වී අලෙවි මණ්ඩලය මගින් නැවතත් වී මිලදී ගැනීමට රජය තීරණය කර තිබේ.
කෘෂිකර්ම අමාත්‍යාංශයේ දී අද (11) පැවැති සාකච්ඡාවකදී මෙම තීරණයට එළඹ ඇත.
එහිදී කෘෂිකර්ම අමාත්‍ය මහින්ද අමරවීර මහතා පැවසුවේ මිල කමිටුවේ තීරණය පරිදි නාඩු වී කිලෝවක් රුපියල් 95ක් හා කීරි සම්බා වී කිලෝවක් රුපියල් 110ක් බැගින් මිල දී ගැනීමට පියවර ගන්නා බවයි.
එමෙන්ම වී මිලදී මිලදී ගැනීම සඳහා රජයෙන් ලැබෙන මුදලට සරිලන පරිදි මිලදී ගැනීම් කටයුතු කරන බවද අමාත්‍යවරයා කියා සිටියේය.
රජය විසින් පසුගිය මහ කන්නයේ දී වී මිල දී ගැනීම සඳහා රුපියල් බිලියන 13ක් වෙන් කළ අතර වී අලෙවි මණ්ඩලය වී මිලදී ගැනීමෙන් ඉවත්වී දිසාපතිවරුන් සහ ප්‍රාදේශීය ලේකම්වරුන් මගින් වී මිලදී ගැනීමට කටයුතු කර තිබුණි.
ජනාධිපති රනිල් වික්‍රමසිංහ මහතාගේ තීරණයකට අනුව එලෙස මිලදී ගත් වී වලින් සැකසූ සහල් අඩු ආදායම්ලාභී පවුල් ලක්ෂ 29කට බෙදා දීමට කටයුතු කළ බව කෘෂිකර්ම අමාත්‍යාංශය පවසයි.
එක් පවුලක් සඳහා මාසයකට කිලෝ ග්‍රෑම් 10ක් බැගින් එම සහල් පසුගිය අප්‍රේල් හා මැයි මාසවල බෙදා දුන් බවද අමාත්‍යාංශය සඳහන් කර ඇත.
