පසුගියදා පැවති “ජාතික ඵලදායිතා සම්මාන උළෙල” අතරතුරදී කම්කරු සහ රැකී රක්ෂා අමාත්‍ය ගරු මනූෂ නානායක්කාර මහතා විසින් විගණකාධිපතිවරයාගේ කාර්‍යභාරය සහ කෝප් කමිටුවේ බලතල අභියෝගාත්මකව දැඩි විවේචනයට ලක් කිරීම සම්බන්ධයෙන් දැඩි කතාබහක් ඇති වී තිබේ.

ඊයේ (05) පැවති කෝප් කමිටුවේ විශේෂ රැස්වීමකදී ඇමතිවරයාගේ ක්‍රියාකලාපය දැඩි විවේචනයට ලක්ව තිබේ.

ඇමතිවරයා විසින් විගණකාධිපතිවරයාගේ සහ කෝප් කමිටුවේ බලතල අභියෝගාත්මකව දැඩි විවේචනයට ලක් කිරීම පිළිබදව කෝප් කමිටුවට විගණකාධිපතිවරයා විසින්  ලිපියක් මගින් කරුණු දන්වා තිබිණි.

පාර්ලිමේන්තු මන්ත්‍රීවරයෙකු ලෙස මෙන්ම කැබිනට් අමාත්‍යවරයෙකු ලෙස එතුමා උක්ත සදහන් පරිදි ප්‍රකාශ කළද පාර්ලිමේන්තුවේ මූල්‍ය පාලනය ශක්තිමත් කිරීම උදෙසා පාර්ලිමේන්තු ක්‍රමය ඔස්සේ ස්ථාපිත කර ඇති පොදු ව්‍යාපාර පිළිබඳ කාරක සභාව විසින් පාර්ලිමේන්තුවේ ස්ථාවර නියෝග මත තමන්ට ලැබී ඇති බලතල ඉක්මවා කටයුතු කර ඇති බව හෝ එලෙස කටයුතු කිරීම සදහා කිසිදු සහය දැක්වීමක් සිදු කර නොමැති බව විගණකාධිපතිවරයා විසින් ‍කාරක සභාව වෙත පෙන්වාදෙන ලදී.

තවද විගණකාධීපති වෙත ආණ්ඩුක්‍රම ව්‍යවස්ථාව සහ වෙනත් ලිඛිත නීති මගින් පැවරී ඇති කාර්ය සහ කර්තව්‍ය ක්‍රියාත්මක කිරීමේදී සිය වගකීම ඉටුකිරීමට කටයුතු කරන ආකාරය පිළිබදව රාජ්‍ය අංශයේ, මහජන නියෝජිතයන්ගේ සහ පොදු මහජනතාවගේ විශ්වාසය කඩවන ආකාරයට සිදු කරන ප්‍රකාශයන් පාර්ලිමේන්තු මූල්‍ය පාලන අපේක්ෂාවන්ට දැඩි ලෙස හානිකර බවට නිරීක්ෂණය වන බවත් විගණකාධිපතිවරයා විසින් වැඩිදුරටත් පෙන්වා දෙන ලදී.

මේ අනුව කාරක සභාව විසින් මේ පිළිබඳව දීර්ඝ ලෙස  සාකච්ඡා කිරීමෙන් අනතුරුව පහත සදහන් යෝජනා සහ තීරණ ඉදිරිපත් කෙරිණි.

කම්කරු සහ රැකී රක්ෂා අමාත්‍යවරයාගේ ප්‍රකාශය වැරදි පූර්වාදර්ශයක් බවත් එමගින් කෝප් කාරක සභාව හෑල්ලුවට ලක් කිරීම සිදුව ඇති බවත් නිරීක්ෂණය වන බැවින් ඒ පිළිබදව දැඩි අප්‍රසාදය කාරක සභාව විසින් පළ කරන ලදී. ඒ සම්බන්ධයෙන් කාරක සභාව විගණකාධිපතිවරයා ඇතුළු එතුමාගේ කාර්ය මණ්ඩලය වෙත වෙත සිය කනගාටුව පළ කිරීමට තීන්දු කෙරිණ.

මෙම ප්‍රකාශය සම්බන්ධයෙන් ගරු කථානායකවරයාට පැමිණිල්ලක් සිදු කිරීමටද කෝප් කමිටුව තීන්දු කර ඇත.