දෙවැනි දකුණු ආසියානු සැම්බෝ (Sambo) සටන්කලා ශූරතා තරඟාවලියේදී ශ්‍රී ලංකාව නියෝජනය කළ 08 දෙනකුගෙන් සමන්විත ශ්‍රී ලංකා කණ්ඩායම රන් පදක්කම් 04ක්, රිදී පදක්කම් 03ක් සහ ලෝකඩ පදක්කම් 02ක් දිනාගෙන සමස්ත තරඟාවලියේ තෙවැනි ස්ථානයට පත් වෙමින් ඊයේ (07) පස්වරුවේ කටුනායක ගුවන්තොටුපොළ වෙත පැමිණියහ.
මෙම තරඟාවලිය ඉකුත් 01දා සිට 05දා දක්වා බංග්ලාදේශයේ ඩකා නුවර බංගබන්දු ගෘහස්ථ ක්‍රීඩාංගණයේ පවත්වා තිබිණි.
මෙම ජයග්‍රහණයත් සමඟ ශ්‍රී ලංකා සැම්බෝ කණ්ඩායම ආසියානු තරඟාවලියට සහභාගි වීම සඳහා සුදුසුකම් ලබා තිබේ.
මෙම ජයග්‍රාහී කණ්ඩායම ඊයේ (07) පස්වරු 03.25ට ඉන්දියාවේ චෙන්නායි සිට ෆිට්ස් එයාර් ගුවන් සේවයේ 8 ඩී 834 දරන ගුවන්යානයෙන් කටුනායක ගුවන්තොටුපොළ වෙත පැමිණ තිබිණි.
මොවුන් පිළිගැනීම සඳහා ශ්‍රී ලංකා සැම්බෝ සමමේලනයේ නිලධාරීන් සහ ක්‍රීඩකයන්ගේ දෙමවුපියන් පිරිසක් කටුනායක ගුවන්තොටුපොළ පැමිණීමේ පර්යන්තය වෙත පැමිණ සිටියහ.
(සටහන සහ ඡායාරූප : දිනමිණ)
