ඕස්ට්‍රේලියානු කණ්ඩායමේ සුපිරි ආරම්භ පිතිකරු ඩේවිඩ් වෝනර් පළඳින ටෙස්ට් කැප් තොප්පි 2ක් සොරකම් කර ඇති බව වාර්තා වේ.
ඉන් එක කැප් තොප්පියක් 2011දී සිය මංගල ටෙස්ට් තරගයට පෙර මයිකල් ස්ලේටර් විසින් පිරිනැමූ කැප් තොප්පියකි.
‘බෑගී ග්‍රීන්ස්’ ලෙස හැඳින්වන මෙම කැප් තොප්පිය, ටෙස්ට් වරම් ලැබූ සියලු ඕස්ට්‍රේලියානු ක්‍රීඩයකයන් වෙත පිරිනැමෙන අතර, එය තමන් සතු වටිනාම වස්තුවක් ලෙස ඕස්ට්‍රේලියානු ක්‍රිකට් ක්‍රීඩයකයන් විසින් සලකනු ලබයි.
පකිස්තානය හා ඕස්ට්‍රේලියාව අතර පැවැත්වෙන තෙවැනි ක්‍රිකට් තරගය සිඩ්නි නුවරදී පැවැත්වෙන අතර, එය වෝනර් ගේ අවසන් ටෙස්ට් තරගයද වේ. මෙල්බර්න් සිට සිඩ්නි අතර ගමනේදී මෙම කැප් තොප්පි දෙක ඇතුළත් ගමන්මල්ලක් කිසියම් පුද්ගලයෙකු විසින් සොරකම් කර ඇත.
සිය ඉන්ස්ටර්ග්‍රෑම් ගිණුමට වීඩියෝවක් එක්කරමින් වෝනර් ඉල්ලා ඇත්තේ මෙම කැප් තොප්පිය මෙම තරගයට පැළඳීමට හැකිවීම තමාට ඉතා වටිනා බවත්, එම බෑගය ගත් පුද්ගලයාට ඇත්තටම අවශ්‍ය බෑගයක් නම්, එවැනි තවත් ගමන් මල්ලක් තමා ළඟ ඇති බවත්, එම පුද්ගලයාට කිසිඳු කරදරයක් සිදු නොවන බවත්ය.
තමා ගේ ‘බෑගී ග්‍රීන්ස්’ කැප් තොප්පි යළිත් භාරදෙන්නේ නම් එම අතිරේක ගමන් මල්ල සතුටින් ලබාදෙන බවත්, එය භාර දීමට තමාගේ සමාජ මාධ්‍ය ඔස්සේ හෝ ක්‍රිකට් ඕස්ට්‍රේලියා හරහා අමතන ලෙස වෝනර් ඉල්ලා සිටියි.
