සරසවි වරම් ලැබූ මාවරමණ්ඩිය නැණමල් රාජකීය විද්‍යාලයේ අධ්‍යාපනය ලැබු 14 හැවිරිදි දෙවුම් සනහස් රණසිංහ සිසුවා ඇගයීමේ විශේෂ උළෙලක් අද (05) එම විදුහලේ පවත්වා තිබේ.
විද්‍යාල ආචාර්ය මණ්ඩලය විසින් මෙම උළෙල සංවිධානය කර තිබූ අතර, විදුහල්පති එන්. ජී.රන්බණ්ඩා මහතා ඇතුළු ආචාර්ය මණ්ඩලය විසින් දෙවුම් සනහස් රණසිංහ සිසුවා පිළිගෙන උත්සව ශාලාව වෙත කැඳවා ගෙන විත් තිබුණි.
රණසිංහ සිසුවා 2020 වසරේ අ.පො.ස. සාමාන්‍ය පෙළ විභාගයෙන් සමත්ව, 2021 වසරේ දී වානිජ විෂය ධාරාව හදාරා අ.පො.ස. උසස් පෙළ විභාගය ගණකාධිකරණය , ආර්ථික විද්‍යාව හා ව්‍යාපාර අධ්‍යයන යන විෂයයන් තුනට ” B ” සමර්ථය ලබා ගනිමින් ද විශිෂ්ට ලෙස සමත් වී ඇත.
විශ්ව විද්‍යාල වරම් ලැබු ලාබාලම සිසුවා ලෙස සැලකෙන ඔහු, මෙවර ශ්‍රී ජයවර්ධනපුර විශ්ව විද්‍යාලයට ක්‍රීඩා විද්‍යාව හා කළමනාකරණ උපාධිය හැදැරීම සදහා තේරීපත් වී ඇත.
(ඡායා : ලංකාදීප)
