතු කර ඇති බවයි.

ඉහත පරිත්‍යාගය සම්බන්ධයෙන් තමා ඉතා ගෞරවයටත් හා සතුටට පත්වෙන බවත් ඔහු මෙහිදී පැවසීය.

දිවයින පුරා රෝහල් සහ රෝගීන් වෙත ලබාදීම සඳහා ඉදිරි මාසවලදී රු. බිලියන 5 ක මුළු වටිනාකමකින් යුත් තවත් වෛද්‍ය සැපයුම් ශ්‍රී ලංකාවට භාර දීමට කටයුතු කරන බවද තානාපතිවරයා සඳහන් කළේය.

එපමණක් නොව, චීනයෙන් මෙතෙක් ලබාදෙන විශාලතම චීන ආධාර ව්‍යාපෘතිය වන, දිනකට රෝගීන් 6,000කට ප්‍රතිකාර කළ හැකියාවක් ලබාදෙන, කොළඹ ජාතික රෝහලේ නව රෝහල් බාහිර රෝගී මධ්‍යස්ථානයද නුදුරේදීම විවෘත වනු ඇති බවත් ඔහු වැඩිදුරටත් පැවසීය.