09 වන විධායක ජනාධිපතිවරයා ලෙස අනුර කුමාර දිසානායක මහතා අද පෙරවරුවේ  ධුරයේ දිවුරුම් දුන්නේය.

ඒ අගවිනිසුරු ජයන්ත ජයසුරිය මහතා ඉදිරියේ, ජනාධිපති ලේකම් කාර්යාලයේ දීයි .

නව ජනපති ලෙස දිවුරුම් දීමෙන් අනතුරුව ජාතිය අමතමින් සිය මංගල කතාව සිදු කළ ජනාධිපති අනුර කුමාර දිසානායක මහතා සඳහන් කළේ ශ්‍රී ලංකාවේ මේ වන විට යහපත් දේශපාලන සංස්කෘතියක අවශ්‍යතාවයක් මතු වී තිබෙන බවයි

සම්පූර්ණ කතාව,

“අපේ රටේ ප්‍රජාතන්ත්‍රවාදයේ වැදගත්ම ලක්ෂණය ජනතාව විසින් තම පාලනය සඳහා පාලකයෙක් තෝරා පත්කර ගැනීමයි. නමුත් මැතිවරණයකට ඡන්දය ප්‍රකාශ කිරීම හා පාලකයෙක් තෝරා පත්කර ගැනීමෙන් පමණක් ප්‍රජාතන්ත්‍රවාදය අවසන් වෙන්නේ නැහැ. එය ප්‍රජාතන්ත්‍රවාදයේ මූලික ලක්ෂණයක් වුවත් අපේ රට තුළ ප්‍රජාතන්ත්‍රවාදය ශක්තිමත් කිරීම වෙනුවෙන් ව්‍යුහයන්ගේ ශක්තිමත්භාවය වගේම නීතිමය ශක්තිමත්භාවයක් අවශ්‍යයි. ඒ නිසා මා ප්‍රථම කොටම අපේ රටේ ජනතාව දැනුවත් කරන්න කැමතියි. මේ රටේ ප්‍රජාතන්ත්‍රවාදය වෙනුවෙන් මාගේ උපරිම කැපවීම මාගේ ධුර කාලය තුළ තහවුරු කරන්න සූදානම්. ඒ වගේම අපේ රටේ මැතිවරණයකින් බලය හුවමාරු කිරීමේදී ප්‍රජාතාන්ත්‍රික ලෙස සිදුවුණු ඉතිහාසයක් තිබෙනවා, කිසිදු විටෙක මැතිවරණයකදී සිදුවූ බල හුවමාරුවක්, කිසිදු නායකයෙක් ප්‍රතික්ෂේප කොට නැහැ. ඒ අනුව යමින් හිටපු ජනාධිපති රනිල් වික්‍රමසිංහ මහතා ජනතාවගේ ජන වරම සුහදව පිළිගනිමින් ප්‍රජාතන්ත්‍රවාදී බල හුවමාරුව වෙනුවෙන් එතුමාගේ කැපවීම, එතුමාගේ ආදර්ශය ලබාදීමට බෙහෙවින්ම ස්තුතිවන්ත වෙනවා.

අපට ලැබෙන්නේ ඉතාමත් අභියෝගාත්මක රටක් බව අපි ඉතා ගැඹුරින් තේරුම් ගෙන සිටිනවා. අපේ රටේ දේශපාලනය මීට වඩා පිරිසිදු විය යුතුයි. ජනතාව විශාල ලෙස අපේක්ෂා කරන යහපත් දේශපාලන සංස්කෘතියක අවශ්‍යතාවය තිබෙනවා. අප ඒ වෙනුවෙන් කැපවෙන්න සූදානම්. අපේ රටේ දේශපාලකයාත්, දේශපාලනයත් පිළිබඳව පොදු පුරවැසියන්ගේ තිබෙන්නේ අයහපත් අදහසක්. දේශපාලනය සුදුසු නැති දෙයක් වගේ අදහසක් තිබෙනවා. ඒ නිසා අපේ උපරිම කැපවීමෙන් නැවත දේශපාලනය කෙරෙහිත් දේශපාලකයා කෙරෙහිත් මහජනයාගේ ගෞරවය, මහජනයාගේ විශ්වාසය, තහවුරු කිරීමට අපගේ පාර්ශ්වයෙන් කළ හැකි සියල්ල සිදුකරනවා. ඒ වගේම අප හමුවේ තිබෙන ගැඹුරුතම අර්බුදය හුදු ආණ්ඩුවකට, හුදු දේශපාලන පක්ෂයකට හුදු පුද්ගලයෙකුට පමණක් පියමං කළ හැකි දෙයක් බව අපි විශ්වාස කරන්නේ නැහැ. මෙයට පෙරත් මම ප්‍රකාශ කර ඇති පරිදි මා ඉන්ද්‍රජාලිකයෙකු හෝ මැජික්කරුවෙකු නොවෙයි. මා මේ රටේ ඉපදුණු සාමාන්‍ය පුරවැසියෙක්. හැකියාවන් තිබෙනවා. නොහැකියාවන් තිබෙනවා. දන්න දේවල් තිබෙනවා. නොදන්න දේවල් තිබෙනවා. හැබැයි මගේ ප්‍රමුඛතම කාර්යය හැකියාවන් උරාගෙන, දන්න දේ එක්රැස්කරගෙන වඩාත් හොඳ තීන්දු තීරණ අරගෙන ක්‍රියාකිරීමයි.

ඒ නිසා ඒ සාමූහික මැදිහත් වීමේ පංගුකරුවෙකු ලෙස පත්වීම මගේ වගකීමයි. ඒ වෙනුවෙන් සාමූහිකව මැදිහත් වීමේ කොටස්කරුවෙකු හැටියට මා පත්වෙනවා. මේ අර්බුදය නිමා කිරීමේදී පොදු පුරවැසියන්ටත්, සියලු ක්ෂේත්‍රවල අයටත් විශාල වගකීමක් තිබෙනවා. ඒ වගකීම ඉටුකිරීම වෙනුවෙන් මා හැමදෙනාගේම සහයෝගය අපේක්ෂා කරනවා. නමුත් රටේ ජනාධිපතිවරයා ලෙස මේ කාර්යය මෙහෙයවීමේ ප්‍රමුඛතම හා ප්‍රධානතම වගකීමත් මා වෙත තිබෙන බව තේරුම් ගෙන තිබෙනවා. ඒ නිසා ක්‍රියාවෙන්ම හැම අවස්ථාවකදීම මේ අභියෝගය පියමං කිරීම සඳහා මා වෙත පැවරී තිබෙන වැඩකොටස මා නිසි පරිදි ඉටුකරන බව මේ මේ රටේ පුරවැසියන්ට, සමාජයට ඒත්තු ගන්වන්න මම සූදානම්.

ඒ වගේම අපේ රටට ජාත්‍යන්තර සහයෝගය අවශ්‍යයි. ලෝකයේ කවර බල බෙදීමකදී වුවත් අපට වඩාත් වාසි සහගත ලෙස අපි අපේ විදේශ ප්‍රතිපත්තිය පවත්වාගෙන යනවා. අපට අවශ්‍ය ලෝකයේ හුදකලා රාජ්‍යයක් නොවෙයි; ලෝකයත් සමග සාමූහිකව, ඒකාබද්ධව ඉදිරියට යා යුතු රාජ්‍යයක්. ඒ වෙනුවෙන් අවශ්‍ය තීන්දු තීරණ ගන්න අපි කිසිසේත්ම පැකිළෙන්නේ නැහැ. අපේ රට ගොඩනැගීමේදී කර්මාන්තකරුවන්ට හා ව්‍යවසායකයන්ට විශාල කාර්යභාරයක් පැවරී තිබෙනවා. ඔවුන් වඩා ශක්තිමත්ව අපේ රට ගොඩනැගීම සඳහා රජයේ ක්‍රියාවලියට සහයෝගය දේවි, උදව් කරාවි කියා බලාපොරොත්තු වෙනවා.

අවසන් වශයෙන් මම කියන්නේ, අපේ රටේ ප්‍රජාතන්ත්‍රවාදී ක්‍රියාවලියක් තුළින් මාව ජනාධිපති ලෙස තෝරා පත්කරගෙන සිටිනවා. ඒ තෝරා පත්කර ගැනීම සඳහා ජනතාව මා වෙත ඡන්දය ලබාදී තිබෙනවා. මට ලබා නොදුන් ඡන්ද ප්‍රමාණයකුත් තිබෙනවා. ඒ නිසා ජයග්‍රහණයේ සංයුතිය සහ ප්‍රමාණය පිළිබඳව අපට ඉතා හොඳ අවබෝධයක් තිබෙනවා. ඒ නිසා මාගේ පාලන කාලය තුළ මට පැවරී තිබෙන කාර්යභාරය, අපට ඡන්දය නොදුන්, අපව විශ්වාස නොකරන අයගේ සහයෝගය ලබා ගැනීම සහ විශ්වාසය දිනා ගැනීම සාර්ථකව සිදුකළ හැකියි කියන විශ්වාසය අපට තිබෙනවා. ඉදිරියේදී මේ සියල්ල ප්‍රායෝගිකවත් අත්විඳින්න හැකිවේවි. ඒ සඳහා සියලු දෙනාගේ සහයෝගය අපේක්ෂා කරනවා.”

ඉදිරියේදී ශ්‍රී ලංකාව ඇතුළු රටවල් කිහිපයකට ගමන් කිරීමට නියමිත චීන නාවික හමුදාවට අයත් ‘පෝ ලං’ නම් පුහුණු නෞකාව චීනයෙන් පිටත් වී තිබේ.

ඊසාන දිග චීනයේ ලියාඕනිංග් පළාතේ ඩාලියැන් ප්‍රදේශයෙන් මෙම නෞකාව ගමන් ආරම්භ කර තිබේ.

මිඩ්ෂිප්මන්වරුන් හට මෙන්ම චීන විමුක්ති හමුදාව යටතේ පවතින ඩාලියැන් නාවික ඇකඩමියේ නිලධාරීන් හටද මෙම නෞකාවේ පුහුණුව ලබාදේ.

මේ මාසයේ මැද සිට නොවැම්බර් අග දක්වා මෙම පුහුණු නෞකාව,  ශ්‍රී ලංකාව, වියට්නාමය, ඉන්දුනීසියාව ඇතුළු රටවල් කිහිපයකට ගමන් කිරීමට නියමිත අතර, හොංකොං හි තාක්ෂණික නැවතුමක් සිදුකිරීමටද නියමිතය.

දිගින් මීටර් 85ක් හා පළලින් මීටර 11ක් වන ‘පෝ ලං’ නෞකාවට නොට් 18ක උපරිම වේගයකින් ගමන් කළ හැකි අතර, එක්වර කැඩට් නිලධාරීන් 50ක් පුහුණු කිරීමට පහසුකම් සැලසිය හැකි වේ.

මේ පිළිබඳ ව අදහස් දැක්වූ ‘පෝ ලං’ නෞකාවේ කාර්ය මණ්ඩල සාමාජිකයෙකු වන මා වෙන්යොං මහතා පවසා ඇත්තේ, නාවික කැඩට් නිලධාරීන් තුළ වෘත්තිමය හැකියාවන් වර්ධනය කිරීමත්, වෙනත් රටවල් වල නාවික හමුදා සමග සහයෝගීතාව හා හුවමාරුවන් වර්ධනය කිරීමත් මෙන්ම පොදු අනාගතයක් සහිත සමුද්‍රීය ප්‍රජාවක් ගොඩනැගීමට දායක වීමද මෙම මෙහෙයුමේ අභිප්‍රායන් බවයි.”

(මූලාශ්‍රය : CCTV +)

සබැඳි පුවත් :

ශ්‍රී ලංකාවේ ආයෝජනය කරන මෙන් කථානායක – මහින්ද යාපා අබේවර්ධන මහතා, චීන ආයෝජකයන්ගෙන් ඉල්ලීමක් කර තිබේ.

ඔහු මේ ඉල්ලීම කර තිබුණේ, චීනයේ කුන්මින් නගරයේ පැවැත්වෙන චීන – දකුණු ආසියා ප්‍රදර්ශනයට එක්වීමට පසුගියදා චීනයට ගොස් සිටි අවස්ථාවේදී එරට CGTN රූපවාහිනි නාලිකාව සමග සම්මුඛ සාකච්ඡාවකට එක්වෙමිනි.

“පහුගිය පාර අපෙන් සහභාගී වුනේ 80ක් විතර… මේ පාර 126ක් හිටියා… මැණික් හා ස්වර්ණාභරණ කියන්නෙ අපේ රටේ ජනප්‍රියතම හා සාර්ථකම ව්‍යාපාරයක්. දැන් එයාලට අවශ්‍යයි වැඩි ආකර්ශනයක් තියෙන චීන වෙළඳපොලට එන්න.  අනිත් එක තමයි ඇඟළුම් කර්මාන්තය… මේ ප්‍රදර්ශනයත් එක්ක මං චීන ආයෝජකයන්ට ආරාධනය කර  සිටින්නේ විශේෂයෙන් තේ, ඇඟළුම්, මැණික් හා ස්වර්ණාභරණ යන ක්ෂේත්‍ර තුළ ශ්‍රී ලංකාවේ ආයෝජනය කරන්න කියලා…”

“අපේ රටේ දියුණු කරන තවත් දෙයක් තමයි සංචාරක කර්මාන්තය.  චීනයේ සංචාරකයන්ගෙන් 10%ක් ලංකාවට ගෙන්නගන්න පුලුවන් වුනත් ඒක අපේ සංචාරක ක්ෂේත්‍රයේ පැවැත්මට ඕනවාටත් වඩා ඇති. චීන සංචාරකයන්, ලංකාවේ රජයත් ජනතාවත් විසින් ඉහළින්ම පිළිගැනෙනවා.”

කථානායකවරයා වැඩිදුරටත් පවසා ඇත්තේ චීනයේ එක් තීරයක් එක් මාවතක් හෙවත් BRI වැඩපිළිවෙළ ඔස්සේ දෙරට අතර තවදුරටත් සහයෝගීතාව වර්ධනය වන බවයි.

“BRI වැඩපිළිවෙළ ලංකාවට අලුත් දෙයක් නෙමෙයි.  අවුරුදු දහස් ගණනකට කලින් චීන ව්‍යාපාරිකයන් අපේ රටේ ව්‍යාපාර කරලා තියෙනවා.  BRI වැඩපිළිවෙළත් එක්ක ඇති තරම් අවස්ථා උදා වෙලා තියෙනවා… කොළඹ වරාය නගරය ශ්‍රී ලංකාව පිළිගත්ත චීන ආයෝජනයක්…  ආයෝජකයන්ට ආරක්ෂාවක් දෙන්න අපි පාර්ලිමේන්තුවේදී නීති සම්පාදනය කර තිබෙනවා… එය ආයෝජනයන්ට හිතකාමී, වාසිදායක හා ඔවුන්ගේ ආයෝජන වලට අත නොතබන විශේෂ නීතියක්.”

පසුගිය කාලයේදී චීනය විසින් අක්ෂි රෝගීන්ට ලබාදුන් වෛද්‍ය ආධාර ලබාදීම පිළිබඳවද අබේවර්ධන මහතා සිය ප්‍රශංසාව පළ කර තිබේ.

“ඇසේ සුද ඉවත් කළ එම සැත්කම් ඉතා සාර්ථක වුනා.. ඊට ලොකු ඉල්ලුමකුත් තිබුණා. ඊට අමතරව චීනය අපිට පොළොන්නරුවේ මිත්‍ර රෝහලකුත් ලබාදී තියෙනවා. ඒ වකුගඩු රෝගීන් වෙනුවෙන්. ඒක විස්මිත ආයෝජනයක් හා පරිත්‍යාගයක්… එය අපි ඉතා ඉහළින් අගයනවා…

(CCTV+)