අයර්ලන්ත කණ්ඩායම ලකුණු 41කින් පරාජය කර දෙවැනි පුහුණු තරගය පහසුවෙන් ජයගැනීමට ශ්‍රී ලංකා කණ්ඩායම ඊයේ (31) ඇමරිකාවේ ලෝඩර්හිල්හිදී සමත් විය.
මෙහි පළමුවෙන් පන්දුවට පහරදී ශ්‍රී ලංකාවට සිය පන්දුවාර 20 අවසානයේ කඩුලු 8ක් දැවී ලබාගත හැකිවූයේ ලකුණු 164ක් පමණක් වන අතර පිළිතුරු ඉනිම ක්‍රීඩා කළ අයර්ලන්තයට එම ඉලක්කය සම්පූර්ණ කිරීමට නොහැකි විය.
අයර්ලන්තය ලකුණු 122කට සියලුමදෙනා දැවී ගියේය.
බිඳවැටුණු අයර්ලන්ත ඉනිමේ ඉහළම ඉනිම කර්ටියස් කැම්පර් වාර්තා කරද්දී, ශ්‍රී ලංකාව වෙනුවෙන් දසුන් ශානක සුපිරි පන්දු යැවීමක නිතර විය.
පන්දුවාර 3.2 පමණක් යොමුකළ දසුන් අයර්ලන්ත ඉනිමේ කඩුලු 04ක්ම දවාගැනීමට සමත් විය.
ඒ වෙනුවෙන් ඔහු ලබාදුන්නේ ලකුණු 23ක් පමණි.
දසුන්ට අමතරව මහීෂ් තීක්ෂණ (2/14), වනිඳු හසරංග (2/40), මතීෂ පතිරණ (1/13) හා දුෂ්මන්ත චමීර (1/19) කඩුලු දවාලමින් දක්ෂතා දැක්වූහ.
මේ සමග ශ්‍රී ලංකා කණ්ඩායම ලෝක කුසලානයට පෙර ක්‍රීඩා කිරීමට නියමිතව තිබූ පුහුණු තරග දෙකම අවසන් විය.
ඉන් ඔවුන් ක්‍රීඩාකළ පළමු පුහුණු තරගයෙන් නෙදර්ලන්තය හමුවේ ලකුණු 20කින් පරාජය විය.
ශ්‍රී ලංකාව විස්සයි20 ලෝක කුසලාන තරගාවලිය ආරම්භ කරමින් සිය පළමු තරගය ජූනි මස 03වැනිදා දකුණු අප්‍රිකාවට එරෙහිව ක්‍රීඩා කිරීමට නියමිතව ඇත.
එම තරගය ශ්‍රී ලංකා වේලාවෙන් එදින රාත්‍රී 8.00ට ආරම්භ වීමට නියමිතව ඇත.
