දිවයින පුරා සහල් සම්බන්ධව වැටලීම් තවදුරටත් සිදු කෙරෙමින් පවතින බව පාරිභෝගික කටයුතු අධිකාරිය පවසයි.

එහි අධ්‍යක්ෂ අසේල බණ්ඩාර මහතා පැවසුවේ ඊයේ (13) දිනයේදී දිවයින පුරා වැටලීම් 75ක් පමණ සිදුකළ බවය.

ඉදිරියේදී ද සති අන්තයේ සහ නිවාඩු දිනවලදී වැටලීම් කරන ලෙස අදාළ නිලධාරීන්ට උපදෙස් ලබා දී ඇති බවත් ඔහු පැවසීය.

එමෙන්ම ආනයනික සහල් තොග වෙළෙඳපොළට පැමිණීමත් සමග සහල් මිල අඩුවෙමින් පවතින බවද ඇතැම් ප්‍රදේශයන් හී වී මිලද අඩු වෙමින් පවතින බවටත් මේ වන විට තොරතුරු ලැබෙමින් පවතින බවද ඔහු පවසයි.

මේ අතර රාජ්‍ය වාණිජ විවිධ නීතිගත සංස්ථාව මගින් නාඩු සහල් මෙට්‍රික් ටොන් 5,200ක ප්‍රමාණයක් ආනයනය කිරීමට ද කටයුතු යොදා තිබේ.

එහි පළමු තොගය මෙම මස 19වන දින මෙරටට ලැබීමට නියමිතව ඇති බවත් වාර්තා වේ. 

කොළඹ කොටස් වෙළෙඳපොළ ඊයේ(12) වාර්තාගත ලෙස ඉහළ ගොස් තිබේ.

ඒ, ඊයේ(12) ගනුදෙනු නිමාවේ සියලු කොටස් මිල දර්ශක අගය ඒකක 14,000 සීමාව පසුකර යාමත් සමඟය.

පසුගිය නොවැම්බර් මාසයේ සිට දර්ශකය ක්‍රමයෙන් ඉහළ යමින් පැවති අතර එය ඊයේ ඒකක  14,035. 81ක් ලෙස දැක්වුණි.

ඒ අනුව, ඊයේ දිනය තුළදි පමණක් දර්ශක අගය ඒකක 150.72  කින් ඉහළ යමින් 1.09% ක වර්ධනයක් වාර්තා කර තිබේ.

ජාත්‍යන්තර ස්වෛරීත්ව බැඳුම්කර ප්‍රතිව්‍යුහගත කිරීම සාර්ථකව නිමකිරීමේ අපේක්ෂාවන් සමග  බැංකුවල කොටස් සඳහා ආයෝජකයන්ගේ උනන්දුව ඉහළ යෑම මීට හේතු වී ඇති බව නිරීක්ෂණයට ලක්ව තිබේ.

පෞද්ගලික ආනයනකරුවන් විසින් ආනයනය කරන ලද සහල් තොග වෙළෙඳපොළට නිකුත් කර තිබේ.

ඊයේ (11) දිනයේ මෙරටට ආනයනය කරන ලද පළමු සහල් තොගය රේගුවෙන් මුදාහැරීමට කටයුතු කර ඇති බව වාර්තා වේ.

රට තුළ පවතින සහල් හිඟයට පිළියමක් වශයෙන් පෞද්ගලික ආනයනකරුවන්ට සහල් ආනයන කිරීම සඳහා රජය විසින් පසුගියදා අවසර ලබාදුන්නේය.

ඒ අනුව ආනයනකරුවන් විසින් සහල් ආනයනය කිරීමට පියවර ගත් අතර ඊයේ දිනයේදී සහල් කිලෝ 75,000ක් රේගුවෙන් මුදාහැර ඇති බවට වාර්තා වේ.

සම්බා සහ සුදු කැකුළු සහල් තොගයක් ඉන්දියාවේ සිට මෙලෙස ආනයනය කර ඇති බව සඳහන්ය.

අද (12) සහ හෙට (13) යන දෙදින තුළද තවත් සහල් තොග දිවයිනට ළඟාවීමට නියමිත බව අත්‍යාවශ්‍ය භාණ්ඩ ආනයනකරුවන්ගේ සංගමය සඳහන් කලේය.