2017 වසරේදී ජපානයේදී පුද්ගලයින් නව දෙනෙකු ඝාතනය කළ පුද්ගලයෙකුට මරණ දඬුවම ලබා දී තිබේ.

විදෙස් මාධ්‍ය වාර්තා කර ඇත්තේ ජපානය විසින් 2022 වසරෙන් පසුව එරට ක්‍රියාත්මක කරන ලද පළමු මරණ දඬුවමද මෙය වන බවය‍.

“ට්විටර් ඝාතකයා” ලෙස නම් කරන ලද තකහිරෝ ශිරයිෂි නම් පුද්ගලයෙකු විසින් මෙම ඝාතන එම කාලයේදී සිදුකර ඇති බවද විදෙස් මාධ්‍ය වාර්තා හී සඳහන් ව ඇත.

එවකට 30 හැවිරිදි වියේ පසුවූ තකහිරෝ විසින් අවුරුදු 15 -26ත් අතර තරුණියන් ඔහුගේ මහල් නිවාසයට ගෙන ගොස් ගෙල සිරකර ඔවුන්ගේ අවයව කපා ඝාතනය කර තිබුණි.

ජපාන පොලීසිය විසින් අතුරුදන් වූ පුද්ගලයෙකු සොයමින් 2017 වසරේ ඔක්තෝම්බර් මාසයේදී සිදුකරන ලද විමර්ශනයේදී ජපානයේ සමා නගරයයේදී අදාළ පුද්ගලයාගේ ශරීර කොටස් හමුව තිබූ අතර පසුව මෙම ඝාතන සිදුවීම් අනාවරණය වී ඇත.

සැකකරු අත්අඩංගුවට ගෙන සිදුකළ විමර්ශනයේදී ශිරයිෂි පවසා ඇත්තේ සියදිවි නසා ගැනීමට උත්සාහා කළ තැනැත්තන් නව දෙනෙකු තමන් ඝාතනය කළ බවත් අදාළ පුද්ගලයින් හඳුනා ගනු ලැබුවේ ට්විටර් සමාජ මාධ්‍ය වේදිකාව හරහා වන බවත්ය.

ඉන්පසු ඔවුන්ට මිය යාමට උදව් කළ බවත් ඇතැම් අවස්ථාවලදී තමන් ඔවුන් සමග සිය දිවි නසා ගන්නා බවත් ඔහු පවසා ඇතැයිද වාර්තා වේ.

ඔහු සිය ට්විටර් ගිණුමේ සටහනක් තබා ඇත්තේ “මට ඇත්තටම වේදනාවෙන් ඉන්න අයට උදව් කරන්න ඕන. කරුණාකර මට ඕනෑම වේලාවක කතා කරන්න.” යනුවෙනි.

පොලීසිය විසින් සැකකරු සම්බන්ධව සිදුකළ විමර්ශන හමුවේදී ඔහුගේ මහල් නිවාසයේ තිබී සිසිලන යන්ත්‍ර සහ මෙවලම් පෙට්ටිවල බහා තිබූ සිරුරු 9ක කොටස් හමුව තිබේ.

නඩු පවරන්නන් විසින් ශිරයිෂිට මරණ දඬුවම ඉල්ලා සිටියද ඔහුගේ නීතීඥයින් විසින් මරා දැමීමට වින්දිතයින් අවසර ලබා දී ඇති බව පවසා ඇති අතර, ඔහුගේ මානසික තත්ත්වය තක්සේරු කරන ලෙසද අධිකරණයෙන් ඉල්ලා තිබේ.

කෙසේ වෙතත් ශිරයිෂි පසුව අනාවරණය කර ඇත්තේ වින්දිතයින්ගේ කැමැත්තෙන් තොරව තමා ඔවුන්ව ඝාතනය කළ බවය.

එමෙන්ම මෙම මිනී මැරුම් හේතුවෙන් ට්විටර් විසින් සිය නීති සංශෝධනය කෙරුණු අතර පරිශීලකයින් සියදිවි නසාගැනීම් හෝ ස්වයං හානියක් ප්‍රවර්ධනය කිරීම හෝ දිරිමත් කිරීම නොකළ යුතු බවටද නීති සංශෝධනය කළේය.

ශිරයිෂිට මරණ දඬුවම ක්‍රියාත්මක කිරීමට නියෝග කළ බව පැවසූ ජපානයේ අධිකරණ අමාත්‍ය කීසුකේ සුසුකි පවසා ඇත්තේ ඝාතකයා තමන්ගේ ලිංගික සහ මූල්‍ය ආශාවන් තෘප්තිමත් කර ගැනීමේ සැබෑ ආත්මාර්ථකාමී හේතුව නිසා කටයුතු කර ඇති බවය.

මෙක්සිකෝවේ ගුවානාජුවාටෝ ප්‍රාන්තයේ පෙරේදා (24) පැවති ආගමික උත්සවයක් අතරතුර සිදුවූ වෙඩි තැබීමකින් පුද්ගලයින් 12 දෙනෙකු ජීවිතක්ෂයට පත්ව ඇති බව විදෙස් මාධ්‍ය වාර්තා කරයි.

වෙඩි තැබීමෙන් තවත් පුද්ගලයින් 20කට ආසන්න සංඛ්‍යාවක් තුවාල ලබා ඇත.

වෙඩි තැබීම ආරම්භ වන අවස්ථාවේ ශාන්ත ජෝන් බැප්ටිස්ට් සැමරුම වෙනුවෙන් ජනතාව වීදියේ නටමින් සහ මත්පැන් පානය කරමින් සිටි බව විදෙස් මාධ්‍ය වාර්තා පවසයි.

මෙක්සිකානු ජනාධිපති ක්ලෝඩියා ෂයින්බෝම් ප්‍රකාශ කර ඇත්තේ මෙම සිද්ධිය සම්බන්ධයෙන් විමර්ශනයක් පවත්වන බවය.

ගිනිකොනදිග යුක්‍රේනයට එල්ල වූ රුසියානු ගුවන් ප්‍රහාරවලින් පුද්ගලයින් 17 දෙනෙකු මියගොස් තිබේ.

විදෙස් වාර්තා සඳහන් කළේ, මෙම ප්‍රහාරයෙන් පාසල්, රෝහල් සහ මගී දුම්රියකට හානි සිදුව ඇති බවය.

ප්‍රහාරවලින් තවත් 200කට වැඩි පිරිසක් තුවාල ලැබූ බව යුක්‍රේන ජනාධිපති වොලොදිමීර් සෙලෙන්ස්කි පවසා තිබේ.

විදෙස් වාර්තා සඳහන් කළේ, ඊසානදිග සුමි නගරයේ සිදු වූ තවත් ප්‍රහාරවලින් කුඩා දරුවෙකු ඇතුළු තවත් තිදෙනෙකු මිය ගොස් ඇති බවය.

නෙදර්ලන්තයේ පැවති නේටෝ සමුළුවට යුක්‍රේන ජනාධිපතිවරයා පැමිණි අවස්ථාවේදී මෙම ප්‍රහාරය එල්ල වී ඇති බව සඳහන්ය.

ආරක්ෂක විධිවිධාන සහ රුසියාවට තවදුරටත් සම්බාධක පැනවීම පිළිබඳව සාකච්ඡා කිරීම සඳහා සමුළුව අතරතුරදී වොලොදිමීර් සෙලෙන්ස්කි අමෙරිකානු ජනාධිපති ඩොනල්ඩ් ට්‍රම්ප් හමුවීමට නියමිත බව වාර්තා වේ.