කොළඹ වරාය ආසන්නයේ ගිනිගෙන විනාශවූ එක්ස්ප්‍රස් පර්ල් නෞකාව සම්බන්ධයෙන් නඩු පැවරීම හා වන්දි ලබාගැනීමේ ක්‍රියාවලිය අඩපණ කිරීමට මෙරට යම් බලධාරියෙකුට අල්ලසක් ලබාදීමේ චෝදනාව සම්බන්ධයෙන් පරීක්ෂණයක් ඇරඹීමට උපදෙස් ලබාදුන් බව අධිකරණ අමාත්‍ය විජේදාස රාජපක්ෂ මහතා පවසයි.
2021 මැයි 15 වැනිදා ඉන්දියාවේ හසීරා වරායේ සිට පැමිණි එක්ස්ප්‍රස් පර්ල් නෞකාව කොළඹ වරාය ආසන්නයේදී ගිනිගැනීමට ලක්වූයේ මැයි 20 වැනිදාය.
නයිට්‍රික් ඇසිඩ් සහ වෙනත් රසායනික ද්‍රව්‍ය සහිත බහාලුම් 1,486ක් නෞකාවේ තිබුණු අතර ඉන් රැසක් ගිනිගනිද්දී තවත් බහාලුම් ගණනාවක් මුහුදුබත් වුණි.
මීගමුවට ආසන්න අවට මුහුදු තීරයට හා පරිසර පද්ධතියට ඉන් සිදුවූයේ දැවැන්ත හානියකි.
එම හානියට අදාළව අමෙරිකානු ඩොලර් බිලියන 6.2ක වන්දියක් නෞකා සමාගමෙන් මෙරටට ලබාගැනීමේ හැකියාව ඇතත් නඩු පැවරීම මෙතෙක් සිදු නොකරන්නේ මන්දැයි පාර්ශ්ව රැසක් රජයෙන් ප්‍රශ්න කළේය.
විශේෂඥයන් පවසන පරිදි ඒ සම්බන්ධයෙන් නඩු පැවරීම සඳහා තවත් ඉතිරිව ඇත්තේ දින 32ක් වැනි කාලයක් පමණි.
එමෙන්ම ශ්‍රී ලංකාව තුළ නඩු පවරමින් වැඩි වාසියක් ලබාගත හැකිවී තිබියදී සිංගප්පූරුවේ නඩු පැවරීමට බලධාරීන් තීරණය කළේ මන්දැයි යන්න විශේෂඥයින් තුළ සැක මතුකළ තවත් කරුණකි.
නෞකාවේ විමර්ශන හා නඩු පැවරීමට අදාළව අධිකරණ අමාත්‍ය විජේදාස රාජපක්ෂ මහතා ද ආන්දෝලනාත්මක ප්‍රකාශයක් සිදු කර තිබුණේ මේ අතරතුරදී ය.
නෞකාව සම්බන්ධයෙන් නඩු පැවරීම හා වන්දි ලබාගැනීමේ ක්‍රියාවලිය අඩපණ කිරීමට මෙරට යම් බලධාරියෙකුට අමෙරිකානු ඩොලර් මිලියන 250ක අල්ලසක් නෞකාවේ රක්ෂණ සමාගම ලබාදී ඇතැයි තොරතුරු ලැබුණු බව අමාත්‍යවරයා සඳහන් කළේය.
