දකුණු පළාත ආශ්‍රිතව විශේෂ අපරාධ මර්ධන කොට්ඨාස 02ක් පිහිටුවා තිබේ.

පොලිසිය සඳහන් කළේ, ගාල්ල අපරාධ කොට්ඨාසය සහ මාතර අපරාධ කොට්ඨාසය ලෙස එම ඒකක ක්‍රියාත්මක බවය.

මාතර කොට්ඨාශය මඟින් මාතර සහ හම්බන්තොට දිස්ත්‍රික්ක ආශ්‍රිතව සිදුවන විශේෂ ගණයේ අපරාධ ක්‍රියාමැඩලීමට ක්‍රියාත්මක අතර ගාල්ල අපරාධ කොට්ඨාසය මඟින් ගාල්ල දිස්ත්‍රික්කය ආශ්‍රිත විශේෂ ගණයේ අපරාධ ක්‍රියාමැඩලීමට නිලධාරීන් අනියුක්ත කෙරෙන බව පොලීසිය පැවසුවේ ය.

පොලිසිය සඳහන් කළේ, මාතර අපරාධ කොට්ඨාසය අද(14) මිරිස්ස ප්‍රදේශයේදී විවෘත වන බවය.

ඒ, දකුණු පළාත භාර ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතාගේ ප්‍රධානත්වයෙනි.

නව ඒකකය විශේෂ පුහුණුව ලද නිලධාරීන් 30 දෙනෙකුගෙන් සමන්විත වන අතර විශේෂ අවි ආයුධ පුහුණුවකින් නිලධාරීන් බල ගන්වා ඇති බව පොලිසිය පවසයි.

අදාළ ඒකකයට අධි සන්නිවේදන තාක්ෂණික උපකරණ සම්බන්ධ කර ඇති අතර, හඹාගෙන ගොස් අත්අඩංගුවට ගැනීම සඳහා ද, අදාළ නිලධාරීන් පුහුණුව ලැබූවන් වේ.

මේ අතර, ගාල්ල අපරාධ කොට්ඨාශය ඉතා කෙටිකාලයක් ඇතුළත අම්බලන්ගොඩදී විවෘත කිරිමට නියමිත බව ද, පොලීසිය පැවසුවේය .