අමෙරිකානු ඩොලර් මිලියන දෙකක් වෙනත් පාර්ශ්වයකට හුවමාරු කිරීමට ශ්‍රී ලංකා ක්‍රිකට් ආයතනය උත්සාහ දරමින් සිටින බවට ක්‍රීඩා අමාත්‍ය රොෂාන් රණසිංහ මහතා අද (09) පාර්ලිමේන්තුවේ දී කළ ප්‍රකාශය සම්බන්ධයෙන් ශ්‍රී ලංකා ක්‍රිකට් ආයතනය නිවේදනයක් නිකුත් කර ඇත.
එහි දැක්වෙන්නේ, ශ්‍රී ලංකා ක්‍රිකට් ආයතනයේ ගිණුම්වල ඇති මුදල්, තෙවැනි පාර්ශ්වයකට යැවීමට කිසිදු උත්සාහයක් නොගත් බවයි.
ශ්‍රී ලංකා ක්‍රිකට් ආයතනයට අනුග්‍රාහක ආදායම සහ අනෙකුත් මුදල් ලැබෙන්නේ අමෙරිකානු ඩොලර් වලින් බවත්, විනිමය වෙනස්කම් වල වාසිය ලාබාගැනීමේ අරමුණෙන් එම මුදල් අමෙරිකානු ඩොලර් ගිණුම්වල රඳවා තබන බවත් එම නිවේදනයේ දැක්වේ.
කෙසේවෙතත්, ශ්‍රී ලංකා ක්‍රිකට් ආයතනයේ මෙරට එදිනෙදා කටයුතු පවත්වා ගෙන යෑමට සහ පාර්ශවකරුවන්ට සහ සැපයුම්කරුවන්ට කළයුතු ගෙවීම සඳහා මුදල් අවශ්‍ය බැවින් ඒ සඳහා ඩොලර් ගිණුම්වලින් ශ්‍රී ලංකා රුපියල් වලින් පවත්වාගෙන යනු ලබන ගිණුම් මුදල් හුවමාරු කිරීම සාමාන්‍ය ප්‍රතිපත්තිය බවත් එහි දැක්වේ.
කෙසේවෙතත්, මෙම මුදල් හුවමාරු කිරීම සිදුකරන්නේ මෙහෙයුම් කටයුතු සඳහා පමණක් බවත්, ශ්‍රී ලංකා ක්‍රිකට් ආයතනයේ ගිණුම්වලින් පිටතට මුදල් හුවමාරු කර යැවීමේ උත්සාහයක් ඇති බවට එල්ල වන චෝදනා සාවද්‍ය බවද එම නිවේදනය වැඩිදුරටත් සඳහන් කරයි.
සබැඳි පුවත් :
මැතිසබේ විවාදය අතරතුර SLCය ට යන පාර වහයි
