එක්සත් ජනපද ඉන්දු-පැසිෆික් විධානයේ (INDOPACOM) අණදෙන නිලධාරි අද්මිරාල් සැමුවෙල් ජේ. පපාරෝ මහතා මාර්තු 19-21 දිනවල කොළඹට පැමිණෙන බව මෙරට එක්සත් ජනපද තානාපති කාර්යාලය නිවේදනය කරයි.   

ඔහුගේ සංචාරය අතරතුර, අද්මිරාල් පපාරෝ, ශ්‍රී ලංකා රජයේ ජ්‍යෙෂ්ඨ නිලධාරීන් සහ හමුදා නායකයින් සමඟ සම්බන්ධ වී ඉන්දු-පැසිෆික් කලාපයේ දිගුකාලීනව පවතින එක්සත් ජනපද-ශ්‍රී ලංකා ආරක්ෂක හවුල්කාරිත්වය නැවත තහවුරු කිරීමටත්, ඉන්දු-පැසිෆික් කලාපීය ස්ථාවරත්වය සහ ආරක්ෂාව සඳහා වන එක්සත් ජනපද දැක්ම බෙදා ගැනීමටත් කටයුතු කරනු ඇතැයි ද එක්සත් ජනපද තානාපති කාර්යාලය පවසයි.

පපාරෝ අණදෙන නිලධාරි තුමාගේ සංචාරය, ශ්‍රී ලංකාව සමඟ ඇති ආරක්ෂක සහයෝගීතාව වැඩි දියුණු කිරීමට සහ ඉන්දු-පැසිෆික් කලාපයේ පොදු අභියෝගවලට මුහුණ දීම සඳහා වන එක්සත් ජනපදයේ අඛණ්ඩ කැපවීම අවධාරණය කරන බවද තානාපති කාර්යාලය පෙන්වා දෙයි.

පෙන්සිල්වේනියාවේ මෝර්ටන් හි උපත උපත ලැබූ අද්මිරාල් සෑම් පපාරෝ, විලනෝවා විශ්ව විද්‍යාලයෙන් උපාධිය ලබා 1987 දී අධිකාරලත් නිළයකට පත් විය. ඔහු හිටපු මැරීන් නාවික හමුදා සෙබලෙකුගේ පුත්‍රයා වන අතර දෙවන ලෝක යුද්ධයට බඳවා ගත් නාවිකයෙකුගේ මුනුපුරා ද වේ.  

ඔහු ඕල්ඩ් ඩොමීනියන් විශ්ව විද්‍යාලයෙන් (Old Dominion University) ජාත්‍යන්තර අධ්‍යයනය පිළිබඳ ශාස්ත්‍රපති උපාධියක් සහ නාවික පශ්චාත් උපාධි පාසලෙන් පද්ධති විශ්ලේෂණය පිළිබඳ ශාස්ත්‍රපති උපාධියක් ලබා ඇත.  එක්සත් ජනපද නාවික ගුවන් නියමුවෙකු වන ඔහු TOPGUN පාඨමාලාවේ උපාධිධාරියෙකු වන අතර, F-14, F-15 සහ F/A-18 යානාවන්හි පැය 6,000 කට අධික පියාසර කාලයක් සමග වාහක මත ගොඩබෑම් 1,100 ද සිදු කර තිබේ.

මුහුදු මෙහෙයුම් අණදෙන චාරිකා අතරට ජපානයේ යොකොසුකා හි ඉදිරි පෙළ නාවික බළකායේ ස්ට්‍රයික් ෆයිටර් බලඝණයේ  (VFA )195 ට අනුයුක්තව කටයුතු කිරීම, Kitty Hawk Strike Group වෙත අනුයුක්තව: අණ  දෙන නිලධාරි, Carrier Air Wing 7, Dwight D. Eisenhower Strike Group හි කටයුතු කිරීම  සහ Carrier Strike Group Ten හි අණදෙන නිලධාරියා ලෙස කටයුතු කිරීම  ඇතුළත්  වේ.   ගොඩ බිමේදී ඔහු 3 වන බලසේනාව, 10 වන කඳුකර සේනාංකය සහ 173 වන ගුවන් විහිදුම් බළකාය සමඟ ඇෆ්ගනිස්ථානයේ නුරිස්තාන් පළාතේ පළාත් ප්‍රතිසංස්කරණ කණ්ඩායමට අණ දුන්නේය.  මුහුදේ අනෙකුත් මෙහෙයුම් කටයුතු වලට අදාළව,  සංග්‍රාමික බළකා  (VF) 14 යටතේ ,USS John F. Kennedy සහ USS Dwight D. Eisenhower Strike Groups සහ VFA-15 සමඟ F-14 Tomcat යානා පියාසර කරවීම,USS Theodore Roosevelt සහ USS Enterprise Strike Group සමග F/A-18 Hornet යානා  පියාසර කරවීම ඔහු විසින් සිදු කොට ඇත.  තවද ඔහු සෞදි අරාබිය සහ අයිස්ලන්තයේ කෙෆ්ලාවික් වෙත අනුයුක්තව 71 වැනි ප්‍රහාරක බලඝණය සමඟ F-15C ඊගල් යානා පියාසර කරවමින් එක්සත් ජනපද ගුවන් හමුදාව සමඟ හුවමාරු සේවා පදනම යටතේ රාජකාරිද සිදු  කළේය.  ඒකාබද්ධ මෙහෙයුම් සේවයේ දී, ඔහු කටාර් Al Udeid හි ඒකාබද්ධ ගුවන් හා අභ්‍යවකාශ මෙහෙයුම් මධ්‍යස්ථානයේ සංග්‍රාමික අධ්‍යක්ෂවරයා විය.

වෙරළාරක්ෂක කටයුතුවලදී ඔහු නාවික ගුවන් හමුදා අණදෙන නිලධාරී කාර්යාලයේ F/A-18 යානා පුහුණු කිරීමේ, සුදානම් කිරීමේ සහ අදාළ අවශ්‍යතා සදහා වූ කාර්ය මණ්ඩල නිලධාරියෙකු ලෙස කටයුතු කළේය.  ඔහු VFA-106 හි අණදෙන නිලධාරියා ලෙස සේවය කළ අතර නාවික මෙහෙයුම් ප්‍රධානියාගේ කාර්ය මණ්ඩලයේ OPNAV N80 ශාඛා ප්‍රධානියා ලෙසද සේවය කළේය.  ඔහු විධායක සහකාර ලෙස එක්සත් ජනපද නාවික බළ ඇණියේ අණදෙන නිලධාරිවරයාටද, ඉන් අනතුරුව 31 වන නාවික මෙහෙයුම් ප්‍රධානියාටද සේවය කළේය. 

ඔහු එක්සත් ජනපද මධ්‍යම විධානයේ J3 හි මෙහෙයුම් අධ්‍යක්ෂවරයාද විය. ඔහු එක්සත් ජනපද නාවික හමුදා මධ්‍යම විධානයේ /එක්සත් ජනපද 5 වැනි බළ ඇණියේ /ඒකාබද්ධ සමුද්‍රීය බළකායේ අණදෙන නිලධාරිවරයා වශයෙන්ද කටයුතු කළේය.   ඔහු මෑත කාලීනව ලැබූ නවතම පත්වීම වනුයේ 2021 මැයි සිට 2024 අප්‍රේල් දක්වා එක්සත් ජනපද පැසිෆික් බළකායේ අණදෙන නිලධාරිවරයා ලෙස කටයුතු කිරීමයි.

පපාරෝ මහතා 2024 මැයි මාසයේදී එක්සත් ජනපද ඉන්දු-පැසිෆික් බළකායේ අණදෙන නිලධාරියා ලෙස රාජකාරි භාර ගත්තේය.  ඔහු ජාතියේ පැරණිතම සහ විශාලතම සටන් විධානයේ 27 වන අණදෙන නිලධාරියා වේ.  USINDOPACOM බළකායට සොල්දාදුවන්, නාවිකයින්, නාවික භටයන් (Marines), ගුවන් භටයින්, ආරක්ෂකයින්, වෙරළාරක්ෂකයින් සහ ආරක්ෂක දෙපාර්තමේන්තුවේ සිවිල් වැසියන්ද ඇතුළු 380,000 ක්  ඇතුළත් වන අතර  ජාතීන් 36 ක් සහ වේලා කලාප 14 ක් සහිත ලෝක ජනගහනයෙන් සියයට 60 ක් ආවරණය වන පරිදි ඉන්දු-පැසිෆික් කලාපයේ සියලුම එක්සත් ජනපද හමුදා ක්‍රියාකාරකම් සඳහා  වගකීම දරනු ලබයි.

වැඩතහනමට ලක්වූ හිටපු පොලිස්පති දේශබන්දු තෙන්නකොන් මහතාගේ නමට කිසිදු දේපළක් හෝ ඉඩමක් ලියාපදිංචි කර නැතැයි, නීතිපති අතිරේක සොලිස්ටර් ජනරාල් දිලීප පීරිස් මහතා මාතර මහේස්ත්‍රාත් අධිකරණයට දැනුම්දුන්නේය.

ඒ මාතර, වැලිගම ප්‍රදේශයේ පිහිටි ”W 15” හෝටලය ආසන්නයේ සිදුවූ වෙඩිතැබීමේ සිද්ධිය සම්බන්ධයෙන් තෙන්නකෝන් මහතා ඇතුළු පොලිස් නිලධාරීන් 8 දෙනෙකු අත්අඩංගුවට ගන්නැයි මාතර මහේස්ත්‍රාත් අධිකරණය පසුගිය පෙබරවාරි 28 වැනිදා නිකුත් කළ නියෝගයට අදාළ නඩුවට ජනාධිපති නීතීඥ ශානක රණසිංහ මහතා හරහා දිරිපත් කර තිබූ මොසමක් සලකා බැලූ අවස්ථාවේදී මාතර මහේත්‍රාත් අරුණ බුද්ධදාස මහතා ඉදිරියේදීය.
එහිදී, “ස්වාමීනි, මෙයොගේ නමට ලියාපදිංචි කිසිම වාහනයක්, ඉඩමක් නැහැ, 2021 සිට කිසිදු ඡන්ද නාමලේඛනයක සැකකරුගේ නමක් නැහැ, සංවිධානාත්මක අපරාධකරුවන් වන හරක් කටා, මධුෂ් වගේ අයගේත් දේපළ සොයාගන්න පුළුවන් වුණා, නමුත් මේ පුද්ගලයාගේ කිසිවක් නැහැ” යැයිද පීරිස් මහතා අධිකරණයට දැන්වීය.

“ස්වාමීනි, මොහු අභිරහස් පුද්ගලයෙක්, මොහු අදෘශ්‍යමාන ගෝස්ට් කෙනෙක් වගේ පුද්ගලයෙක් යැයිද, රටේ ධනය විනාශ කරමින් ප්‍රභාකරන් සෙව්වන්දි අල්ලනවා වගේ මොහුවත් සොයන්න වුණා” යැයිද පීරිස් මහතා අධිකරණයට කීය.

අධිකරණය මඟහැර දින 20ක් සැඟව සිටීමට සහය වූ පිරිස්වලට එරෙහිව නීතිමය පියවර ගන්නා බවද 

නීතිපති අතිරේක සොලිස්ටර් ජනරාල් දිලීප පීරිස් මහතා අධිකරණයට දැන්වීය.
අදාළ නීතී කෘත්‍ය ආරම්භකරමින් නීතිපති අතිරේක සොලිස්ටර් ජනරාල් දිලීප පීරිස් මහතා කියා සිටියේ විවිධ උපක්‍රම, උප්පරවැට්ටි මහ යටික්ට්ටු ක්‍රියා කරමින් දේශබන්දු තෙන්නකෝන් මහතා සිදු කළ රංගනයේ අවසානය අදබවයි.

පීරිස් මහතා වැඩිදුරටත් අධිකරණයට දන්වා සිටියේ තමා අධිකරණයට ආවේ විවෘත වරෙන්තුකරුවකු ටයි කෝට් ඇඳගෙන බෙන්ස් රථයක් ඇතුළු වාහන පිරිවරාගෙන අධිකරණ පරිශ්‍රයට පැමිණ වාඩි වෙලා ඉන්නව කියන දැනුවත් කිරීම මත බවයි.

අදාළ මෝසම, ගැන නීතිපතිපාර්ශවයට දැනුම්දීමක් නොකළ බවත්, හොර පූසාවගේ උසාවියට ඇවිත් පාළු ගෙයි වළං බිඳලා ඇපත්අරගෙන යන්න හිතාගෙන ඉන්න ඇතැයිද පීරිස් මහතා අධිකරණයේදී ප්‍රකාශ කළේය.

විවෘත වරෙන්තුකරුවකු සිටිය යුත්තේ කූඩුවට වෙලා බවත්, ඔහුට අධිකරණ ශාලාවේ වාඩිවී සිටීමට අවස්ථාව ලබාදීමට තරම් අධිකරණය කාරුණික වී ඇතැයි ද පීරිස් මහතා එහිදී සඳහන් කළළේය.

ස්වාමිනි, මොහු මේ ඇවිල්ල ඉන්නේ අදාළ හෝටලයේ සිද්ධියට නෙවෙයි..තමන්ගේ කර්මය සම්බන්ධ නඩුවකට, මේක ස්වාමිනි දිට්ඨ ධම්ම වේදනීය කර්මය සම්බන්ධ නඩුවක් යැයිද පීරිස් මහතා අධිකරණයට දැන්වීය.

අද දේශබන්දු තෙන්නකෝන් නීතීඥවරු විශාල පිරිසක් සමඟ ඇවිත් සිටියද, ඔහු මීට පෙර පාතාලය මැඬපවත්වන්න බැරි නීතීඥවරු හා පාතාලය සමඟ පවතින සම්බන්ධ නිසා යැයිද කි බවත්, අද ඔහුට නීතීඥවරුන්ගේ සහය ගන්නට වී ඇතැයි ද කීය.
මේ සම්බන්ධයෙන් නීතීඥවරු 30ක පමණ පිරිසක් මගින් අධිකරණයට බාර වූ දේශබන්දු තෙන්නකෝන් මහතා වෙනුවෙන් පෙනී සිටි නීතීඥයින් කියා සිටියේ දේශබන්දු සැඟවී නොසිටි බවත්, ඔහු අධිකරණයේ පිහිට පැතූ බවයි.
ඔහුට, පාතාල අපරාධකරුවන්ගේ තර්ජන ඇති බවත්, ඕනෑම ඇප කොන්දේසියක් මත ඔහුට අප ලබාදෙන්නැයිද 

තෙන්නකෝන් මහතා වෙනුවෙන් පෙනී සිටි නීතීඥයි අධිකරණයෙන් ඉල්ලා සිටියේය.

වෘත්තීය සමිතිවල ඉල්ලීමක් හෝ බලකිරීමක් නොමැතිව ඉතිහාසයේ රජයක් විසින් ලබාදුන් වැඩිම වැටුප් වැඩිකිරීම සිදු කර තිබියෙදී සෞඛ්‍ය වෘත්තිකයන්ගේ වැඩවර්ජන අනුමත කළ නොහැකි බව ජනාධිපති අනුර කුමාර දිසානායක මහතා ප්‍රකාශ කළේය.

ජනාධිපති අනුර කුමාර දිසානායක මහතා මේ බව කියා සිටියේ රාජ්‍ය සේවා එක්සත් හෙද සංගමය සමඟ අද (19) ජනාධිපති කාර්යාලයේ දී පැවති හමුවේදීය.

රජයේ වියදම් සීමා තුළ සිටින ආර්ථිකයක වුවද රාජ්‍ය සේවය කාර්යක්ෂමව යොදා ගැනීම, කුසලතා සහිත පිරිස් ආකර්ෂණය කර ගැනීම හා රාජ්‍ය සේවය දිරිගැන්වීම පිණිස මෙවර අයවැයෙන් රාජ්‍ය සේවක මූලික වැටුප් වැඩිකිරීම කෙරෙහි රජයේ අවධානය යොමු වූ බව ජනාධිපතිවරයා පෙන්වා දුන්නේය.

මෙවර අයවැයෙන් ආකාර 06ක් යටතේ වැටුප් ඉහළ නංවා ඇති බව ප්‍රකාශ කළ ජනාධිපතිවරයා,   මූලික වැටුප අවම වශයෙන් රු.15,000කින් වැඩිකිරීම, අතිකාල දීමනා වැඩිකිරීම, නිවාඩු දින දීමනා වැඩිකිරීම, වැටුප් වර්ධක 80%කින් වැඩිකිරීම, වැඩිකළ සමස්ත වැටුපට අනුරූපීව මේ වසරේ සිටම විශ්‍රාම වැටුප් තලය ඉහළ දැමීම සහ උපයන විට බදු ගෙවීම් සීමාව ඉහළ දැමීම සිදු කර ඇති බවද කියා සිටියේය.

මෙම වැටුප් වැඩිවීම රාජ්‍ය සේවයේ විශාල පිරිසකයේ පැසසුමට ලක්වන බවත් ඒ පිළිබඳ නව රජයේ උනන්දුව අගය කරන බවත් ජනාධිපතිවරයාට පැවසූ රාජ්‍ය සේවා එක්සත් හෙද සංගමයේ නිලධාරීහු, වර්තමානයේ හෙද සේවයේ පවතින ගැටලුද ජනාධිපතිවරයාගේ අවධානය යොමු කරමින් ඒ සඳහා කඩිනම් විසඳුම් ලබාදෙන ලෙසද ඉල්ලා සිටියහ.

කොළඹ විශ්වවිද්‍යාලයේ කුලපති, බස්නාහිර පළාත් ප්‍රධාන සංඝනායක, රාජ්‍ය සේවා එක්සත් හෙද සංගමයේ සභාපති පූජ්‍ය මුරුත්තෙට්ටුවේ ආනන්ද ස්වාමීන් වහන්සේ, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස, ජනාධිපති ලේකම් ආචාර්ය නන්දික සනත් කුමානායක යන මහත්වරු සහ  රාජ්‍ය සේවා එක්සත් හෙද සංගමයේ නිලධාරීහු පිරිසක් මෙම අවස්ථාවට එක්ව සිටියහ.

(ජනාධිපති මාධ්‍ය අංශය)