ගෝල්ඩන් ඩෝම් නම්, ඊශ්‍රායල ආරයේ මිසයිල ආරක්ෂණ පද්ධතියක් නිර්මාණය කිරීමට වන සැලසුමක් අමෙරිකානු ජනාධිපති ඩොනල්ඩ් ට්‍රම්ප් අනාවරණය කළේය.

වසර තුනකදී ඉදිකිරීමට සැලසුම්ගත මේ ගුවන් ආරක්ෂණ පද්ධතියට වැයකිරීමට නියමිත පිරිවැය අමෙරිකානු ඩොලර් බිලියන 175කි.

අමෙරිකානු ජනාධිපති ඩොනල්ඩ් ට්‍රම්ප්,  

“අමෙරිකානු භූමිය විදෙස් මිසයිල ප්‍රහාරයකින් ආරක්ෂා කරගන්න නවීන මිසයිල ආරක්ෂණ පද්ධතියක් සකස් කරන බවට මැතිවරණ ව්‍යාපාරය අතර මම පොරොන්දු වුණා. එහි කටයුතු සම්පූර්ණයෙන්ම අවසන් වුණාම ලෝකයේ අනෙක් කොනේ සිට හෝ අභ්‍යවකාශයේ සිට හෝ පැමිණෙන මිසයිලයකින් වුවත් රට ආරක්ෂා කිරීමට ගෝල්ඩන් ඩෝම් පද්ධතියට හැකියාව පවතිනවා. ඔබ දන්නා පරිදි ඊශ්‍රායලයේ පද්ධතිය සැකසීම අපි සහාය දුන්නා. එය අති සාර්ථකයි. අපි සතුව දැන් ඊටත් වඩා දියුණු තාක්ෂණයක් පවතිනවා”

මෙම ව්‍යාපෘතිය සඳහා අමෙරිකානු ඩොලර් බිලියන 175ක් පමණක් වැය වෙතැයි ට්‍රම්ප් පැවසුවත්, ඊට අමෙරිකානු ඩොලර් බිලියන 500කට ආසන්න වනු ඇති බවයි කොංග්‍රසය ගණන් බලා ඇත.

ඇමරිකා හිටපු ජනපති ජෝ බයිඩන් දරුණු ගණයේ පුරස්ථි ග්‍රන්ථි පිළිකාවකින් පෙලෙන බව ඔහුගේ කාර්යාලය නිවේදනය කරයි.

හිටපු ඇමරිකා ජනපති ජෝ බයිඩන් මේ වනවිට 82 වන වියේ පසුවේ.

මෙම පුරස්ථි ග්‍රන්ථි පිළිකාව ඔහුගේ අස්ථි දක්වා  පැතිරී ඇතැයි වාර්තා වේ.

හිටපු ජනාධිපතිවරයා පිළිකා රෝගියකු බව අනාවරණය වී ඇත්තේ පසුගිය සිකුරාදා දිනයේය.

පසුගිය ජනවාරි මාසයේ ධුරයෙන් ඉවත් වූ බයිඩන් මුත්‍රා ආසාදනයක් සඳහා ප්‍රතිකාර ලබාගැනීමට වෛද්‍යවරයෙකු හමුවීමෙන් පසුවයි මේ බව අනාවරණය වී ඇත.

බයිඩන් හිටපු ජනාධිපතිවරයා හා ඔහුගේ පවුලේ සාමාජිකයන් මේ වනවිට වෛද්‍ය ප්‍රතිකාර සමාලෝචනය කරමින් සිටින බව වාර්තා වේ.

ඔහුගේ කාර්යාලය තවදුරටත් පැවසුවේ පිළිකා තත්ත්වය කළමනාකරණය කර ගත හැකි බවය.

මේ අතර ඇමරිකා ජනාධිපති ඩොනල්ඩ් ට්‍රම්ප් සමාජ මාධ්‍යයේ සටහනක් තබමින් ජෝ බයිඩන්ගේ මෑත කාලීන රෝග තත්ත්වය ගැන අසා කණගාටු වන බව පවසා තිබේ.

‘රුසියානු – යුක්‍රේන’ යුද්ධය ආරම්භ වී වසර තුනකට පසු දෙරටේ රාජ්‍ය තාන්ත්‍රිකයින් ඊයේ (16) පළමුවරට තුර්කියේ ඉස්තාන්බුල් නුවරදී මුහුණට මුහුණ හමුවිය.

මෙම හමුව විදෙස් වාර්තා පෙන්වා දී ඇත්තේ, 1945 වසරෙන් පසු යුරෝපයේ ඇති වූ දරුණුතම යුද්ධයේ නිමාවක් පිළිබඳව යම් බලාපොරොත්තු දල්වන්නක් බවය.

කෙසේ වෙතත් තුර්කියේ දී සාම සාකච්ඡා පැවැත්වීමට යෝජනා කළ රුසියානු ජනාධිපති පුටින් ඊට එක්නොවුණි.

පුටින් සාකච්ඡා සඳහා නොපැමිණීමට විරෝධය පළ කිරීමක් වශයෙන් යුක්රේන ජනාධිපති සෙලෙන්ස්කි ද මෙම සාකච්ඡාවට එක් නොවූ බව වාර්තා වේ.

පැය දෙකකටත් අඩු කාලයක් පැවති මෙම සාකච්ඡාවේ අපේක්ෂා කළ පරිදි සටන් විරාමයක් හෝ සටන් නිමාකිරීම සම්බන්ධයෙන් එකඟතාවකට පැමිණීමට දෙපාර්ශ්වයම අපෙහොසත් වී ඇත. 

එහෙත් යුද සිරකරුවන් හුවමාරු කරගැනීමට දෙරටම එකඟ වී තිබේ.

ඒ අනුව දෙපාර්ශ්වයෙන් යුද සිරකරුවන් දහස බැගින් නිදහස් කෙරෙනු ඇති බව විදෙස් වාර්තාවන්හි දැක්වේ.

කෙසේ වෙතත් සිරකරු හුවමාරුව සිදුවන දිනයක් මේ වනවිට තීරණය කර ඇතත්, ඒ පිළිබඳව මෙතෙක් අනාවරණ කර නොමැත. 

සාකච්ඡාවල මීළඟ පියවර දෙරටේ ජනාධිපතිවරුන් අතර සිදුවිය යුතු බව යුක්රේනයේ මතය වී ඇත.

එමෙන්ම සාකච්ඡා සම්බන්ධයෙන් තමන් සෑහීමකට පත්වන බවත්, සාකච්ඡා ඉදිරියට පවත්වාගෙන යාමට අපේක්ෂා කරන බවත් රුසියානු පාර්ශ්වය පවසා තිබේ.

කෙසේ වුවද ඇතැම් පාර්ශ්ව මත පළකරන්නේ මෙය නව යුරෝපා සම්බාධක පැනවීමටකට යටත් නොවී සිටීමට රුසියාව ගන්නා උත්සාහයක් පමණක් විය හැකි බවය.

මෙවන් පසුබිමක දෙරට අතර, ස්ථිරසාර සාමයක් උදාකිරීමට තමන් රුසියානු ජනාධිපති ව්ලැද්මීර් පුටින් හමුවීම අත්‍යවශ්‍ය බව අමෙරිකානු ජනාධිපති ඩොනල්ඩ් ට්‍රම්ප් ද පවසා තිබේ.