ජනාධිපති අනුර කුමාර දිසානායක මහතාගේ ප්‍රධානත්වයෙන් අද (04) පෙරවරුවේ ආරම්භ කරන ලද “FACETS Sri Lanka 2025” අන්තර්ජාතික මැණික් හා ස්වර්ණාභරණ ප්‍රදර්ශණයේ සමාරම්භක උත්සවය දුර්වල සංවිධාන කටයුතු හේතුවෙන් කැඳහැළියක් වී තිබිණි.

මීට පෙර අවස්ථාවලට වඩා විශාල ආරක්ෂක රැකවල් මධ්‍යයේ අද (04) සිනමන් ග්‍රෑන්ඩ් හෝටලයේ පැවැති සමාරම්භක උත්සවය ආවරණය කිරීමට මාධ්‍යවේදීන්ට අමාත්‍යංශ කිහිපයකින් ආරාධනා ලැබී තිබුණද, ඔවුන්ගේ නම් හා ජාතික හැඳුනුම්පත් අංක ආරක්ෂක අංශ වෙත ලැබී නොතිබීම නිසා මාධ්‍යවේදීන් මෙන්ම ආරක්ෂක අංශ සාමාජිකයන්ද දැඩි අපහසුතාවයට පත්ව විය.

එසේම, මාධ්‍යවේදීන්ට ආරාධනා කර තිබුණද සමාරම්භක උළෙලේ මාධ්‍ය වෙනුවෙන් සංවිධායකයින් පුටුවක් හෝ වෙන්කර නොතිබීම නිසා ඇතැම් මාධ්‍යවේදීන් එය ආවරණය නොකර ජනපතිවරයා පැමිණිමට ද පෙර ඉන් පිටව ගියේය.

මැණික් හා ස්වර්ණාභරණ ප්‍රදර්ශණය, ජාතික මැණික් හා ස්වර්ණාභරණ අධිකාරිය, අපනයන සංවර්ධන මණ්ඩලය (EDB) හා ශ්‍රී ලංකා මැණික් හා ස්වර්ණාභරණ සංගමය (SLGJA) එක්ව සංවිධානය කරනු ලබන අතර එය ලබන 6 වැනිදා දක්වා සිනමන් ග්‍රෑන්ඩ් හෝටලයේ පැවැත්වේ.

මේ අවස්ථාවට කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හදුන්නෙත්ති සහ විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, කර්මාන්ත සහ ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ යන මහත්වරු, තානාපතිවරු ඇතුළු ආරාධිත පිරිසක් එක්වූ බව ජනාධිපති මාධ්‍ය අංශය නිවේදනය කරයි.

ආසියාවේ ප්‍රමුඛතම මැණික් හා ස්වර්ණාභරණ ප්‍රදර්ශනය වන FACETS Sri Lanka මෙවර පැවැත්වෙන්නේ 31 වන වරට වන අතර චීනය, ඉන්දියාව, එක්සත් ජනපදය, යුරෝපය සහ තවත් බොහෝ රටවල නියෝජිතයින් ඊට එක්වී සිටින බවද එහි දැක්වේ.

මෙම කර්මාන්තයේ ප්‍රමුඛයන්ගේ ප්‍රධාන අරමුණක් වන්නේ ලොව පුරා වෙළෙඳුන්, අපනයනකරුවන් සහ තවත් බොහෝ අය සමඟ ව්‍යාපාරික අවස්ථා නිර්මාණය කිරීම බවත්, “FACETS Sri Lanka 2025” ප්‍රදර්ශනය  මඟින් අපනයනයෙන් එක්සත් ජනපද ඩොලර්  බිලියන 1කට වඩා වැඩි ප්‍රමාණයක් ලබා ගැනීම අපේක්ෂාව බවද නිවේදනයේ වැඩිදුරටත් දැක්වේ.

ඡායාරූප – ජනාධිපති මාධ්‍ය අංශය

සබැඳි පුවත්:

ලංකාවේ ලොකුම මැණික් ප්‍රදර්ශනයට සංචාරක බලධාරීන්ගෙන් කිසි සහයක් නෑ!