බිලියන 16ක් වියදම් කර දේශීය ආදායම් දෙපාර්තමේන්තුවට සිංගප්පූරු සමාගමකින් ගත් රැමිස් පද්ධතිය Revenue Administration Management Information System (RAMIS) නිසි අයුරින් ක්‍රියාත්මක නොවීම නිසා ටින් අංකය (බදු ගෙවන්නා හඳුනාගැනීමේ අංකය) ලබාදීම තවත් කල් යනු ඇතැයි වාර්තා වේ.

එය ලබන අප්‍රේල් මස පළමුවැනිදා සිට අනිවාර්ය කිරීමට මීට පෙර ,දේශීය ආදායම් දෙපාර්තමේන්තුව සැලැසුම් කර තිබිවුණ ද වර්තමාන තත්ත්වය මත එය ලබන අගෝස්තු මාසය දක්වා කල්යනු ඇතැයි පැවසේ.

මේ අතර,ඉන්දියානු රජයේ තාක්ෂණික සහාය ලබාගෙන කඩිනමින් ටින් අංකය නිකුත් කිරීමේ වැඩපිළිවෙළක් ආරම්භ කිරීමට නියමිත බවද පැවසේ.

දේශීය ආදායම් දෙපාර්තමේන්තුවේ රැමීස් පද්ධතියේ පවතින දෝෂ තත්ත්වයන් හේතුවෙන් ටින් අංකය ඉල්ලුම්කරන ලද 109,000 කට තවමත් ටින් අංකය නිකුත් කිරීම ප්‍රමාදවී ඇතැයිද අනාවරණය වේ.

මේ වසරේ ජනවාරි මාසයේ සිට ටින් අංකය අනිවාර්ය කිරීමට රජය මුලින්ම සැලැසුම් කර තිබූ අතර එය පසුව පෙබරවාරි මස පළමුවැනිදා සිට ක්‍රියාත්මක කිරීමට සැලැසුම් කර තිබිණි.

කෙසේවුවද, රැමීස් පද්ධතියේ පවතින දෝෂ තත්ත්වයන් හේතුවෙන් ටින් අංකය අනිවාර්ය කිරීම අප්‍රේල් මාසය දක්වා කල් දැමීමට රජය තීරණය කරන ලදි.

මේ අතර,රැමීස් පද්ධතියේ පවතින ගැටලු තත්ත්වය නිසා ඉන්දියානු රජයේ තාක්ෂණික සහයෝගය මත රැමීස් පද්ධතියට පරිබාහිරින් තවත් මෘදුකාංග පද්ධතියක් සවිකර ටින් අංකය කඩිනමින් නිකුත් කිරීමේ වැඩපිළිවෙළක් සකස් කිරීම සම්බන්ධව රජයේ අවධානය යොමුවී ඇතැයි ද පැවසේ.

මෙම කටයුත්ත සඳහා ඉන්දියානු රජය සිය සහයෝගය ලබාදීමටද කැමැත්ත පළකර ඇත.

ඒ අනුව විශාල වියදමක් නොමැතිව මෘදුකාංග පද්ධතියක් සකස් කිරීම සම්බන්ධව මේ දිනවල සාකච්ඡා සිදු කෙරෙන බවද අනාවරණය වේ.

බදු පරිපාලන කටයුතු කාර්යක්ෂම කිරීම සදහා දේශීය ආදායම් දෙපාර්තමේන්තුවට ‘‘රැමීස් පද්ධතිය’’ හඳුන්වා දෙනු ලැබීය.

සබැඳි පුවත්
“රටේ ජනතාවට TIN අංකයක් ලබා දීමට ඇමතිට හෝ කොමසාරිස්ට නීතිමය හැකියාවක් නැහැ” 

රට ගිය අයට ‘TIN’ ගන්න ඕන නෑ 

“TIN අංකය ලබාගත් පමණින් බදු ගෙවන්න බැඳියාවක් නෑ” 

“රටේ ජනතාවට TIN අංකයක් ලබා දීමට ඇමතිට හෝ කොමසාරිස්ට නීතිමය හැකියාවක් නැහැ” 

 TIN  ලියාපදිංචියට විකල්ප මගක් !