Connect with us

පුවත්

රට හොරු ටිකක් රාජ්‍ය බැංකුවක ATM සුද්ධ කරලා !

Published

on

රාජ්‍ය බැංකුවක ඒ.ටී.එම්. යන්ත්‍ර 03ක් හැක් කර රුපියල් කෝටියකට අධික මුදලක් සොරාගත් විදේශිකයන්ගෙන් සමන්විත කණ්ඩායම කොටු කර ගැනීමට පොලිස්පති නියමයෙන් අපරාධ පරීක්ෂණ දෙපාර්තමේන්තුව පුළුල් විමර්ශනයක් ආරම්භ කර ඇතැයි වාර්තා වේ. 

ඒ.ටී.එම්. යන්ත්‍ර සවි කර ඇති කුටිවලට ඇතුළු වී විද්‍යුත් උපකරණයක් ඊට සම්බන්ධ කර ඒ.ටී.එම්. යන්ත්‍රයේ මෘදුකාංග පද්ධතියට අනවසරයෙන් ඇතුළු වෙමින් යන්ත්‍රය තුළ ඇති සියලු මුදල් ගනිමින් ඔවුන් මේ සොරකම කරන බව ඒ සම්බන්ධයෙන් ගාල්ල, හික්කඩුව සහ බද්දේගම පොලිස් ස්ථාන මඟින් කළ මූලික විමර්ශනවලින් අනාවරණය වී ඇත.

හික්කඩුව, කරාපිටිය, බද්දේගම පිහිටි රාජ්‍ය බැංකුවක ඒ.ටී.එම්. යන්ත්‍ර 03කට මෙසේ ඉකුත් 30 වැනිදා අලුයම් කාලයේ ඇතුළු වී මේ විදේශිකයන් මුදල් සොරාගෙන ගොස් ඇති බව පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරි නීතිඥ නිහාල් තල්දූව මහතා පැවසීය.

පසුගිය 26 වැනිදා ද මේ විදේශිකයන් පිරිස නාරාහේන්පිට පිහිටි වෙනත් රාජ්‍ය බැංකුවක ඒ.ටී.එම්. යන්ත්‍රයකට ඇතුළු වී හානි කරමින් මුදල් සොරා ගැනීමකටද උත්සාහ දරා ඇති බවද පොලිසිය කියයි.

මේ විදේශිකයන් ඔවුන්ගේ මුහුණු හඳුනා ගැනීමට නොහැකි වන ලෙස මුහුණු ආවරණ පැලඳ කැප් එකක්ද දමාගෙන ඒ.ටී.එම්. යන්ත්‍ර කුටිය තුළට ඇතුළු වී මේ සොරකම කරන බව විමර්ශනවලින් පෙනී ගොස් තිබේ.

මේ සොරකම ගැන තොරතුරු හෙළි වී ඇත්තේ මුදල් සොරා ගැනීමෙන් පසු ඒ.ටී.එම්. යන්ත්‍රයේ දත්ත පද්ධතිය තුළ මුදල් තවදුරටත් ඇති බව පෙන්නුම් කිරීමෙන්ය. 

ඒ.ටී.එම්. යන්ත්‍රයේ මුදල් නැතිව එසේ මුදල් ඇති බව පෙන්නුම් කිරීමත් බැංකු ගනුදෙනුකරුවන් කිසිවකු සිය කාඩ්පත් යොදා මුදල් නොගෙන මුදල් සියල්ලක්ම අතුරුදන් වීමත් ගැන සොයා බැලීමේදී මේ සොරකම ගැන තොරතුරු බැංකු නිලධාරීන්ට මුලින්ම හසු කර ගැනීමට හැකිව තිබේ.

මේ විදේශිකයන් හික්කඩුවේ පිහිටි බැංකුවට ඇතුළු වී එහි ඒ.ටී.එම්. යන්ත්‍රය හැක් කර ඇත්තේ 30 වැනිදා අලුයම 1.40ට පමණය. 

මෝටර් රථයකින් පැමිණි ඔවුන් මඳ වේලාවක් එහි රැඳී සිටිමින් එහි ඒ වන විට තිබුණු සියලු මුදල් දිගටම ඒ.ටී.එම් යන්ත්‍රයෙන් පිටතට ගෙන තිබේ. 

එසේ ඒ.ටී.එම්. යන්ත්‍රයෙන් පිටතට ගත් මුදල් ප්‍රමාණය රුපියල් හතළිස් හයලක්ෂ අසූ දහසක මුදලකි.

අනතුරුව ඔවුන් ගොස් ඇත්තේ කරාපිටියේ පිහිටි ඒ.ටී.එම්. යන්ත්‍රය වෙතය. 

අලුයම 3.22ට පමණ ඔවුන් යන්ත්‍රය පිහිටි කුටියට ඇතුළු වී එය හැක් කළත් ඔවුන්ට ගැනීමට හැකියාව ලැබී ඇත්තේ රුපියල් දෙලක්ෂ හැත්තෑ පන්දහසක මුදලක් පමණි. 

ඊට මුල් වී ඇත්තේ සුදු ජාතික විදේශිකයන් දෙදෙනකු ඒ.ටී.එම්. යන්ත්‍රය පිහිටි කුටියේ වැඩි වේලාවක් රැඳී සිටීම හේතුවෙන් බැංකු ආරක්ෂකයා ඒ ගැන විමසිලිමත් වීම හේතුවෙන් ඒ වන විට ලද මුදල පමණක් රැගෙන ඔවුන් පිටව යෑමය.

තෙවැනි සොරකම සිදු වන්නේ බද්දේගම පිහිටි ඒ.ටී.එම්. යන්ත්‍රය තුළය. 

පෙර මෙන්ම ඔවුන් එම යන්ත්‍රයද හැක් කර සොරාගෙන ඇති මුදල් ප්‍රමාණය රුපියල් පනස්හත් ලක්ෂයකි.

මේ විදේශිකයන් ඒ.ටී.එම්. යන්ත්‍රයේ මෘදුකාංග පද්ධතියට ඇතුළු වන්නේ ඔවුන් සතුව ඇති කුඩා උපකරණයක ආධාරයෙන් බවද විමර්ශනවලින් පෙනී ගොස් ඇත. එම උපකරණය ඒ.ටී.එම්. යන්ත්‍රය හා සම්බන්ධ කර ඇතැයි පෙනී ගොස් ඇත්තේ බැංකු කාඩ්පතක් ඒ.ටී.එම්. යන්ත්‍රයට ඇතුළු කර ගනුදෙනුවක් කිරීමත් සමඟිනි. මේ විදේශිකයන් ඒ.ටී.එම්. යන්ත්‍රය අසල රැඳී සිටිමින් ගනුදෙනුකරුවකු ඒ.ටී.එම්. යන්ත්‍රයෙන් මුදල් ගැනීමත් සමඟ ඊට ඇතුළු වී සිය උපකරණ යන්ත්‍රය හා සම්බන්ධ කරමින් මේ සොරකම කරන බව පෙනී ගොස් තිබේ. 

මේ කටයුත්ත ඔවුන් කරනු ලබන්නේ ඒ.ටී.එම්. යන්ත්‍රයේ සවි කර ඇති ආරක්ෂක කැමරාව වැසෙන සේ ස්ටිකරයක් අලවමිනි.

මේ විදේශිකයන් ගමන් කළ මෝටර් රථයේ අංකය ඔස්සේ කළ විමර්ශනයේදී පෙනී ගොස් ඇත්තේ එම මෝටර් රථය ගම්පහ පුද්ගලයකුට අයත් එකක් බවටය. 

එම මෝටර් රථය පරීක්ෂා කිරීමේදී පෙනී ගොස් ඇත්තේ විදේශිකයන් ඒ.ටී.එම්. යන්ත්‍ර අසලට පැමිණි මෝටර් රථයේ වර්ගය සහ ගම්පහ පුද්ගලයාගේ නමින් ලියාපදිංචි වී ඇති මෝටර් රථයේ වර්ගය වෙනස් බවය. 

ඒ අනුව පැහැදිලි වී ඇත්තේ ව්‍යාජ අංක තහඩු සවි කළ මෝටර් රථයකින් පැමිණ මේ සොරකම කර ඇති බවය.

මේ විදේශිකයන් පැමිණ ඇත්තේ අම්බලන්ගොඩ පැත්තේ සිට බවත් ඒ අය අධිවේගි මාර්ගය භාවිත කරමින් ගාල්ලට පැමිණ සහ ගාල්ලෙන් පිටව ගොස් තිබෙන බව පෙනී යන්නේ යැයි උසස් පොලිස් නිලධාරියෙක් පැවසීය. 

ඒ සම්බන්ධයෙන්ද විමර්ශනයක් පැවැත්වෙන බව උසස් පොලිස් නිලධාරියෙක් පැවසීය.

මූලාශ්‍රය – දිනමිණ

පුවත්

ග්‍රාම නිලධාරීන් දේශපාලන රැස්වීම් වර්ජනයක

Published

on

By

දේශපාලනඥයන් සහභාගී වන කිසිදු උත්සවයකට සහභාගී නොවීමට ශ්‍රී ලංකා එක්සත් ග්‍රාම නිලධාරීන්ගේ සංගමය තීරණය කර තිබේ.

සිය වැටුප් ගැටලුවට විසඳුම් ලබා දෙන තෙක් මෙම තීරණයෙහි සිටින බව පවසන සංගමය ඊට අමතරව ඉඩම් ඔප්පු සැකසීම සහ ජාතික හැඳුනුම්පත් සඳහා කටයුතු කිරීම ආදී සියලුම රාජකාරිවලින් ඉවත්ව සිටින බවද පවසයි.

එම සංගමයේ උප සභාපති දයාන් අබේරත්න මහතා මේ බව පැවසිය  

Continue Reading

පුවත්

ධීවර යාත්‍රාවක් නැවක ගැටී අනතුරක්

Published

on

By

බහුදින ධීවර යාත්‍රාවක් අනතුරට පත්වීමෙන් එහි සිටි එක් ධීවරයෙකු මියගොස් තවත් ධීවරයෙකු අතුරුදන්ව තිබේ.

පසුගිය 12 වනදා වාලච්චේන ධීවර වරායෙන් ධීවරයින් පස්දෙනෙකු ධීවර කටයුතු සඳහා බහුදින ධීවර යාත්‍රාවකින් මුහුදු ගොස් සිටිය දී වරායේ සිට කිලෝ මීටර් 47ක් පමණ දුරින් මෙම අනතුර සිදුව ඇත.

මෙම බහුදින ධීවර යාත්‍රාව ධීවර කටයුතු සිදුකරමින් සිටි ප්‍රදේශයේ පැවති අධික වර්ෂාව හේතුවෙන් ඒ ආසන්යෙන් ගමන් කරමින් තිබූ නැවක ගැටී මෙම අනතුර සිදුව ඇති බවට දැනට සිදු කරන ලද විමර්ශන වලදී අනාවරණය වී ඇති බව පොලීසිය පවසයි.

අනතුරින් 47 හැවිරිදි නින්දවූර් ප්‍රදේශයේ පදිංචිකරුවෙකු දියේ ගිලී මියගොස් ඇති අතර 60 හැවිරිදි මුහුදු වෙරළ පාර, ඔලුවිල් හි පදිංචි ව සිටි තවත් පුද්ගලයෙකු අතුරුදන්ව ඇත.

එක් පුද්ගලයෙකු තුවාල ලබා ත්‍රිකුණාමලය රෝහලේ ප්‍රතිකාර ලබමින් සිටියි.

අනෙක් පුද්ගලයින් දෙදෙනා අනතුරින් තුවාල ලබා නොමැති බව සඳහන් වේ.

නාවික හමුදාව විසින් වෙනත් ධීවර බෝට්ටුවක සහාය ඇති ව මෙම පුද්ගලයින් බේරා ගැනීමට කටයුතු කර ඇත.

වාලච්චේන පොලීසිය වැඩිදුර විමර්ශන සිදුකරයි.

Continue Reading

පුවත්

මත් කුඩු කිලෝ 450ක් අද පුත්තලමේදී විනාශ කෙරේ

Published

on

By

පොලිසිය ඇතුළු ආරක්ෂක අංශ අත්අඩංගුවට ගත් මත්ද්‍රව්‍ය කිලෝ 450 කට අධික තොගයක් විනාශ කිරීම අද  පස්වරු 5.00 ට මහජන ආරක්ෂක අමාත්‍ය ටිරාන් අලස්, පොලිස්පති දේශබන්දු තෙන්නකොන් යන මහත්වරුන්ගේ ප්‍රධානත්වයෙන් පුත්තලම වනාතවිල්ලුව ප්‍රදේශයේදී සිදු කෙරේ.

පොලිස් විශේෂ කාර්ය බළකාය විසින් වනාතවිල්ලුව ලැක්ටෝස් වත්ත ප්‍රදේශයේ අලුතින් ඉදිකළ අධිබලැති නව දහන උදුනක් මගින් මෙම මත්ද්‍රව්‍ය තොගය විනාශ කරනු ලබයි.

පොලිසිය, පොලිස් මත්ද්‍රව්‍ය කාර්යාංශය, පොලිස් විශේෂ කාර්ය බළකාය, නාවික හමුදාව, යුද හමුදාව ඇතුළු ආරක්ෂ අංශ විසින් පසුගිය කාලවකවානුවේ විශාල මත්ද්‍රව්‍ය තොගයක් අත්අඩංගුවට ගනු ලැබීය.

ඒ අනුව දැනට නඩු කටයුතු අවසන් කර ඇති මත්ද්‍රව්‍ය තොගයක් මෙසේ විනාශ කෙරන බව පොලිස් මාධ්‍ය ප්‍රකාශක කාර්යාලය පැවසීය.

Continue Reading
Advertisement

Trending

Copyright © 2023 Sri Lanka Mirror. All Rights Reserved