Connect with us

ඡායාරූප සටහන

චීනයේ සහයට ගිය ලාංකික නාවිකයින් ට චීන රජයෙන් හරසර (ඡායා)

Published

on

පසුගිය මාසයේදී ශ්‍රී ලංකාවට දකුණින් ගැඹූරු මුහුදේ නාවිකයින් 39 දෙනෙකු සමග අනතුරට පත්වු, චීනයට අයත් ලූපෙන් යුවාන් යු 028 ධීවර යාත්‍රාවේ මුදා ගැනීමේ කටයුතු සඳහා එක්වු නාවික හමුදා සමාජිකයින් වෙත චීන රජයේ උපහාර පිදීමේ උත්සවයක් පෙරේදා (06) කොළඹ දී පැවැත්වුණි. 

මෙම අවස්ථාවට මෙරට චීන තානාපති – චී ජන්හොං, ජනාධිපති කාර්ය මණ්ඩල ප්‍රධානී සාගල රත්නායක, මෙරට සිටින ඉන්දුනීසියානු තානාපතිනි – ඩිවි ගුස්ටිනා ටෝබිං, මෙරට සිටින ඕස්ට්‍රේලියානු මහ කොමසාරිස් – පෝල් ස්ටීවන්ස්, ප්‍රවාහන හා ජනමාධ්‍ය අමාත්‍ය – ආචාර්ය බන්දුල ගුණවර්ධන, ආරක්‍ෂක රාජ්‍ය අමාත්‍ය – ප්‍රමිත බණ්ඩාර තෙන්නකෝන්, විදේශ කටයුතු රාජ්‍ය අමාත්‍ය – තාරක බාලසූරිය, ආරක්‍ෂක මාණ්ඩලික ප්‍රධානී – ජෙනරාල් ශවේන්ද්‍ර සිල්වා, යුධ හමුදාපති – ලුතිනන් ජෙනරාල් විකුම් ලියනගේ, නාවික හමුදාපති – වයිස් අද්මිරාල් ප්‍රියන්ත පෙරේරා, ශ්‍රී ලංකා නාවික නෞකා විජයබාහු නෞකාවේ අණදෙන නිලධාරී සහ කාර්ය මණ්ඩලය, රාජ්‍යතාන්ත්‍රිකයින් ඇතුළු සම්භාවනීය අමුත්තන් පිරිසක් එක්විය.

නාවික හමුදාව විසින් සැකසූ, මෙම මෙහෙයුමේ දසුන් ඇතුළත් වීඩියෝවක්ද මෙම උත්සවයේදී ප්‍රදර්ශනය වූ අතර, අනතුරෙන් මියගිය පුද්ගලයන් සිහිකරමින් විනාඩියක නිශ්ශබ්දතාවයක්ද පවත්වුණු ලැබුණි.

ශ්‍රී ලංකා නාවික නෞකා විජයබාහු නෞකාවේ කිමිදුම් කණ්ඩායමේ ලුතිනන් කමාන්ඩර් එස්.ඒ.අයි.ඒ. සුභසිංහ ඇතුළු නාවික පුද්ගලයන් නව දෙනා හට මෙහිදී පුෂ්පෝහාර ද පුදනු ලැබුණි.

නාවිකයින් 39 දෙනෙකු රැගත් චීනය අයත් Lupeng Yuanyu 028 ධීවර යාත්‍රාව මැයි 16දා ශ්‍රී ලංකාවට දකුණින් ගැඹූරු මුහුදේ ගිලී ගිය අතර විපතට පත්වූවන් මුදාගැනීමේ මෙහෙයුමට චීනයේ ඉල්ලීම පරිදි ශ්‍රී ලංකා නාවික හමුදාව ද එක්වුණි.

මේ සඳහා එම යාත්‍රාව පිහිටි මුහුදු ප්‍රදේශය වෙත ළඟාවූ ශ්‍රී ලංකා නාවික නෞකා විජයබාහු නෞකාවේ කිමිදුම් කණ්ඩායම, ආපදාවට පත් ධීවර යාත්‍රාවේ ඇතුලත තවදුරටත් සිරවී සිටිය හැකි බවට සැකකෙරෙන කාර්යය මණ්ඩලය මුදවා ගැනීම සඳහා කිමිදුම් මෙහෙයුමක් සිදු කරන ලදි. එම මුහුදු ප්‍රදේශයේ පැවති රළු ස්වභාවය මධ්‍යයේ දින 03ක් පුරා ඉතා අසීරු කිමිදුම් මෙහෙයුමක් සිදුකරමින් ධීවර යාත්‍රාවේ නවාතැන් මැදිරි ප්‍රදේශයෙන් මළ සිරුරු 02ක් සොයා ගැනීමටත්, අනෙකුත් මැදිරි තුළ නරක් වූ මළසිරුරු 12ක් හඳුනා ගැනීමටත් නාවික හමුදා කිමිදුම් කණ්ඩායම සමත් විය. එම අසීරු කිමිදුම් මෙහෙයුම අවසන් කර පැය 24 ක් ඇතුළත ආපදාවට පත් චීන ධිවර යාත්‍රාව සම්පූර්ණයෙන් ගැඹුරු මුහුදේ ගීලී ගොස් ඇති අතර, එවැනි ඉතාමත් අවධානම් සහගත තත්වයක් යටතේ ජීවිත අවදානමද නොතකා ශ්‍රී ලංකා නාවික හමුදාව විසින් සිදුකල සුවිශේෂි කිමිදුම් මෙහෙයුම ජාත්‍යන්තරයේ විශේෂ පැසසුමට ලක්විය.

මෙහිදී අදහස් දැක්වූ ශ්‍රී ලංකාවේ චීන තානාපති චී ජන්හොං මහතා පවසා සිටියේ ජීවිත අවදානම නොතකා මුලින්ම නැවට ඇතුල්වූයේ ශ්‍රී ලාංකික කිමිදුම්කරුවන් බවත්, මෙම විශේෂ මිතුදම චීන වැසියන් මෙන්ම විපතට පත් යාත්‍රාවේ සිටියවුන්ගේ පවුල් වල සාමාජිකයන් හට සැමදා මතකයේ රැඳෙනු ඇති බවයි.

එම අවස්ථාවේදී පූර්ණ සහාය ලබා දීමට ගත් තීරණාත්මක හා කාලෝචිත තීරණය වෙනුවෙන් ශ්‍රී ලංකා ජනාධිපතිවරයාට හා සියලු ආරක්ෂක නිලධාරීන් හට ස්තූතිය පුද කළ තානාපතිවරයා, මෙම මුදාගැනීමේ මෙහෙයුමට නන් අයුරින් සහය දැක්වූ සියළු රටවල් මෙහිදී කෘතඥපූර්වකව මතක් කළ සිටියේය.

උත්සවය ඇමතූ නාවික හමුදාපති – වයිස් අද්මිරාල් ප්‍රියන්ත පෙරේරා පවසා සිටියේ ලංකාවෙන් මෙතරම් දුර මුදවාගැනීමේ මෙහෙයුමකට නාවික හමුදාව සහභාගී වූයේ පළමු වරට බවයි. අනතුරට පත් නෞකාව චීන නෞකාවක් බවත්, එය අනතුරට පත් වූයේ ඕස්ට්‍රේලියානු මුදවාගැනීමේ කලාපයේ බවත්, ශ්‍රී ලංකා නාවික නෞකා විජයබාහු නෞකාව ඇමෙරිකාවෙන් ලබාදුන් නෞකාවක් බවත්, මෙහෙයුමට සහභාගී වූ කිමිදුම්කරුවන්ගෙන් 95%ක් ඉන්දියාවේ පුහුණුව ලැබූවන් බවත් පෙන්වා දුන් නාවික හමුදාපතිවරයා, මෙය සැබවින්ම ‘ජාත්‍යන්තර උත්සහයක්’ බව පැවසීය.

වචන ස්වල්පයක් එක් කරමින් ජනාධිපති කාර්ය මණ්ඩල ප්‍රධානී සාගල රත්නායක මහතා, ශ්‍රී ලංකා නාවික නෞකා විජයබාහු නෞකාවේ සියල්ලන්ගේම නිර්භීතකම අගය කළ අතර, විජයබාහු නෞකාවේ සියලු නාවිකයන්ට මෙම අවස්ථාවට ආරාධනා කිරීම සම්බන්ධයෙන් සිය ස්තූතිය චීන තානාපති කාර්යාලයට පුද කළේය.

මෙමගින් තවදුරටත් චීන – ශ්‍රී ලංකා සබඳතා ශක්තිමත් වනු ඇතැයි බලාපොරොත්තු වන බවත්, ඉදිරියේදීද ණය ප්‍රතිව්‍යුහගතකිරීමේ කටයුතු වලදී තවදුරටත් චීනයේ සහය ලැබෙනු ඇතැයි බලාපොරොත්තු වන බවත් රත්නායක මහතා වැඩිදුරටත් පැවසීය.

ඡායාරූප සටහන

ලෝක බැංකු සභාපති – ජනපති හමු වෙයි (ඡායා)

Published

on

By

මෙරටට පැමිණ සිටින ලෝක බැංකු සමූහයේ සභාපති අජේ බංගා  (Ajay Banga) මහතා සහ ජනාධිපති අනුර කුමාර දිසානායක මහතා අතර හමුවක් අද (07) පස්වරුවේ ජනාධිපති කාර්යාලයේදී සිදු විය.

මෙලෙස ලෝක බැංකු සභාපතිවරයෙක් ශ්‍රී ලංකාවට පැමිණ ඇත්තේ වසර 20කට පමණ පසුව වීමද විශේෂත්වයකි. 

ශ්‍රී ලංකාවේ ඉදිරි සංවර්ධන අරමුණු ජය ගැනීමට ලෝක බැංකු  සමූහයේ සහාය ලබා දිය හැක්කේ කෙසේද යන්න පිළිබඳව මෙහිදී පුළුල් ලෙස සාකච්ඡා කෙරිණි. 

ඩිජිටල්කරණය, සංචාරක කර්මාන්තය, කෘෂි කර්මාන්තය සහ යටිතල පහසුකම් ක්ෂේත්‍රය ඇතුළු කෙටිකාලීව ප්‍රතිලාභ ලබා ගත හැකි ක්ෂේත්‍ර හඳුනා ගනිමින් එහි ප්‍රවර්ධනයට කටයුතු කිරීම මෙන්ම උතුරු නැගෙනහිර සංවර්ධනය පිළිබඳවද මෙහිදී විශේෂ අවධානය යොමු විය.

නව ආයෝජන මෙරටට ආකර්ෂණය කර ගැනීම සඳහා අවශ්‍ය නෛතික රාමුව සකස් කිරීමට මේ වන විට ශ්‍රී ලංකා රජය ගෙන ඇති පියවර සහ ඒ වෙනුවෙන් වූ රජයේ ප්‍රතිපත්තිමය වැඩපිළිවෙළ පිළිබඳවද මෙහිදී සාකච්ඡා විය. 

ලෝක බැංකු සමූහයේ විශේෂ උපදේශක ට්‍රෙවර් කින්කේඩ්(Trevor Kincaid), ශ්‍රී ලංකාව, නේපාලය සහ මාලදිවයින සඳහා ලෝක බැංකුවේ අධ්‍යක්ෂ ඩේවිඩ් සිස්ලන් (David Sislen), ජාත්‍යන්තර මූල්‍ය සමාගමේ දකුණු ආසියානු කලාපීය අධ්‍යක්ෂ ඉමාද් ෆැකවුරි (Imad Fakhoury),  ලෝක බැංකුවේ මාලදිවයින සහ ශ්‍රී ලංකාව සඳහා  නේවාසික නියෝජිත ගිවෝර්ග් සාර්කස්ජාන් (Gevorg Sargsyan)  යන මහත්වරුද මීට එක්ව සිටියහ. 

ශ්‍රී ලංකා රජය වෙනුවෙන් කම්කරු අමාත්‍ය  සහ ආර්ථික සංවර්ධන නියෝජ්‍ය අමාත්‍ය අනිල් ජයන්ත ප්‍රනාන්දු,  මුදල් හා ක්‍රම සම්පාදන නියෝජ්‍ය අමාත්‍ය හර්ෂණ සුරියප්පෙරුම, ජනාධිපති ජ්‍යෙෂ්ඨ අතිරේක ලේකම් රසල් අපොන්සු යන මහත්වරු ඇතුළු පිරිසක්ද මෙම අවස්ථාවට සහභාගී වූහ. 

(ජනාධිපති මාධ්‍ය අංශය)

Continue Reading

ඡායාරූප සටහන

ජනපති, අගමැති, විපක්ෂනායක හා පක්ෂනායකයින් අද ඡන්දය ප්‍රකාශ කල අයුරු

Published

on

By

2025 පළාත් පාලන මැතිවරණයට අදාළව ජනාධිපති අනුර කුමාර දිසානායක මහතා මරදාන පංචිකාවත්ත අබේසිංහාරාම සයිකෝජි පෙර පාසලේදී අද (06) පස්වරුවේ සිය ඡන්දය ප්‍රකාශ කළේය .

සිය ඡන්දය ප්‍රකාශ කිරීමෙන් අනතුරුව මාධ්‍ය වෙත අදහස් පළ කළ ජනාධිපති අනුර කුමාර දිසානායක මහතා ජනාධිපතිවරණ ජයග්‍රහණයෙන් පසුව මේ රට තුළ ඇති කළ සාමකාමී ප්‍රජාතන්ත්‍රවාදී නිදහස ඉදිරියේ පැවැත්වෙන සියලු මැතිවරණවලදීත් ජනතාව අපේක්ෂා කරන බව කියා සිටියේය.

මෙවර පළාත් පාලන මැතිවරණය වෙනුවෙන් අග්‍රමාත්‍ය ආචාර්ය හරිනි අමරසූරිය මෙනෙවිය සිය ඡන්දය ප්‍රකාශ කලේ කෝට්ටේ, මිරිහාන සමෘද්ධි ගොඩනැගිල්ලේ පිහිටි ඡන්ද මධ්‍යස්ථානයේදී ය.

විපක්ෂ නායක සජිත් ප්‍රේමදාස මහතා සිය ඡන්දය ප්‍රකාශ කලේ රාජගිරිය කොටුවේගොඩ විවේකාරාම පුරාණ විහාරස්ථානයේ පිහිටි චන්ද්‍රාලෝක දහම් පාසල් ගොඩනැගිල්ලේ පිහිටි ඡන්ද මධ්‍යස්ථානයේදීය.

ශ්‍රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා අද පළාත් පාලන මැතිවරණය වෙනුවෙන් සිය ඡන්දය භාවිතා කර තිබුණේ මැදමුලන ඩී. ඒ. රාජපක්ෂ විද්‍යාලයේ පිහිටි ඡන්ද මධ්‍යස්ථානයේදී ය.

හිටපු ජනාධිපති රනිල් වික්‍රමසිංහ මහතා  සිය ඡන්දය භාවිතා කර තිබුණේ කොළඹ විශ්ව විද්‍යාලයේ පිහිටි ඡන්ද මධ්‍යස්ථානයේදී ය.

සර්වජන බලය පක්ෂ නායක දිලිත් ජයවීර මහතා පළාත් පාලන මැතිවරණය වෙනුවෙන් සිය ඡන්දය භාවිතා කර ඇත්තේ මිරිහාන ශ්‍රී චන්දාරාම විහාරයේ පිහිටි ඡන්ද මධ්‍යස්ථානයේදී ය.

 මහ නගර සභා 28ක් නගර සභා 36ක් ඇතුළු පළාත් පාලන ආයතන 336කට නියෝජිතයන් අසන්න වශයෙන් 8000කට වැඩි සංඛ්‍යාවක් මෙවර පළාත් පාලන මැතිවරණයේදී තෝරාගැනීමට නියමිත ය.

Continue Reading

ඡායාරූප සටහන

ශ්‍රී ලංකාව හා වියට්නාමය අතර අවබෝධතා ගිවිසුම් 04ක්

Published

on

By

ශ්‍රී ලංකාව හා වියට්නාමය අතර ක්ෂේත්‍ර කිහිපයකට අදාළව අවබෝධතා ගිවිසුම් 04ක් හා එකඟතා ගිවිසුමකට අත්සන් තැබීම ජනාධිපති අනුර කුමාර දිසානායක හා වියට්නාම් ජනාධිපති ලුඕං කුඕං මහත්වරු ඉදිරියේ සිදු විය.

වියට්නාම ජනාධිති මන්දිරයේ දෙරට අතර අද (05) පැවැති ද්වීපාර්ශ්වික සාකච්ඡාවලින් අනතුරුව මෙම අවබෝධතා ගිවිසුම් හා එකඟතා  ගිවිසුමට අත්සන් තබනු ලැබීය.

මෙහිදී වියට්නාම සමාජවාදී ජනරජය සහ ශ්‍රී ලංකා ප්‍රජාතාන්ත්‍රික සමාජවාදී ජනරජය අතර රේගු කටයුතු සම්බන්ධයෙන් සහයෝගීතාව සහ අන්‍යෝන්‍ය සහාය පිළිබඳ එකඟතාවයකට පැමිණ ඇත. 

වියට්නාමයේ කර්මාන්ත හා වෙළෙඳ අමාත්‍යාංශය සහ ශ්‍රී ලංකාවේ කර්මාන්ත හා ව්‍යවසායකත්ව සංවර්ධන අමාත්‍යාංශය අතර යන්ත්‍රෝපකරණ නිෂ්පාදන සහයෝගීතාව පිළිබඳ අවබෝධතා ගිවිසුම, වියට්නාමයේ කෘෂිකර්ම විද්‍යා ඇකඩමිය සහ ශ්‍රී ලංකාවේ කෘෂිකර්ම දෙපාර්තමේන්තුව අතර කෘෂිකර්ම සහයෝගීතාව පිළිබඳ අවබෝධතා ගිවිසුම, ශ්‍රී ලංකා බණ්ඩාරනායක ජාත්‍යන්තර රාජ්‍යතාන්ත්‍රික පුහුණු ආයතනය සහ වියට්නාමයේ රාජ්‍යතාන්ත්‍රික ඇකඩමිය අතර අවබෝධතා ගිවිසුම හා වියට්නාම වෙළෙඳ ප්‍රවර්ධන නියෝජිතායතනය සහ ශ්‍රී ලංකා අපනයන සංවර්ධන මණ්ඩලය අතර අවබෝධතා යන ගිවිසුම්වලට මෙහිදී අත්සන් තැබිණි.

මෙම ගිවිසුම් මඟින් විශේෂඥතාව බෙදා ගැනීම, රාජ්‍යතාන්ත්‍රිකයින්, විද්වතුන්, නිලධාරින්, විශේෂඥයින් සහ පර්යේෂකයින් හුවමාරු කර ගැනීම මෙන්ම අධ්‍යයන හා පර්යේෂණ වැඩසටහන්, විවිධ පාඨමාලා, සම්මන්ත්‍රණ, රාජ්‍යතාන්ත්‍රික ක්ෂේත්‍රයේ අනෙකුත් අධ්‍යයන කටයුතු සහ පුහුණුවීම්වලට අදාළ විශේෂඥතාව සංවිධානය කිරීම සහ හුවමාරු කර ගැනීම සඳහා පහසුකම් සලසා ගැනීමට අපේක්ෂිත ය.

දෙපාර්ශ්වයට අදාළ වෙළෙඳාම පිළිබඳ තොරතුරු සහ වෙළෙඳපොළ බුද්ධිය හුවමාරු කර ගැනීම, දෙරටේම පැවැත්වෙන වෙළෙඳ ප්‍රදර්ශන, ප්‍රදර්ශන සහ ප්‍රවර්ධන අවස්ථා සඳහා ඒකාබද්ධ සහභාගිත්වය සහ ව්‍යාපාරික නියෝජිත කණ්ඩායම් අතර රැස්වීම් සංවිධානය කිරීම ඇතුළු පුළුල් පරාසයක වෙළෙඳ ප්‍රවර්ධන ක්‍රියාකාරකම් සඳහා මෙම අවබෝධතා ගිවිසුම යටතේ අවකාශ සැලසේ.

මෙම සහයෝගිතාව මඟින් විශේෂයෙන් සැකසූ ආහාර, ධීවර කටයුතු, ඇඟලුම් සහ අගය එකතු කළ කෘෂිකර්මාන්තයට සැලකිය යුතු වෙළෙඳපොළ අවස්ථාවන් දෙරටට ලබා දෙනු ඇතැයි අපේක්ෂා කෙරේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved