2023 එක්දින ලෝක කුසලානයට සුදුසුකම් ලබාගැනීමේ තරගාවලියේ සුපිරි හයදෙනාගේ තරග වටය අද (29) සිට ආරම්භ වේ.
සුපිරි හයදෙනාගේ වටය ආරම්භ කරමින් එහි පළමු තරගය අද (29) සත්කාරක සිම්බාබ්වේ සහ ඕමානය අතර බුලවායෝ හිදි පැවැත්වේ.
මෙම සුදුසුකම් ලබාගැනීමේ තරගාවලියේ මුලික වටයේදී කණ්ඩායම් 10ක් කාණ්ඩ දෙකක් යටතේ තරග වැදුණු අතර ඒ ඒ කාණ්ඩවල ප්‍රසාද ලකුණු සටහනේ මුල් ස්ථාන තුනට පත්වූ කණ්ඩායම් 3 බැගින් එහිදී සුපිරි හයදෙනාගේ වටයට සුදුසුකම් ලැබීය.
ඒ අනුව A කාණ්ඩයෙන් සිම්බාබ්වේ, බටහිර ඉන්දීය කොදෙව් සහ නෙදර්ලන්තය ද, B කාණ්ඩයෙන් ශ්‍රී ලංකාව, ස්කොට්ලන්තය සහ ඕමානය සුපිරි 6දෙනාගේ වටයට සුදුසුකම් ලබා ගත්තේය.
සුපිරි හයදෙනාගේ වටයේදී එක් කණ්ඩායමක් තරග 3 බැගින් ක්‍රීඩා කිරීමට නියමිත අතර එම තරග තුන පැවැත්වෙන් එක් එක් කණ්ඩායම් මූලික වටයේදී තරග නොකළ කණ්ඩායම් තුන සමගය.
ඒ අනුව ශ්‍රී ලංකා කණ්ඩායමට තරග කිරීමට සිදු වන්නේ සිම්බාබ්වේ, බටහිර ඉන්දීය කොදෙව් සහ නෙදර්ලන්තය සමගය.
මෙම සුපිරි 6දෙනාගේ වටයේ ප්‍රසාද ලකුණු සටහනේ පළමු ස්ථාන දෙක හිමිකරගන්නා කණ්ඩායම් දෙක, මෙවර ඉන්දියාවේ පැවැත්වීමට නියමිත 2023 එක්දින ලෝක කුසලානයට සුදුසුකම් ලබා ගනු ඇත.
සුපිරි හයදෙනාගේ වටයේ ශ්‍රී ලංකා පිල සහභාගි වන පළමු තරගය නෙදර්ලන්තයට එරෙහිව හෙට (30) පැවැත්වීමට නියමිත අතර දෙවන තරගය ජුලි 2වැනිදා සිම්බාබ්වේ පිලට එරෙහිවත් තුන්වන තරගය ජුලි 7 වනදාා බටහිර ඉන්දීය කොදෙව් කණ්ඩායමට එරෙහිවත් පැවැත්වීමට නියමිතය.
