යුරෝපා සංගමයෙන් එක්සත් ජනපදයට ආනයනය කරන භාණ්ඩ සඳහා එළැඹෙන මස සිට සියයට 50ක තීරු බදු පැනවීමට තමන් නිර්දේශ කරන බව අමෙරිකානු ජනාධිපති ඩොනල්ඩ් ට්‍රම්ප් පවසා තිබේ.

ඒ අනුව එළැඹෙන 01 වැනිදා සිට සුඛෝපභෝගී භාණ්ඩ, ඖෂධ සහ අනෙකුත් භාණ්ඩ සඳහා දැඩි බදු පැනවෙනු ඇති බවත් අමෙරිකානු ජනාධිපතිවරයා පවසා ඇත.

සිය Truth Social ගිණුමේ සටහනක් තබමින් අමෙරිකානු ජනාධිපතිවරයා පවසා ඇත්තේ යුරෝපා සංගමය පිහිටුවා ඇත්තේ වෙළෙඳාම සම්බන්ධයෙන් එක්සත් ජනපදයෙන් වාසි ලබා ගැනීස සඳහා වන බවය.

එමෙන්ම අමෙරිකාවේ නිෂ්පාදනය නොකරන අයිෆෝන් සඳහා 25%ක ආනයන බද්දක් පැනවීමටද අමෙරිකානු ජනාධිපතිවරයා කටයුතු කර තිබේ.

එමගින් ඩොනල්ඩ් ට්‍රම්ප් පවසා ඇත්තේ අමෙරිකා එක්සත් ජනපදයේ විකුණනු ලබන අයිෆෝන් ඉන්දියාවේ හෝ වෙනත් ඕනෑම තැනක නිෂ්පාදනය කිරීම නොව එක්සත් ජනපදයේ නිෂ්පාදනය කරනු ඇතැයි තමන් අපේක්ෂා කරන බවය.

අමෙරිකානු ජනාධිපති ඩොනල්ඩ් ට්‍රම්ප් දෙවැනි වරට බලයට පත්වූ පසු ලොව පුරා රටවල් රැසකට විවිධ තීරුබදු පැනවීමට කටයුතු කළ අතර එමගින් ඔහු දක්වා ඇත්තේ එය එක්සත් ජනපද නිෂ්පාදන ඉහළ නැංවීමේ සහ විදේශීය තරඟකාරිත්වයෙන් එක්සත් ජනපදයේ රැකියා ආරක්ෂා කිරීමේ ක්‍රමයක් ලෙස තමන් දකින බවය.

ලොව ප්‍රධාන පෙළේ විශ්වවිද්‍යාලයක් ලෙස සැලකෙන අමෙරිකාවේ හාවර්ඩ් විශ්වවිද්‍යාලයට විදෙස් සිසුන් බඳවාගැනීම ට්‍රම්ප් පරිපාලනය විසින් අත්හිටුවා ඇති බව විදෙස් වාර්තා සඳහන් කරයි.

එම විශ්වවිද්‍යාලයේ දැනට අධ්‍යාපනය හදාරන දහස් ගණන් සිසුන්ටද වෙනත් විශ්වවිද්‍යාලයකට මාරු විය යුතු බවත්, එසේ නොහැකි නම් සිය රටෙන් යායුතු බවට දැනුම් දී ඇති බවද එම වාර්තාවන්හි වැඩිදුරටත් දැක්වේ.

මෙම හදිසි තීරණය සම්බන්ධයෙන් නිවේදනයක් නිකුත්කරමින් අමෙරිකානු ස්වදේශ ආරක්ෂක දෙපාර්තමේන්තුව පවසා ඇත්තේ, හාවර්ඩ් විශ්වවිද්‍යාලය තුළ ඇමරිකානු විරෝධී ක්‍රියාවන්ට විදෙස් සිසුන් පෙළඹී සිටින බවය.

එමෙන්ම ත්‍රස්ත හිතවාදී උද්ඝෝෂකයින් සිටින බවත්, ඔවුන් යුදෙව් සිසුන්ට පහරදීමට කටයුතු කිරීමෙන් විශ්වවිද්‍යාලය තුළ අනාරක්ෂිත පරිසරයක් නිර්මාණය වී ඇති බවත් එම දෙපාර්තමේන්තුව පවසයි.

මේ වනවිට හාවර්ඩ් විශ්වවිද්‍යාලයේ 20,000කට වැඩි සිසුන් පිරිසක් අධ්‍යාපනය ලබන අතර, ඉන් රටවල් 100කට අධික සංඛ්‍යාවක් නියෝජනය වන පරිදි විදෙස් සිසුන් 6,800කට ආසන්න සංඛ්‍යාවක් සිටිති.

කටාර් රාජ්‍යයෙන් ජනාධිපති ඩොනල්ඩ් ට්‍රම්ප් වෙත ලබාදුන් ගුවන් යානය අමෙරිකානු රජය විසින් පිළිගෙන ඇති බව විදෙස් මාධ්‍ය වාර්තා කරයි.

අමෙරිකානු ජනාධිපතිවරයාගේ නිල ගුවන් ප්‍රවාහය වන එයාර් ෆෝස් වන් බලඇණිය සඳහා කටාර් රාජ්‍ය විසින් බෝයි 747 වර්ගයේ ගුවන් යානයක් තැගී ලෙස ලබා දෙන ලදී.

මේ සම්බන්ධයෙන් නිවේදනයක් නිකුත් කරමින් අමෙරිකානු ආරක්ෂක ලේකම්වරයා සඳහන් කර ඇත්තේ, සියලු නීති රේගුලාසීවලට අනුව අදාළ යානය අමෙරිකානු රජය විසින් පිළිගෙන ඇති බවය.

කෙසේවෙතත් ජනාධිපතිවරයාගේ නිල ගුවන් ප්‍රවාහය වන එයාර් ෆෝස් වන් බලඇණිය සඳහා අදාළ ගුවන් යානය භාවිත කිරීමට පෙර එහි වෙනස්කම් කිහිපයක් සිදුකිරීමට අවශ්‍ය වනු ඇති බව ධවල මන්දිරය පෙන්වා දී තිබේ.

කටාර් රාජකීය පවුල විසින් අමෙරිකානු ජනාධිපතිවරයා වෙත ලබාදුන් මෙම ගුවන් යානය අමෙරිකානු ඩොලර් මිලියන 400ක පමණ වටිනාකමකින් යුක්ත වන අතර ඩොනල්ඩ් ට්‍රම්ප්ගේ ධුර කාලයෙන් පසුව එය ඔහුගේ පුස්තකාලයට ලබාදීමට නියමිතය.