ත්‍රාසජනක ක්‍රියාකාරකම් අත්වීඳීමට කැමැති පුද්ගලයන් සඳහා නෙළුම් කුලුනේ සිට පහතට බැසීමේ අත්දැකීම නුදුරේදීම සලසා දීමට එහි පරිපාලනය තීරණය කර තිබේ.
නෙළුම් කුලුනේ පරිපාලනය හෙවත් සීමාසහිත Colombo Lotus Tower Management Company (Private) Limited සමාගම ඔවුන්ගේ නවතම නියමු වැඩසටහන ලෙස ශ්‍රී ලංකාවේ ප්‍රථම වරට ‘ඇබ්සීලින්’ ක්‍රියාකාරකම් (abseiling activity) පසුගියදා අත්හදා බැලීය.
Abseiling යනු කඹයක් භාවිත කරමින් සිරස් අතට පහළට බැසීමේ ත්‍රාසජනක ක්‍රියාකාරකමකි.
Lotus Tower Management Company Pvt Ltd ප්‍රධාන විධායක නිලධාරී මේජර් ජෙනරාල් ප්‍රසාද් සමරසිංහ මහතා ප්‍රකාශ කළේ, ඇබ්සීලින් ක්‍රියාකාරකම් දෙසැම්බර් අවසානයේ හෝ ලබන වසරේ ජනවාරි මස මුල මහ ජනතාවට විවෘත කිරීමට සූදානම් බවයි.
සාමාජිකයන් හය දෙනකුගෙන් සමන්විත කණ්ඩායමක්, පසුගියදා මෙහි නියමු වැඩසටහන සටහන් කිරීම සඳහා කුලුන මුදුනේ සිට මීටර් 195ක් උසින් බැසීමේ ක්‍රියාකාරකමක පළමු වරට නිරත වූ බවද හෙතෙම සඳහන් කළේය.
