Connect with us

පුවත්

ප්‍රෙස්ටීජ් ඔටෝමොබයිල් කර ඇති විශාල බදු වංචාවක් සොයන්න අධිකරණ අවසරය

Published

on

තීරුබදු සහන බලපත්‍ර යටතේ රජයේ සේවකයන් සඳහා සුඛෝපභෝගි බී.එම්. ඩබ්ලිව්. වාහන 1728ක් ආනයනය කිරීමේදී අඩු වටිනාකම් පෙන්වීම මඟින් බරපතළ රේගු බදු වංචාවක් සිදු වී ඇති බව පෙනී යන බැවින් ඒ සම්බන්ධයෙන් අලුතින් විමර්ශනයක් සිදු කිරීමට රේගු අධ්‍යක්ෂ ජනරාල්වරයාට අභියාචනාධිකරණය අවසර දුන්නේය.

මෙම විමර්ශනය කිරීමට එරෙහිව ‘ප්‍රෙස්ටීජ් ඔටෝමොබයිල් පෞද්ගලික සමාගම’ ගොනු කළ රිට් පෙත්සමක් විභාග කර අවසානයේ එය නිෂ්ප්‍රභ කරමින් මෙම අවසරය දෙන ලදි.

මෙම වාහන ශ්‍රී ලංකාවට ආනයනය කිරීමේදී මූල්‍ය අක්‍රමිකතා සිදු වී ඇති බවට ජර්මානු රේගුව විසින් වාර්තාවක් දී ඇති බවට ද එම සිද්ධිය සම්බන්ධයෙන් නව විමර්ශනයක් සිදු කිරීමට නව කරුණු සහ සාක්ෂි ඇති බවට ද රේගු අධ්‍යක්ෂ ජනරාල්වරයා වෙනුවෙන් පෙනී සිටි අතිරේක සොලිසිටර් ජනරාල්, ජනාධිපති නීතිඥ සුමති ධර්මවර්ධන මහතා ඉදිරිපත් කළ කරුණු සලකා බැලීමෙන් අනතුරුව අභියාචනාධිකරණය විසින් මේ බව තීරණය කරනු ලැබීය.

අභියාචනාධිකරණ සභාපති විනිසුරු නිශ්ශංක බන්දුල කරුණාරත්න මහතාගේ එකඟත්වය ඇතිව අභියාචනාධිකරණ විනිසුරු ශෂි මහේන්ද්‍රන් මහතා විසින් මෙම තීන්දුව ප්‍රකාශ කෙරිණි.

රජයේ සේවකයන් සඳහා ලබා දෙන තීරුබදු සහන බලපත්‍ර යටතේ ‘බ්‍රෑන්ඩ් නිව් බී.එම්.ඩබ්ලිව්. වාහන’ 1728ක් 2011-2014 කාලයේදී ආනයනය කිරීමේදී අඩු වටිනාකම් පෙන්වීම මඟින් බදු වංචාවක් සිදු වී ඇති බවට රේගු අධ්‍යක්ෂවරයා විසින් පෙත්සම්කාර සමාගමට එරෙහිව විමර්ශනයක් සිදු කර තිබේ.

එම විමර්ශන අවසානයේ තීරණය කර ඇත්තේ අදාළ වාහන ආනයනයේදී රුපියල් 117,700,00.00ක මූල්‍ය අක්‍රමිකතාවක් සිදුවී ඇති බැවින් රේගු පනතේ 119 වගන්තිය යටතේ වරදක් සිදු වී ඇති බවය. 

ඒ අනුව එක් වාහනයකට රුපියල් ලක්ෂය බැගින් දඩ අය කිරීමෙන් අනතුරුව අදාළ මුදා හැරීමට නියම කර තිබේ.

එකී තීරණයට එරෙහිව පෙත්සම්කාර සමාගම විසින් මීට පෙර අභියාචනාධිකරණයට රිට් පෙත්සමක් ගොනු කර තිබිණි. 

එමඟින් ඉල්ලා තිබූ අතුරු තහනම් නියෝගය නිකුත් කිරීම සම්බන්ධයෙන් නීතිපතිවරයා ද විරුද්ධත්වය ප්‍රකාශ නොකළ අතර කරුණු සලකා බැලූ අභියාචනාධිකරණය අදාළ රේගු අධ්‍යක්ෂ ජනරාල්වරයාගේ අදාළ තීරණය බලරහිත කරමින් නියෝගයක් නිකුත් කළේය. 

මෙම වාහන ආනයනය කිරීම සම්බන්ධයෙන් පැවැත්වෙන විමර්ශනයක් සඳහා 2022.10.22 වැනි දින තමන්ට කැඳවීමක් ලැබුණු බව පවසමින් පෙත්සම්කාර සමාගම විසින් අභියාචනාධිකරණයට මෙම නව රිට් පෙත්සම ගොනු කළේ ඉන් අනතුරුවය.

එම පෙත්සමට අතරමැදි පාර්ශ්ව පෙත්සමක් ඉදිරිපත් කරමින් රේගු නිලධාරී මුරුගේසු තයාබරන් මහතා ඉල්ලා සිටියේ පෙත්සම නිෂ්ප්‍රභ කරන ලෙසය. 

එම පෙත්සම සම්බන්ධයෙන් මූලික කරුණු සලකා බැලූ අභියාචනාධිකරණය අදාළ විමර්ශනය සිදුකිරීම අත්හිටුවමින් අතුරු තහනම් නියෝගයක් මීට පෙර නිකුත් කළේය.

එම පෙත්සම් විභාගයේදී රේගු අධ්‍යක්ෂ ජනරාල්වරයා වෙනුවෙන් කරුණු ඉදිරිපත් කළ අතිරේක සොලිසිටර් ජනරාල්, ජනාධිපති නීතිඥ සුමති ධර්මවර්ධන මහතා පෙන්වා දුන්නේ මෙම වාහන ගනුදෙනුවේදී මූල්‍ය අක්‍රමිකතාවක් සිදුවී ඇති බවට ජර්මාණු රේගුව විසින් වාර්තාවක් ඉදිරිපත් කර ඇති බවය.

ඒ අනුව අලුතෙන් විමර්ශනයක් සිදු කිරීම සඳහා නව සාක්ෂි සහ කරුණු ඇති බව ඒ මහතා පෙන්වා දුන්නේය.

ඒ අනුව පෙත්සම නිෂ්ප්‍රභ කරන ලෙස ඔහු අධිකරණයෙන් ඉල්ලා සිටියේය. ඉදිරිපත් වූ කරුණු සැලකිල්ලට ගත් අභියාචනාධිකරණය තීරණය කර ඇත්තේ මෙකී වාහන ආනයනය කිරීමේදී බරපතළ මූල්‍ය අක්‍රමිකතාවක් සිදුවී ඇති බව පෙනී යන බවය.

ඒ සම්බන්ධයෙන් විමර්ශනයක් පැවැත්වීම මඟින් රේගු අධ්‍යක්ෂ ජනරාල්වරයා සිය බලය ඉක්මවා කටයුතු කළ බව ඔප්පු කිරීමට පෙත්සම්කාර පාර්ශ්වය අපොහොසත් වූ බවට ද විනිසුරු මඬුල්ල විසින් තීරණය කර තිබේ.

ඒ අනුව පෙත්සම නිෂ්ප්‍රභ කිරීමට විනිසුරු මඬුල්ල විසින් තීරණය කරන ලදි.

ජනාධිපති නීතිඥ සංජීව ජයවර්ධන මහතා පෙත්සම්කාර සමාගම වෙනුවෙන් පෙනී සිටියේය. 

ජනාධිපති නීතිඥ රොමේෂ් ද සිල්වා මහතා වගඋත්තරකාර පාර්ශ්වය වෙනුවෙන් පෙනී සිටි අතර අතිරේක සොලිසිටර් ජනරාල් ජනාධිපති නීතිඥ සුමති ධර්මවර්ධන මහතා රේගු අධ්‍යක්ෂ ජනරාල්වරයා වෙනුවෙන් පෙනී සිටියේය.

මෙම පෙත්සමට මැදිහත් පාර්ශ්ව පෙත්සමක් ඉදිරිපත් කළ මුරුගේසු තයාබරන් මහතා වෙනුවෙන් නාගානන්ද කොඩිතුවක්කු මහතා පෙනී සිටියේය.

පුවත්

රුසියානු තානාපති කාර්යාලයේ වැඩ බැලීමට විදේශ සේවයේ විශ්‍රාමිකයකු යවයි

Published

on

By

රුසියාවේ ශ්‍රී ලංකා තානාපති ධූරය තවමත් හිස්ව පැවතීම නිසා නව තානාපතිවරයකු පත් කරන තුරු විදේශ සේවයේ ජ්‍යෙෂ්ඨ නිලධාරියෙකු එම තානාපති කාර්යාලයේ වැඩ බැලීමට යැවීමට රජය සැලසුම් කර ඇතැයි වාර්තා වේ.

මේ අතර විදේශ කටයුතු රාජ්‍ය අමාත්‍ය තාරක බාලසූරිය මහතා මාධ්‍යට පවසා ඇත්තේ, තානාපතිවරයෙකු නොමැති වීම හුදෙක් කාර්ය පටිපාටියේ පරතරයක් පමණක් බවත්, රුසියාවේ පවතින විශේෂ තත්ත්වය මත විදේශ කටයුතු අමාත්‍යාංශයේ ජ්‍යෙෂ්ඨ නිලධාරියෙකු එහි කටයුතු අධීක්‍ෂණය කිරීමට යොමු කරන බවයි.

මෙසේ යවන්නේ විශ්‍රාමික විදේශ සේවයේ ජ්‍යෙෂ්ඨයකු බවත්, දැනට තානාපතිවරයකු නොමැති වීම ප්‍රධාන ප්‍රශ්නයක් නොවන බවද ඔහු අවධාරණය කර තිබේ.

අමාත්‍යවරයා වැඩිදුරටත් පවසා ඇත්තේ එහි දැනටමත් විදේශ සේවයේ ජ්‍යෙෂ්ඨ නිලධාරියෙකු සිටින බවත්, සිදුවෙමින් පවතින හදිසි අවශ්‍යතාවය සැලකිල්ලට ගෙන, ඉතා ජ්‍යෙෂ්ඨ විදේශ සේවා නිලධාරියෙකු යවන්නේ දැනට රුසියාවේ සිටින නිලධාරියා ප්‍රමාණවත් නොවන නිසා නොවන බවද ඔහු කියා සිටී.

මෙහෙයුම ශක්තිමත් කිරීම සඳහා මෙය සිදු කරන බවත්, සාමාන්‍ය ප්‍රොටෝකෝලය අනුව කටයුතු සිදුවන බවද බාලසූරිය මහතා අවධාරණය කර ඇත.

කෙසේවුවද, රුසියාවට තානාපතිවරයකු පත් කර ඇතත් ඔහු කවුරුන්ද යන්න මාධ්‍යට හෙළි නොකිරීමට ද බාලසූරිය මහතා කටයුතු කර තිබේ.

රුසියානු සමූහ ආණ්ඩුවේ හිටපු ශ්‍රී ලංකා තානාපතිනිය වන මහාචාර්ය ජනිතා ඒ ලියනගේ මහත්මියට සේවා දිග තුනක් ලබාදී තිබුණු අතර, ඇය පසුගිය අප්‍රේල් 29 වැනිදා මොස්කව්හි ශ්‍රී ලංකා තානාපති කාර්යාලයේ සිය සේවය අවසන් කර ඇත.

වර්තමානයේ, රුවිනි කේ. මුනිදාස මහත්මිය තානාපති කාර්යාලයේ භාර නිලධාරිනිය ලෙස කටයුතු කරනු ලබයි.

Continue Reading

පුවත්

ලන්සාට අමුත්තා නිසා ජනපතිගේ රෑ කෑමත් එපා වෙයි

Published

on

By

ජනපති රනිල් වික්‍රමසිංහ මහතා දිනවීමේ ජනාධිපති මැතිවරණ මෙහෙයුම් කමිටුවට බැසිල් රාජපක්ෂ මහතා සහභාගි කර ගැනීම හේතුවෙන් නිමල් ලංසා, අනුර ප්‍රියදර්ශන යාපා ප්‍රමුඛ නව සන්ධානයේ කණ්ඩායම එයට සහභාගි වී නැතැයි වාර්තා වේ.

මේ කමිටුවට බැසිල් පැමිණ ඇත්තේ වජිර අබේවර්ධන මහතාගේ යෝජනාවකට අනුව ජනපති රනිල් වික්‍රමසිංහ මහතා කළ ආරාධක් අනුවය.

නිමල් ලංසා, අනුර ප්‍රියදර්ශන යාපා ප්‍රමුඛ නව සන්ධානයේ කණ්ඩායම මෙම කැඳවීම පිළිබඳව මුල සිටම වි‍රෝධය දක්වා ඇතැයි පැවසේ.

“මේ වැඩවලට රාජපක්ෂල සම්බන්ධ කරගන්න එපා. අපි එතැන ඉඳලා ආවේ ඒගොල්ලොත් එක්ක වැඩ කරන්න බැරි නිසා.” යනුවෙන් ඔවුන් සිය විරෝධය පල කර තිබේ.

කෙසේ වෙතත් මෙම රැස්වීම ඔවුන් නොමැතිව බැසිල්ගේ සහභාගිත්වය ඇතිව පවත්වා ඇති අතර, එහිදී “රනිල් වික්‍රමසිංහ ජනාධිපතිතුමාගේ කැම්පේන් එක කරනව නම් එතැන බැසිල් රාජපක්ෂ මහත්මයා ඉන්න ඕනෑ. එතුමා නැතුව කරන්න බැහැ.” යනුවෙන් වජිර අබේවර්ධන මහතා පවසා ඇතැයි වාර්තා වේ.

පැතිර යන ආරංචි අනුව වජිර අබේවර්ධන වෙතින් එවැන්නක් මතුවන විට ජනපති රනිල් වික්‍රමසිංහ මහතා “එහෙනම් අපි මෙතුමට කමිටුවේ සභාපතිකම දෙමු.” යැයි යොජනා කළ බවද පැවසේ.

කෙසේවෙතත් බැසිල් රාජපක්ෂ එම යෝජනාව උපක්‍රමශීලීව බැහැර කර ඇති අතර ඔහු පවසා ඇත්තේ ඔබතුමා ජනාධිපතිවරණයට එනවා නම් ඒ බව රටට දන්වන දිනය ප්‍රකාශ කරන්නට යැයි කියාය.

මේ අතර, ලන්සා ප්‍රමුඛ පිරිස එදින ජනාධිපතිවරයා පැවැත්වූ රාත්‍රී භෝජන සංග්‍රහයට ද නොපැමිණි බවටද ආරංචි පැතිර තිබේ.

මූලාශ්‍රය – දේශය

Continue Reading

ක්‍රීඩා

රෝම් ස්ප්‍රින්ට් ෆෙස්ටිවල් හිදී යුපුන්ට 4වැනි ස්ථානය

Published

on

By

ඉතාලියේ පැවැත්වෙන රෝම් ස්ප්‍රින්ට් ෆෙස්ටිවල් හි මීටර 100 පිරිමි ඉසව්වට තරගවැදි ශ්‍රී ලංකාවේ කෙටි දුර ධාවන ශූර යුපුන් අබේකෝන් එම තරගය තත්ත්පර 10:21කින් නිමා කරමින් එහි සිව්වැනි ස්ථානයට පත්ව තිබේ.

කෙසේවුවද, ඔහුට මේ තරගයේදී ඔහුගේ හොඳම කාලය වන තත්ත්පර 10:18 සීමාව පසු කිරීමට නොහැකි වී ඇත.

ඔලිම්පික් වරම් අපේක්ෂාවෙන් ඔහු මේ තරගය සඳහා සහභාගි විය.

මේ අතර ජපානයේ පැවැත්වෙන සීකෝ ගෝල්ඩන් ග්‍රෑන්ඩ් ප්‍රික්ස් මළල ක්‍රීඩා තරඟාවලියේ මීටර 400 පිරිමි ඉසව්ව සඳහා කාලිංග කුමාර අද (19) ශ්‍රී ලංකා වේලාවෙන් පෙරවරු 11.47ට තරඟ වදීමට නියමිත බවද වාර්තා වේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved