පුවත්
ලන්සා අනුරගෙන් ගේම ඉල්ලයි; උදයගේ වාර්තාව පිළිගන්නවද? නැද්ද අහයි? (වීඩියෝ)
රාජ්‍ය සේවකයින්ගේ වැටුප් හා දීමනා වැඩි කිරීමට උදය සෙනවිරත්න කමිටු වාර්තාව මගින් කළ නිර්දේශ ජනාධිපති අනුර කුමාර දිසානායක මහතා පිළි ගන්නේද යන්න රාජ්‍ය සේවකයින්ට පැවසිය යුතු බව නිමල් ලන්සා මහතා කියා සිටී.
හෙතෙම මෙසේ පැවසුවේ අද (29) මීගමුව, වැල්ලවීදියේ පැවති ප්‍රවෘත්ති සාකච්ජාවකට සහභාගි වෙමිනි.
රනිල් වික්‍රමසිංහ 2025 වර්ෂයේදී රාජ්‍ය සේවකයින්ට වැඩි කිරීමට තීරණය කළ වැටුප් හා දීමනා වැඩි කරන ලෙසත්, එය මඟ නොහරින ලෙස හිටපු පාර්ලිමේන්තු මන්ත්‍රී නිමල් ලන්සා මහතා එහිදී ඉල්ලා සිටියේ ය.
එහි දී වැඩදුරටත් අදහස් දැක්වූ නිමල් ලන්සා…
බලයගන්න කලින් කිව්වා ඒවා..
‘‘ජාතික ජන බලවේගයේ ජනාධිපතිවරයෙක් පත් වෙන්න කලින් ගුරුවරුන්ගේ වැටුප් වැඩි කළ යුතුයි, වැටුප් විෂමතා ඉවත් කරන්න, ජීවන වියදමට සරිලන පරිදි වැටුප් වැඩි කරන්න ඕනේ කියලා ජනතා විමුක්ති පෙරමුණට සම්බන්ධ වෘත්තිය සමිති විශාල ලෙස උද්ඝෝෂණය කරා. ඒ විදියට උද්ඝෝෂණය කරේ රට වැටිලා තිබුණු වෙලාවෙ. රනිල් වික්‍රමසිංහ මහතා ආර්ථිකය ස්ථාවර කරලා රාජ්‍ය සේවකයින්ගේ වැටුප් රුපියල් දහදාකින් වැඩි කරා. ඒ පඩි වැඩිවීත් මදි, අවමය විසිපන්දාහක පඩි වැඩිවීමක් අවශ්‍යයි කියලා ජනතා විමුක්ති පෙරමුණට සම්බන්ධ වෘත්තිය සමිති දිගින් දිගටම කියා සිටියා. වැටුණු ආර්ථිකය ගොඩනගමින් සිටින වෙලාවක රාජ්‍ය සේවකයින් යොදාගෙන රටපුරා උද්ඝෝෂණ, වැඩවර්ජන සිදු කරලා රනිල් වික්‍රමසිංහ මහතා පරාජය කරන්න ජනතා විමුක්ති පෙරමුණට සම්බන්ධ වෘත්තිය සමිති කටයුතු කරා.
රාජ්‍ය සේවකයෝ මාලිමාවට ඡන්දෙ දුන්නේ ඇයි?
ලැබෙන පඩියෙන් රාජ්‍ය සේවකයින්ට ජීවත් වෙන්න බැහැ කියලා කරුණු කිව්වට පස්සේ රාජ්‍ය සේවකයින් විශාල පිරිසක් ජාතික ජන බලවේගයට ජන්දය දුන්නා. රාජ්‍ය සේවකයින්ගෙන් පැමිණි උද්ඝෝෂණ හා වැඩවර්ජන නිසා ඔවුන්ගේ වැටුප් හා දීමනා වැඩි කිරීමට උදය සෙනවිරත්න මහතාගේ ප්‍රධානත්වයෙන් කමිටුක් පත් කරා. ඒ කමිටුව පත්කරේ ඒ සඳහා විශේෂ දැනුමක් සහ ඒ පිළිබඳව කටයුතු කරන ආයතනවල සහයෝගය ඇතිව. ඒ කමිටුව රාජ්‍ය සේවකයින්ගේ වැටුප් හා දීමනා වැඩි කිරීම ගැන සොයා බැලුවා. ජනතා විමුක්ති පෙරමුණ සහ ප්‍රධාන වෘත්තිය සමිති අනු එකක් ඒ කමිටුවට කරුණු වාර්තා කරා. ඒ අය කීවේ අපිට ලැබෙන පඩිය මදි. ජීවත් වෙන්න විදියක් නැහැ. පඩි වැඩි කරන්න කියලා. උදය සෙනවිරත්න කමිටුව තීරණය කරා අවමය විසිපන් දහසකින් පඩි වැඩි කරන්න. එහෙම නැතිනම් අවමය සියයට විසිහතරකින් පඩි වැඩි කරන්න. මූලික වැටුප අවමය පනස්පන් දහස දක්වා වැඩි කරන්න ඕනේ කියලා. මේ යෝජනා දෙකම ක්‍රියාත්මක කරන්න යෝජනා වූණේ ජනතා විමුක්ති පෙරමුණ සහ වෘත්තිය සමිති මීට වඩා පඩි වැඩිවීමක් ඉල්ලලා තිබුණු අවස්ථාවක.
රනිල් කියපු දේවල් කරපු නායකයෙක්
රනිල් වික්‍රමසිංහ මහතා ආර්ථිකය යම් මට්ටමකට ස්ථාවර කරලා තිබුන නිසා උදය සෙනවිරත්න කමිටුව යෝජනා කළ වැටුප් වැඩි වීම ක්‍රියාත්මක කිරීමට හැකිව තිබුණා. ඒ අනුව අවම වැටුප පනස් පන්දහසක් දක්වා වැඩි කිරීමටත්, දීමනාව විසිපන් දහස දක්වා වැඩි කිරීමටත් කැබිනට් මණ්ඩලයට යෝජනා කරා. රනිල් වික්‍රමසිංහ මහතා බලයට පත් වුනාට පස්සේ කියපු දේවල් සියල්ල කරපු නායකයෙක්. රට ගොඩගන්න අමාරු මට්ටමක තියෙන්නේ කියලා රනිල් වික්‍රමසිංහ මහතා ප්‍රකාශ කරාම අනුර කුමාර මහතා කිව්වේ ‘අපට ඕනේ විසඳුම් මිසක් මේ අමාරු තත්ත්වය කියන්න එපා’ කියල. රට භාර ගත්තනම් කරන්න කියලා. රනිල් වික්‍රමසිංහ මහතා එම අභියෝගය භාර අරන් සංචිත වැඩි කරලා, ආර්ථිකය වර්ධනය කරලා, ආදායම් වැඩි කරලා රට විශාල ප්‍රගතියකට අරන් ආවා. එහි ප්‍රතිඑලයක් විදියට තමා රාජ්‍ය සේවක වැටුප් වැඩිවීම කැබිනට් අනුමැතියට දාන්නේ. මුදල් අමාත්‍යාංශයේ සහ අදාළ ආයතනවල නිර්දේශ සහිතව දෙදහස් විසිපහේ වැටුප් හා දීමනා වැඩි කිරීමට මුදල් වෙන් කිරීමට කටයුතු කරා. දෙදහස් විසිපහේ වැටුප් හා දීමනා වැඩි කිරීමට දෙදහස් විසිහතරෙ නොවැම්බර් මාසයේ එන විසර්ජන පනතට ඇතුළත් කරන්න. දෙදහස් විසිහතරෙ විසර්ජන පනතින් තමා රාජ්‍ය සේවකයින්ගේ වැටුප් හා දීමනා වැඩිවීමට නියමිතව තිබුනේ.
2024 අය වැය කෝ…
ජනතා විමුක්ති පෙරමුණ කිව්වේ මීටත් වඩා රාජ්‍ය සේවකයින්ගේ වැටුප් වැඩිවීමක් මාස හයෙන් හයට කරනවා කියලා. මාලිමාවට විශාල විශ්වාසයක් තියලා රාජ්‍ය සේවකයින් ජන්දය ලබා දුන්නා. අපි ඒ අයගෙන් අහනවා අපි වැඩි කරපු අවම ගාණවත් රාජ්‍ය සේවකයින්ට ලබා දෙන වද කියලා. ජනතා විමුක්ති පෙරමුණ මෙවර අයවැය ලේඛණය ඉදිරිපත් කරන්නේ නැහැ. ඉදිරිපත් කරොත් රාජ්‍ය සේවකයින්ගේ වැටුප් වැඩිවීම පෙන්නන්න වෙනවා. ඒ නිසා මේ අය මෙවර අයවැය ඉදිරිපත් කරන්නේ නැහැ. අයවැය ඉදිරිපත් කරන්නේ මාර්තු මාසය තුළ. අයවැය ලේඛණය ඉදිරිපත් නොකර කල් දාගත්තම පාර්ලිමේන්තු මැතිවරණය සහ ප්‍රාදේශීය සභා මැතිවරණය දිනා ගන්නන ළුලුවන් වෙයි කියලා. අයවැය ලේඛණය ඉදිරිපත් කරාම ජනතාවට තේරෙනවා රාජ්‍ය සේවක වැටුප් මාස හයෙන් හයට වැඩි වෙන්නේ නැහැ කියලා.
හරිනිගේ දැනුම ගැන අපිට කණගාටුයි
උදය සෙනවිරත්න වාර්තාව කියන්නේ සියලු දෙනා පිළිගන්නා වාර්තාවක්. වෘත්තිය සමිත් අනූ එකක් සහ වෙනත් වෘත්තිය සමිති තුන්සිය හැත්තෑ එකක් සම්බන්ධ වෙලා, පුළුල්ව සාකච්ජා කරල ගත්ත තීන්දුවක්. ජනාධිපති අනුර කුමාර දිසානායක මහතාගෙන් අහන්න කැමතියි උදය සෙනවිරත්න වාර්තාව පිළිගන්නවද ? නැද්ද ? කියලා. වැඩි කරලා තියෙන වැටුප හා දීමනාව ගෙවන්න ඕනේ කියලා පිළිගන්නව ද නැද්ද? රාජ්‍ය සේවය මිලියන එකයි දශම තුනක යම් ප්‍රමාණයකින් අඩු කරන්න ඕනේ කියලා පිළිගන්නව ද කියලා අහන්න කැමතියි. පිළි නොගන්නේනම් පිළිගන්න කමිටු වාර්තාව මොකක්ද? ඒ අය රාජ්‍ය සේවකයින්ට කොපමණ වැටුප් හා දීමනා වැඩි කරනවද? මේ අයගේ වෘත්තිය සමිති තමා කිව්වේ වැටුප් වැඩි කරන්න කියලා. අපි දෙන්න ගිය එකත් නතර කරා. හරිනි අග්‍රාමාත්‍යතුමිය කියනවා මුදල් වෙන් කරලා තිබුනේ නැහැ කියලා. එයාට තියෙන දැනුම ගැන අපිට කණගාටුයි. දෙදහස් විසිපහේ වැටුප් වැඩි කිරිමට මුදල් වෙන් කරන්නේ දෙදහස් විසි හතරෙ වර්ෂ අවසානයේ විසර්ජන පනතින්. විසර්ජන පනත ඉදිරිපත් කරලා අනුමත වුනාම තමා දෙදහස් විසි පහේ මුදල් වෙන් කරන්නේ. මේ ගැන අවබෝධයක් නැති, තමන්ව බලයට ගෙන ඒමට කටයුතු කළ රාජ්‍ය සේවකයින් පහළට දාලා කතා කරන එක ගැන කණගාටුයි.
රාජ්‍ය සේවක වැටුප් වැඩිකරන්න කිව්වේ ජවිපෙ වෘත්තිය සමිති
ජනපති හා අගමැතිනියගෙන් අහන්න කැමතියි උදය සෙනවිරත්න කමිටුවෙන් යෝජනා කළ අවම වැටුප පනස් පන් දහස දක්වා වැඩි කිරීම පිළිගන්නවද නැද්ද? අවම දීමනාව රුපියල් විසිපන් දහස දක්වා වැඩි කිරීම පිළිගන්නවද නැද්ද ? රාජ්‍ය සේවකයින්ගේ වැටුප් වැඩි කිරීම පිළිගන්නවද නැද්ද? ජනතා විමුක්ති පෙරමුණ සහ ඒ අයගේ වෘත්තිය සමිති තමා රනිල් වික්‍රමසිංහ මහතාට බල කර සිටියේ වැටුප් වැඩි කරන්න කියලා. උදය සෙනවිරත්න කමිටුවේ අදහස් විමසලා ඒ නිර්දේශ මත රාජ්‍ය සේවක වැටුප් වැඩි කිරීමට කැබිනට් අනුමැතිය ලබා ගත්තේ. ඒ අනුව තමයි මුදල් වෙන් කරේ. දැන් ජනතා විමුක්ති පෙරමුණට පැනලා යන්න බැහැ. රනිල් වික්‍රමසිංහ මහතා වැඩි කළ අවම වැටුපවත් රාජ්‍ය සේවකයින්ට ලබා දෙන්න.’’
