රුපියල් බිලියන 4 කට ආසන්න සුරාබදු මුදලක් ගෙවීම ඇති ඩබ්ලිව්. එම්. මෙන්ඩිස් සමාගමේ අත්හිටුවා තිබූ නිෂ්පාදන බලපත්‍රය යළි ලබාදීමට සුරාබදු දෙපාර්තමේන්තුව ඊයේ (28) පියවර ගෙන ඇත.
සුරාබදු කොමසාරිස් ජනරාල් ජේ. එස්. ගුණසිරි මහතා මාධ්‍යවෙත පවසා ඇත්තේ අදාළ මත්පැන් නිෂ්පාදන සමාගම සුරාබදු මුදල් ගෙවීම ආරම්භ කළ නිසා මෙලෙස බලපත්‍රය දීමට පියවර ගත් බවයි.
ඩබ්ලිව්. එම්. මෙන්ඩිස් සමාගමට අයත් වැලිසර පිහිටි මත්පැන් නිෂ්පාදන කර්මාන්ත ශාලාව සඳහා මෙලෙස නිෂ්පාදන බලපත්‍රය ලබාදී ඇති අතර, අදාළ සමාගම ඇතුළු මත්පැන් නිෂ්පාදන සමාගම් සුරාබදු මුදල් නිසි පරිදි නොගෙවීම සම්බන්ධයෙන් පාර්ලිමේන්තුවේදීද කතාබහට ලක්විය.
සුරාබදු මුදල් නොගෙවා පැහැර හරින ලද මත්පැන් නිෂ්පාදන සමාගම් පිළිබඳ දේශීය ආදායම් බදු දෙපාර්තමේන්තුව මගින්ද විමර්ශනයක් පවත්වා සමාගම් කිහිපයකට එරෙහිව මේ වනවිට අධිකරණය හමුවේ නීතිමය ක්‍රියාමාර්ගද ගෙන තිබේ.
රුපියල් කෝටි 678 කට අධික සුරාබදු මුදල් ප්‍රමාණයක් රජය වෙත ගෙවීම පැහැර හැර තිබෙන මත්පැන් නිෂ්පාදන සමාගම් 10 කින් එම බදු මුදල් අයකර ගැනීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක්ද මේ වනවිට ගොනුකර තිබේ.
ඩබ්ලිව්. එම්. මෙන්ඩිස් සමාගමේ හමිකරු බවට සටහන් නැතත් එහි ප්‍රධාන පුද්ගලයා ලෙස නම කියවෙන්නෙ ව්‍යාපාරික අර්ජුන ඇලෝසියස් මහතාගේ නමය.
