සමඟි ජන බලවේගයේ පාර්ලිමේන්තු මන්ත්‍රි නලින් බණ්ඩාර ගමන් කළ ජීප් රථයේ ගැටී තුවාල ලබා දින 08ක් කොළඹ ජාතික රෝහලේ දැඩි සත්කාර ඒකකයේ ප්‍රතිකාර ගනිමින් සිටි තරුණයා ඊයේ (11) මියගොස් තිබේ.

මෙලෙස මියගොස් තිබුණේ තිහාරිය, කළගෙඩිහේන ප්‍රදේශයේ පදිංචි වයස අවුරුදු 22ක් වන ශානුක රවිඳු නමැති තරුණයෙකි.

මෙම තරුණයා යතුරුපැදි අලෙවි ව්‍යාපාරයක් කරගෙන ගිය අයෙක් බව පැවසේ.

අනතුරින් හිසට සිදුවූ බරපතළ තුවාල හේතුවෙන් දැඩි සත්කාර ඒකකයේ ජීවිතයත් මරණයත් අතර දැඩි සටනක නිරත වූ මෙම තරුණයාගේ මොළය මිය ගොස් ඇති බව වෛද්‍යවරු තීරණය කිරීමත් සමඟ ඔහුගේ වකුගඩු, අක්මාව ඇතුළු ශරීර අවයවයන් දන්දීමට තරුණයාගේ භාරකරුවන් කැමැත්ත පලකර තිබුණි.

ඒ අනතුරට පෙර සිටම ශානුක රවිඳුගේ කැමැත්ත මතයි.

ශානුක රවිඳු අනතුරට ලක්වුයේ පසුගිය 03දා අලුයම් කාලයේ දී යි.

පාර්ලිමේන්තු මන්ත්‍රී නලින් බණ්ඩාර මහතා ගමන්ගත් ජිප් රථය කොළඹ නුවර ප්‍රධාන මාර්ගයේ කෝන්ගස්දෙනිය හංදිය අසල දී තරුණයා ගමන්කරමින් සිටි යතුරුපැදියේ දී ගැටී තිබුණි..

ඒ අනුව අනතුරින් තුවාල ලැබු තරුණයා ප්‍රතිකාර සඳහා වතුපිටිවල මූලික රෝහලට ඇතුළත් කෙරුණි.

ඉන් පසුව වැඩිදුර ප්‍රතිකාර සඳහා මෙම තරුණයා කොළඹ ජාතික රෝහලට මාරුකර එවා තිබේ.

අනතුරින් පසු නිට්ටඹුව පොලිසියේ රථවාහන අංශය විසින් නලින් බණ්ඩාර මන්ත්‍රීවරයා ගමන්කළ ජිප් රථයේ රියදුරු අත්අඩංගුවට ගෙන තිබේ.

ඔහුව අත්තනගල්ල මහේස්ත්‍රාත් අධිකරණයට ඉදිරිපත් කිරීමෙන් පසු ශානුක රවිඳු රෝහල් ගතව සිටිය දීම ඔහුට රුපියල් 50,000ක සානුකම්පිත දීමනාවක් ලබාදෙන මෙන් නියෝගකරමින් රුපියල් ලක්ෂ දෙකක ශරීර ඇපයක් මත අදාළ රියදුරු මුදා හළ බව නිට්ටඹුව පොලිසිය සඳහන් කලේය.

සබැඳි පුවත් :
https://sinhala.srilankamirror.com/news/සජබේ-නලින්-අනතුරක-පැදිකර/