ලෝක කුසලාන ක්‍රිකට් තරගාවලියට පෙරදා එනම් අද (04) පස්වරු 7ට අහමදාබාද් නරේන්ද්‍ර මෝදි ක්‍රීඩාංගණයේදී පැවැත්වීමට නියමිතව තිබූ සමාරම්භක උලෙළ ආරම්භවීමට පැය 24ක් තිබියදී එය හදිසියේම අවලංගු කිරීමට ඉන්දීය ක්‍රිකට් පාලක මණ්ඩලය තීරණය කර ඇතැයි එරට මාධ්‍ය වාර්තා කර තිබේ.
ඊයේ ප්‍රකාශිත මෙම තීරණයට හේතුව මෙතෙක් අනාවරණය වී නැති අතර, ලෝක කුසලාන ක්‍රිකට් තරගාවලි ඉතිහාසයේ නිල සමාරම්භක උත්සවයක් නොපැවැත්වෙන පළමු අවස්ථාව මෙය බවට ද මාධ්‍ය වාර්ති පලව ඇත.
ගිනිකෙළි සහ ලේසර් සංදර්ශන ඇතුළත්ව අතිඋත්කර්ෂවත් ලෙස පැවැත්වීමට සූදානම්ව තිබූ මෙම සමාරම්භක උත්සවයට ආශා බෝස්ලේ, රන්වීර් සිං, ආර්ජිට් සිං, ෂෙර්යාස් ඝෝෂාල් ඇතුළු බොලිවුඩයේ ජනප්‍රිය චරිත රැසක් සහභාගීවීමට සිටි හෙයින් විශාල පිරිසක් සමාරම්භක උලෙළ නැරැඹීමේ අපේක්ෂාවෙන් සිටි බව ඉන්දීය මාධ්‍ය සඳහන් කර තිබේ.
කෙසේ වුවද ලෝක කුසලාන ක්‍රිකට් තරගාවලියට සහභාගිවන ක්‍රිකට් නායකයින් නරේන්ද්‍ර මෝදි ක්‍රීඩාංගණයේදී මාධ්‍ය ඉදිරියේ අදහස් දැක්වීම සිදු කිරීමට මෙදින කටයුතු යොදා තිබේ.
එය ක්‍රිකට් තරගාවලියේ ‘නායකයින්ගේ දිනය‘ ලෙසින් නම් කොට ඇත.
‘නායකයින්ගේ දින‘ කටයුතු සැලසුම් කළ පරිදි සිදු වෙද්දී සමාරම්භක උත්සවය අවලංගු කිරීම සම්බන්ධයෙන් විධිමත් ප්‍රකාශයක් නොකිරීම පිළිබඳ බොහෝ දෙනා විමතිය පළ කරති.
ඉන්දීය නායක රෝහිත් ෂර්මා ඇතුළු කණ්ඩායම් නායකයින් 10 දෙනාම ‘නායකයින්ගේ දිනය‘ වෙනුවෙන් අද නරේන්ද්‍ර මෝදි ක්‍රීඩාංගණයේදී රැස් වෙති.
මෙම දැවැන්තම ක්‍රිකට් තරගාවලියේ සාම්ප්‍රදායිකව පවත්වනු ලබන සමාරම්භක උත්සවය වෙනුවට මේ 14 වැනිදා අහමදාබාද් නරේන්ද්‍ර මෝදි ක්‍රීඩාංගණයේ පැවැත්වෙන ඉන්දියාව සහ පාකිස්ථානය අතර ගැටුමට පෙර විශේෂ උත්සවයක් සංවිධාන කිරීමට ඉන්දීය ක්‍රිකට් ආයතනය සූදානම් වනු ඇතැයි නිල නොවන ආරංචි මාර්ග සඳහන් කළේය.
කෙසේ වුවද ආරක්ෂක හේතුන් මත ලෝක කුසලාන ක්‍රිකට් තරගාවලියේ සිදු වන බොහෝ කටයුතු සම්බන්ධයෙන් පූර්ව ප්‍රචාරයන් සිදු නොකිරීමට සංවිධායකයෝ වගබලාගෙන සිටිති.
