පුවත්
මොනරෙකු මරාගෙන කෑ දර්ශන යූටියුබයට දැමූ 6ක් අල්ලන්න නියෝග
යූ ටියුබ් නාළිකාවක් ප්‍රවර්ධනය කිරීමේ අරමුණින් මාදුරු ඔය ජාතික වනෝද්‍යානයට නීති විරෝධීව ඇතුළු වී මොනරකු මරා කන දර්ශන රූ ගත කරමින් සමාජ මාධ්‍යයට මුදාහල පුද්ගලයකු හා ඊට සම්බන්ධ තවත් පුද්ගලයන් පස්දෙනකු අත්අඩංගුවට ගැනීමට අවශ්‍ය ක්‍රියාමාර්ග ගන්නැයි මහියංගණය මහෙස්ත්‍රාත්වරයා අධිකරණයට නියෝග කර තිබේ.
එම වීඩියෝව මගින් ශ්‍රී ලංකාවේ හා ජාත්‍යන්තරයේ වනජීවි අපරාධ කිරීමට ආධාර අනුබල සැපයීම ඇතුළු චෝදනා 05ක් යටතේ බී වාර්තාවක් මගින් මහියංගණය මහෙස්ත්‍රාත් අධිකරණයට කරුණු වාර්තා කිරීමෙන් අනතුරුව මහියංගණ මහෙස්ත්‍රාත් ටී. ජිනදාස මහතා මෙම නියෝගය කළේය.
‘‘ආදිවාසීන්ගේ වන ගත ජීවන චර්යාව’’ පිළිබඳව මෙම වීඩියෝව මගින් ප්‍රචාරය කිරීමට යන බව අඟවමින් 2019 හෝ 2020 වසරේ හෝ දිනයක නීතිවිරෝධීව මාදුරුඔය ජාතික වනෝද්‍යානයට ඇතුළු වී දුනු ඊතල යොදාගෙන මොනරකු දඩයම් කර, ගිනිමැල ගසා වනෝද්‍යානය තුළදීම හම මස් අනුභව කරන දර්ශන රූ ගත කර ඇති බවට එම බී වාර්තාව මගින් කරුණු වාර්තා කිරීමෙන් පසුව වැඩිදුර විමර්ශනය කිරීමට අධිකරණයට කරුණු වාර්තා කරන ලෙසද මහෙස්ත්‍රාත්වරයා වැඩිදුරටත් නියෝග කළේය.
මාදුරු ඔය ජාතික වනෝද්‍යානයේ හෙනානිගල උද්‍යාන පිවිසුම් කාර්යාලයේ සේවය කරන වන සත්ව අඩවි ආරක්ෂක කුමාරසිරි විජයකෝන් මහතා විසින් මෙම වීඩියෝව සම්බන්ධයෙන් මහියංගණ මහෙස්ත්‍රාත් අධිකරණයේ නඩුවක් ගොනු කර තිබේ.
