ශ්‍රී ලංකාවේ ක්‍රිකට් වලට දේශපාලන අතපෙවීම් සිදු වෙනවාදැයි සොයා බැලීම සඳහා මේ දිනවල මෙහි පැමිණ සිටින එහි උප සභාපති ඉම්රාන් කවාජා මහතා ඇතුළු නිලධාරීන් දෙදෙනා අද (11) සවස ක්‍රීඩා අමාත්‍ය රොෂාන් රණසිංහ මහතා හමු වීමට නියමිතය.
ඔවුන් දෙදෙනා ඊයේ ක්‍රිකට් ආයතනයේ විධායක කමිටුව මුණ ගැසුණු අතර සවස ජනාධිපතිවරයා මුණ ගැසීමට නියමිතව සිටි බව පැවසේ.
කෙසේවුවද, ජනපතිවරයා මුණ නොගැසුණු ඔවුන් ජනාධිපති උපදේශක සාගල රතනායක මහතා මුණ ගැසී ඇත.
මොවුන් මෙහි පැමිණ ඇත්තේ ක්‍රිකට් ආයතනයේ ඉල්ලීමක් අනුව බව වාර්තා වේ.
මේ අතර, මෙවැනි දේශපාලන මැදිහත්වීම් සිදුවන වෙනත් රටවල්ද තිබියදී මොවුන් ශ්‍රී ලංකාව ඉලක්ක කර පැමිණීම සම්බන්ධයෙන් ක්‍රිකට් ප්‍රවීනයන් කිහිප දෙනකු සැකමතුකර තිබේ.
මේ වන විට අයිසීසි ය පවා යටපත් කරගෙන සිටින ලොව වඩාත්ම ධනවත් සාමාජිකයා වන ඉන්දීය ක්‍රිකට් පාලක මණ්ඩලයද වසර ගණනක් මුළුල්ලේ පාලනය කරනු ලබන්නේ ව්‍යවස්ථානුකූලව පත් කර ගන්නා නිලධාරි මණ්ඩලයකින් නොව සුප්‍රීම් උසාවි නියෝගයක් අනුව පත් කරගත් නිලධාරි මණඩලයකින් බව ඔවුහු පෙන්වා දෙති.
පාකිස්ථානු ක්‍රිකට් පාලක මණ්ඩලය පත් කරනු ලබන්නේ කෙළින්ම එහි අගමැතිවරයාය.
හිටපු අගමැති ඉම්රාන් ඛාන් බලයෙන් පහ වූ විගස ඔහු විසින් පාකිස්තානු ක්‍රිකට් පාලක මණ්ඩලයේ සභාපති ලෙස පත් කර තිබූ රමීස් රාජා ඉවත් කර නව අගමැතිවරයා විසින් වෙනත් අයකු පත් කරන ලදී.
බංග්ලාදේශ ක්‍රිකට් පාලක මණ්ඩලයද හැම විටම සැදුම් ලත් වනුයේ පවතින රජයට හිතවත් අයගෙනි.
සිම්බාබ්වේ ක්‍රිකට් පවා පාලනය කෙරෙනුයේ රජයට ඕනෑ ආකාරයටය.
වරින් වර විවිධ හේතු කියමින් මෙහි පැමිණෙන අයිසීසී නිලධාරීන් එසේ එන්නේ ඔවුන්ගේ වියදමින්ද නැතහොත් ශ්‍රී ලංකා ක්‍රිකට් වියදමින්ද යන්නත් සොයා බැලිය යුතු බව ඔවුන්ගේ අදහස වී තිබේ.
සබැදි පුවත්
SLCය ට ඇති දේශපාලන බලපෑම් හොයන්න ICC ලොක්කෙක් එයි
