ශ්‍රී ලංකාවට පැමිණෙන සංචාරකයින්ට හානිදායක දේ සිදුකරන පුද්ගලයින්ට එරෙහිව කඩිනමින් දැඩි ක්‍රියාමාර්ග ගන්නා බවට සංචාරක රාජ්‍ය අමාත්‍ය ඩයනා ගමගේ අනතුරු අඟවා තිබේ.
ඇය මේ බව ප්‍රකාශ කළේ පසුගියදා අධික මිලකට කොත්තුවක් ලබා දීම සම්බන්ධයෙන් වෙළෙන්දෙකු හා සංචාරකයෙකු අතර ඇතිවූ සිදුවීම සම්බන්ධයෙන් මාධ්‍ය වෙත ප්‍රතිචාර දක්වමිනි.
වර්තමානයේ සංචාරකයින් මෝඩයන් නොවන බවත් ඔවුන් රැවටිය නොහැකි බවත් සඳහන් කළ රාජ්‍ය අමාත්‍යවරිය, ආගන්තුක සත්කාරයට ලැදි, මිත්‍රශීලී සංචාරක ගමනාන්තයක් ලෙස ශ්‍රී ලංකාවේ කීර්ති නාමයට මෙන්ම සෙසු ව්‍යාපාරිකයන්ගේ ජීවනෝපායට ද හානි නොවන පරිදි එවැනි හැසිරීම්වලින් වළකින ලෙස ඉල්ලා සිටියාය.
