විදේශිකයින් දෙදෙනෙකු හට පහරදීමේ සිද්ධියක් සම්බන්ධයෙන් වැඩතහනමකට ලක් වූ දුම්රිය සේවකයින් තිදෙනෙකු යළි සේවයේ පිහිටුවා තිබේ.
මූලික පරීක්ෂණවලින් අනතුරුව ඉදිරි විනය ක්‍රියාමාර්ගවලට යටත්ව එම අදාළ නිලධාරීන් යළි සේවයේ පිහිටුවා ඇති බව දුම්රිය දෙපාර්තමේන්තුව සඳහන් කළේය.
පසුගිය 05 වන දින කොළඹ සිට බදුල්ල බලා ධාවනය වූ දුම්රියේ වායූසමීකරණය කරන ලද පළමු පංතියේ මැදිරියක විදේශිකයින් දෙදෙනෙකු ප්‍රවේශ පත්‍ර නොමැතිව ගමන් කිරීම හේතුවෙන් කළහකාරී සිදුවීමක් ඇති වී තිබිණි.
එම සිදුවීම පදනම් කරගනිමින් දුම්රිය ස්ථානාධිපතිවරුන් දෙදෙනෙකු, දුම්රිය නියාමකවරයෙකුගේ සහ දුම්රිය ආරක්ෂක අංශ සාමාජිකයෙකුගේ සේවය අත්හිටුවීමට දුම්රිය දෙපාර්තමේන්තුව පියවර ගනු ලැබීය.
කෙසේවෙතත් අදාළ සිදුවීම සම්බන්ධයෙන් මූලික වාර්තාවක් කැඳවා ඉදිරි පරීක්ෂණවලට යටත්ව දුම්රිය ස්ථානාධිපතිවරුන් දෙදෙනා සහ දුම්රිය නියාමකවරයා යළි සේවයේ පිහිටුවා තිබේ.
අදාළ සිද්ධිය සම්බන්ධයෙන් වැඩතහනමට ලක් වූ නාවලපිටිය දුම්රිය ස්ථානයේ ආරක්ෂක අංශ කාර්යය භාර නිලධාරියාගේ තහනම තවදුරටත් ක්‍රියාත්මක බව දුම්රිය දෙපාර්තමේන්තුව සඳහන් කළේය.
සිදුකරන විමර්ශනවලින් අනතුරුව ඉදිරි ක්‍රියාමාර්ග ගැනීමට බලාපොරොත්තු වන බව දුම්රිය දෙපාර්තමේන්තුව සඳහන් කළේය.
