හිටපු ජනාධිපති ගෝඨාභය රාජපක්ෂ මහතා ඇතුළු පවුලේ සාමාජිකයෝ පස් දෙනෙක් එමිරේට්ස් ගුවන් සේවයේ ඊ.කේ.- 649 දරන ගුවන් යානයෙන් ඊයේ (26) අලුයම 02.55 ට කටුනායක ගුවන් තොටුපළ අති විශේෂ අමුත්තන්ගේ මැදිරිය ඔස්සේ ඩුබායි බලා පිටත්ව ගොස් තිබේ.
ඩුබායි වෙත ගිය ඔවුන් පසුව ඇමරිකාව බලා පිටත්ව යාමට නියමිත බව වාර්තා වේ.
මෙලෙස ඇමරිකාව බලා පිටත්ව ගිය පිරිස අතර හිටපු ජනාධිපතිවරයාගේ ලේලිය සෙව්වන්දි රාජපක්ෂ, ඔහුගේ පුත් මනෝජ් රාජපක්ෂ සහ මුණුපුරා ද සිටින බව පැවසේ.
දිවයිනේ උද්ගතවූ බරපතළ ආර්ථික අර්බුදය සම්බන්ධයෙන් උද්ගතවූ මහජන විරෝධතා මධ්‍යයේ හිටපු ජනාධිපති ගෝඨාභය රාජපක්ෂ හමුදා ජෙට් යානයකින් ශ්‍රී ලංකාවෙන් පිටව යන ලද්දේ 2022 ජූලි 13 වැනිදාය.
එහිදී පළමුව මාලදිවයින බලා පිටත්ව ගිය හිටපු ජනාධිපතිවරයා සහ එම ආර්යාව, එතැනින් සිංගප්පූරුව බලා පිටව ගොස් මාස එකහමාරකට පමණ පසුව නැවත මෙරටට පැමිණියහ.
රට තුළ අර්බුදකාරී තත්ත්වයක් නිර්මාණයවූ මොහොතේ ඇමරිකා එක්සත් ජනපදය වෙත පිටත්ව යෑමට හිටපු ජනාධිපතිවරයා අවසර ඉල්ලා සිටි නමුත්, එහිදී වීසා ලබාදීම එක්සත් ජනපදය විසින් ප්‍රතික්ෂේප කර තිබිණි.
එක්සත් ජනපදයේ පුරවැසියකුවූ හිටපු ජනාධිපති ගෝඨාභය රාජපක්ෂ, 2019 වසරේදී ජනාධිපතිවරණය වෙනුවෙන් ඉදිරිපත් වීම සඳහා, එක්සත් ජනපද පුරවැසිභාවය අහෝසි කරගත්තේය.
