ක්‍රීඩා

Galle Marvels හිමිකරුට ඇප

Published

on

මහනුවර, පල්ලෙකැලේ පැවති ලංකා ටි 10 ක්‍රිකට් තරගාවලියේදී බටහිර ඉන්දීය කොදෙව් ක්‍රීඩකයෙකුට තරඟ පාවාදීම සඳහා යෝජනා කළේ යැයි සැකපිට රක්ෂිත බන්ධනාගාර ගත කර සිටි ගෝල් මාවල්ස් කණ්ඩායමේ හිමිකරු වූ ඉන්දීය ජාතික ප්‍රේම් තකාර් නැමැත්තා ඇපමත මුදා හරින ලෙස කොළඹ මහේස්ත්‍රාත් අධිකරණය නියම කලේය.

මෙම පැමිණිල්ල අද (20) කොළඹ ප්‍රධාන මහේස්ත්‍රාත් තිළිණ ගමගේ ඉදිරියේ කැඳවනු ලැබීය.

එහිදී සැකකරු වෙනුවෙන් පෙනී සිටි නීතිඥවරු තම සේවාදායකයා ඇපමත මුදාහරින ලෙස ඉල්ලා සිටියා.

ඊට ප්‍රතිචාර දක්වමින් පැමිණිල්ල වෙනුවෙන් පෙනී සිටි ජ්‍යෙෂ්ඨ රජයේ නීතිඥ උදාර කරුණාතිලක සඳහන් කළේ, මෙම සැකකරු ශ්‍රී ලංකාව තුළ රඳවා ගත හැකි වන ආකාරයේ සුදුසු නියෝගයක් අධිකරණය විසින් ප්‍රකාශයට පත් කරන ලෙසය.

ඒ අනුව, අදාළ සැකකරු රුපියල් ලක්ෂ පහක මුදල් ඇප සහ රුපියල් ලක්ෂ පනහ බැගින් වූ ශරීර ඇප දෙකක් මත මුදා හැරීමට නියෝග කළ අතර, සැකකරු විදේශගත වීම තහනම් කරමින් නියෝගයක්ද නිකුත් කලේය.

ඊට අමතරව සෑම බදාදා දිනකම සැකකරු ක්‍රීඩා දූෂණ විමර්ශන පොලිස් ඒකකය හමුවේ පෙනී සිටිය යුතු බවටත් තවත් ඇප කොන්දේසියක් පනවන ලදී.

Trending

Exit mobile version