2025 මාර්තු 15 සිට 31 දක්වා පැවැත්වෙන රාමසාන් සංස්කෘතික උත්සවය ඉලක්ක කරගනිමින්, බස්නාහිර පළාත් සභාව විසින් රාමසාන් සංස්කෘතික උත්සවයක් සංවිධානය කිරීමට සැලසුම් කර තිබේ.
ශ්‍රී ලංකාවේ වෙසෙන මුස්ලිම් ජනතාවගේ සංස්කෘතික සහ සාම්ප්‍රදායික උරුමය පිළිබඳව ජනතාව අතර වඩාත් අවබෝධයක් ඇති කිරීම මෙහි අරමුණයි.
මෙම උත්සවය පැවැත්වීම පිළිබඳව සැලසුම් සකස් කිරීම වෙනුවෙන් ඊයේ (05) ආණ්ඩුකාරතුමාගේ ප්‍රධානත්වයෙන් බස්නාහිර පළාත් ආණ්ඩුකාර කාර්යාලයේදී රැස්වීමක් පැවැත්වුණි.
එහිදී ආණ්ඩුකාර හනීෆ් යූසුෆ් මහතා කියා සිටියේ මෙම උත්සවය සාර්ථකව පැවැත්වීම සඳහා බස්නාහිර පළාතේ සෑම ආයතනයක් සමගම සහයෝගයෙන් කටයුතු කරන ලෙසය.
බස්නාහිර පළාත් ආණ්ඩුකාර හනීෆ් යූසුෆ් මහතාගේ අධීක්ෂණය සහ උපදෙස් මත මෙම උත්සවය සංවිධානය කිරීමට රිසාන් නාසීර් මහතාගේ සභාපතීත්වයෙන් යුත් විශේෂ කමිටුවක්ද පත් කර තිබේ.
මුස්ලිම් ජන කොටස්වල ආහාර, සංස්කෘතිය සහ සාම්ප්‍රදායික අංග මෙම උත්සවය තුළ ප්‍රදර්ශනය කෙරෙන අතර, එය ආගමික සහජීවනය මෙන්ම ආර්ථික සහභාගීත්වය වර්ධනය කිරීමටද උපකාරී වනු ඇත.
ඊයේ දින පැවති මෙම සාකච්ඡාවට ශ්‍රී ලංකා සංචාරක සංවර්ධන අධිකාරිය, ශ්‍රී ලංකා සංචාරක ප්‍රවර්ධන කාර්යාංශය, ශ්‍රී ලංකා පොලිස් නාගරික ආරක්ෂක අංශය (කොළඹ), කොළඹ මහ නගර සභාව, කොළඹ දිස්ත්‍රික් මස්ජිඩ් සංගමය, , ශ්‍රී ලංකා මැලේ සම්මේලනය සහ බටහිර පළාත් ආණ්ඩුකාර කාර්යාලයේ නිලධාරීන් ද එක්ව සිටියහ.
මෙම හමුවේ දී මාර්තු 21 දින සිට 31 දක්වා නගරයේ මංමාවත් ආදී නගර අලංකරණ කටයුතු කිරීමටත්, මෙම දින දහය ඇතුලත එක් දිනයක දී සංස්කෘතික උත්සවය පැවැත්වීමටත් එකඟ වී තිබේ.
මේ මොහොතේ රට තුළ සියලුම ආගමික සහ සංස්කෘතික උත්සවයන් පැවැත්වීමේ වැදගත්කම පිළිබඳව අවධාරණය කරමින් ආණ්ඩුකාර හනීෆ් යූසුෆ් මහතා ප්‍රකාශ කර සිටියේ රාමසාන් උත්සවය මෙන්ම බස්නාහිර පළාත තුළ අලුත් අවුරුදු උත්සවය, පාස්කු උත්සවය, වෙසක් සහ පොසොන් උත්සවයන්ද අරුතක් සහිතව සමරන්නට කැපවී සිටින බවය.
