ඩයනා ගමගේ මහත්මියගේ මන්ත්‍රී ධුර‍ය අහෝසි වීම හේතුවෙන් පාර්ලිමේන්තු මන්ත්‍රී ධුරයක පුරප්පාඩුවක් පවතින බව පාර්ලිමේන්තුව විසින් මැතිවරණ කොමිෂන් සභාවට දැනුම් දෙන ලදී.

සමගි ජන බලවේගයේ ජාතික ලැයිස්තු පාර්ලිමේන්තු මන්ත්‍රී ඩයනා ගමගේ මහත්මියගේ  පාර්ලිමේන්තු මන්ත්‍රී ධුරය 2024 මැයි 08 වැනි දින සිට බල පැවැත්වෙන පරිදි අහෝසි වීම හේතුවෙන් නව වැනි පාර්ලිමේන්තුවේ මන්ත්‍රීධුරයක පුරප්පාඩුවක් ඇති වී තිබෙන බව පාර්ලිමේන්තු, මහ ලේකම් කුෂානි රෝහණධීර මහත්මිය  මැතිවරණ කොමිෂන් සභාවේ සභාපතිවරයා වෙත ලිපියක් යොමු කරමින් දන්වා ඇත.

1981 අංක 1 දරන පාර්ලිමේන්තු මැතිවරණ පනතේ 64(1) වගන්තිය ප්‍රකාරව මෙම දැනුම්දීම සිදුකර තිබේ.

අද (09) පාර්ලිමේන්තුවට පැමිණි ජනාධිපති රනිල් වික්‍රමසිංහ මහතා රටේ ආර්ථික තත්ත්වය පිළිබඳ පැහැදිලි කිරීමක් සිදුකලේය.

ජනාධිපතිවරයාගේ ප්‍රකාශයෙන් අනතුරුව සභාවේ අදහස් දැක්වූයේ විපක්ෂනායක සජිත් ප්‍රේමදාස මහතාය.

මේ මොහොත වනවිට ණය ප්‍රතිව්‍යුහගතකරණය සම්බන්ධයෙන් පවතින තත්ත්වය කුමක්ද කියා එහිදී විපක්ෂනායකවරයා ජනාධිපතිවරයාගෙන් ප්‍රශ්න කරන්න ලදී.

ඊට ප්‍රතිචාර දැක්වීමට ජනාධිපති රනිල් වික්‍රමසිංහ මහතා පවසා සිටියේ, මේ සියළු දේවල් විමසීමට විවාදයක් පැවැත්විය යුතු බවත්, මේ වෙලාව ඊට සුදුසු අවස්ථාවක් නොවන බවත්ය.

එහිදී ජනාධිපතිවරයා ප්‍රකාශ කළේ පවතින සියළු ගැටළුවලට විපක්ෂනායකවරයා වගකිව යුතු බවයි.

” මං හිතන්නේ මේ කාරණා සම්බන්ධයෙන් විවාදයක් තිබ්බොත් හොඳයි.. පක්ෂ විපක්ෂ විවිධ මත තියනවා.. ඒත් මං විපක්ෂ නායකතුමාට කියනවා මේ සියල්ලට එතුමා වගකියන්න ඕන.. අප්‍රේල් 10 වැනිදා අගමැතිකම භාරගත්තා නම් මෙවැනි ගැටළු ඇති වෙන්නේ නැහැ… මං මට පුළුවන් විදියට වැඩේ කළේ..”

අනතුරුව පක්ෂ විපක්ෂ ඝෝෂා මධ්‍යයේ ජනාධිපති රනිල් වික්‍රමසිංහ මහතා මැතිසබයෙන් පිටව ගියේය.

විපක්ෂනායක සජිත් ප්‍රේමදාස මහතා එහිදී ජනාධිපතිවරයාට ප්‍රකාශ කළේ සිය ගැටළුවලට පිළිතුරු ලබා දී පිටව යන ලෙසයි.

” ආ.. ජනාධිපතිතුමා යනවනේ..ඇයි ජනාධිපතිතුමා යන්නේ? කරුණාකරලා ඉඳලා මගේ ප්‍රශ්නවලට උත්තර දෙන්න. ඇයි නැගිටලා යන්නේ? ඇයි නැගිටලා යන්නේ? මොකද බයද? බයද උත්තර දෙන්න බැරිද? මොන නිවට කමක් ද? දැන් මම ජනාධිපතිතුමාගේ කතාවට හොඳින් සවන් දුන්නනේ. ඇයි අපිට උත්තර දෙන්නේ නැත්තේ?…”

හිටපු ජනාධිපති මෛත්‍රීපාල සිරිසේන මහතා ශ්‍රී ලංකා නිදහස් පක්ෂයේ සභාපතිවරයා වශයෙන් කටයුතු කිරීම වළක්වාලමින් පනවා තිබෙන වාරණ නියෝගය ලබන 29 වනදා දක්වා දීර්ඝ කරන ලෙස කොළඹ දිසා අධිකරණය විසින් අද (09) නියෝග කරන ලදී.

හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය ඉදිරිපත් කළ පෙත්සම අද කොළඹ දිසා විනිසුරු සඳුන් විතාන මහතා ඉදිරියේ යළි කැඳවනු ලැබීය.

නඩුවට අදාළ විරෝධතා තිබේ නම් ගොනුකරන ලෙස වගඋත්තරකරුවන්ට නියෝග කළ දිසා විනිසුරුවරයා නඩුව නැවත ලබන 29 වනදා කැඳවන ලෙසත් නියෝග කිරීම සිදුවිය.

පෙත්සමේ වගඋත්තරකරුවන් ලෙස ශ්‍රී ලංකා නිදහස් පක්ෂයේ සභාපති මෛත්‍රිපාල සිරිසේන, ජ්‍යේෂ්ඨ උපසභාපති අමාත්‍ය නිමල් සිරිපාල ද සිල්වා, උප සභාපති වූ ෆයිසර් මුස්තාපා ඇතුළු පිරිසක් නම් කර තිබිණි.

මෛත්‍රිපාල සිරිසේන මහතා ශ්‍රී ලංකා නිදහස් පක්ෂයේ සභාපතිවරයා වශයෙන් පත්වීම එම පක්ෂයේ ව්‍යවස්ථාවට පටහැනි බවත් ඔහු එම ධුරයේ කටයුතු කිරීම වළක්වන නියෝගයක් නිකුත් කරන ලෙසත් ඉල්ලා චන්ද්‍රිකා බණ්ඩාරනායක කුමාරතුංග මහත්මිය විසින්  මෙම පෙත්සම ගොනු කරන ලදී.