අද (23) සිට නැවත දැනුම්දෙන තුරු බදුල්ල දක්වා ධාවනය වන දුම්රිය සියල්ල නානුඔය දක්වා පමණක් ධාවනය කිරීමට තීරණය කර ඇති බව දුම්රිය දෙපාර්තමේන්තුව පවසයි.
දුම්රිය දෙපාර්තමේන්තුව පවසන්නේ පවතින අයහපත් කාලගුණ තත්ත්වයත් සමඟ මෙම තීරණය ගෙන ඇති බවය.
අධික වැසි සහිත තත්ත්වයත් සමඟ උඩරට දුම්රිය මාර්ගයේ නායයෑම් සහ ගල් පෙරළීම් සිදුවන බැවින් මෙම තීරණය ගත් බව දුම්රිය දෙපාර්තමේන්තුව වැඩිදුරටත් පවසයි.
මේ අතර උඩරට දුම්රිය මාර්ගයේ හාලිඇළ, උඩුවර ප්‍රදේශයේදී දුම්රිය මාර්ගය ආසන්නයේ ඊයේ (22) මධ්‍යම රාත්‍රියේ නායයෑමක් සිදුව තිබේ.
මේ හේතුවෙන් දුම්රිය ගමනාගමනයට බාධා එල්ල වී ඇති බව වාර්තා වේ.
තවද වැසි සහිත කාලගුණයත් සමග පස් කන්දක් කඩා වැටීම හේතුවෙන් කොළඹ – බදුල්ල ප්‍රධාන මාර්ගය බලංගොඩ සමනලවැව හල්පේ ප්‍රදේශයෙන් අවහිර වී තිබේ.
මේ හේතුවෙන් මාර්ගයේ වාහන ගමනාගමනය සීමා වී ඇති බව පොලීසිය සඳහන් කළේය.
පස් කඳු කඩා වැටීම හේතුවෙන් කොළඹ බදුල්ල ප්‍රධාන මාර්ගයේ බලංගොඩ, ඉඹුල්පේ ප්‍රදේශයෙන් සහ සීලගම ප්‍රදේශයෙන් ද අවහිර වී ඇති බව වාර්තා වේ.
