ලබන වසරේ ඖෂධ හිඟයක්

ලබන වසරේ ඖෂධ හිඟයක් ඇතිවිය හැකි බව සෞඛ්‍ය අමාත්‍යංශයේ පෙරේදා පැවැති සාකච්ජාවකදී (28) අනාවරණය වී ඇතැයි වාර්තා වේ.

මේ බව හෙළිව ඇත්තේ සෞඛ්‍ය ලේකම් විශේෂඥ වෛද්‍ය පාලිත මහීපාල මහතාගේ ප්‍රධානත්වයෙන් පැවැති රැස්වීමකදීය.

එහිදී අක්ෂිකාච, සෝඩියම් බයි කාබනේට්, පෙනහළු ආබාධ රෝගීන්ට ලබාදෙන Amphotericin එන්නත්ද රෝහල් පද්ධතියේ නොමැති බව අනාවරණය වී තිබේ.

දිවයින පුරා පිහිටි රෝහල්වලට අත්‍යාවශ්‍ය ඖෂධ 850 ක් අවශ්‍ය වුවත් මේ වනවිට ඖෂධ වර්ග පනස්පහක හිඟයක් පවතින බවද මෙහිදී නිලධාරින් පෙන්වා දී ඇත.

ඖෂධ හිඟයක් නිර්මාණය වීමට බලපා ඇත්තේ රාජ්‍ය ඖෂධ නීතිගත සංස්ථාව ලබාදී ඇති ටෙන්ඩර් නැවත කැඳවීම හේතුවෙන් සැපයුම්කරුවන්ට නිසිකලට ඖෂධ සැපයීමට නොහැකිවීම බව මෙහිදී හෙළිවී ඇත.

තවද දේශීය ඖෂධ නිෂ්පාදකයන්ගෙන් ඖෂධ වර්ග 305ක් ලබා ගැනීම සඳහා ඇණවුම් භාරදීම ප්‍රමාද වීමද තවත් හේතුවක් බව සෞඛ්‍ය අමාත්‍යංශය පවසයි.

එම ඖෂධ ලබා ගැනීම සඳහා වු ප්‍රසම්පාදන කමිටු රැස්වීමද පෙරේදා (28) පැවැත්වුවද අවසන් තීරණයක් ගෙන නොමැත.

මේ හේතුන් මත ලබන වසරේ පළමු මාස හය තුළ ඖෂධ හිඟයක් ඇතිවිය හැකි බැවින් එය මඟ හරවා ගැනීමට කටයුතු කරන මෙන් සෞඛ්‍ය ලේකම්වරයා නිලධාරින්ට උපදෙස් ලබාදී ඇත.

මූලාශ්‍රය – අරුණ

සබැඳි පුවත්
ලබන වසරේ ඖෂධ හිඟයක් හේතුව ; හරිනිගේ කැබිනට් පත්‍රිකාව දෙවරක් ප්‍රතික්ෂේප වීම
https://sinhala.srilankamirror.com/news/ලබන-වසරේ-ඖෂධ-හිඟයක්-හේතුව/

දේශීය නිෂ්පාදකයින් ඖෂධ සැපයීමට තවත් මාස 6ක් කල් ඉල්ලලා
https://sinhala.srilankamirror.com/news/දේශීය-නිෂ්පාදකයින්-ඖෂධ-ස/